Ikuti Bukkale Bwakatazya

Naakali amyaka iili kuma 20 wakali mwiimbi uuzyibidwe alimwi wakali vwubide kapati. Mbasyoonto bantu ibavwuba akuba ampuwo iili boobo kabacili bana. Pele zyintu zyakacinca, tiizyakali kumweendela kubotu pe. Wakalekwa ziindi zyobilo amane wakaunka kwaakukkala kubusena nkobagwasya bantu bayanda kuleka kunywa bukoko akubelesya misamu iikola. Wakali kupenga.

CUUSISYA ncakuti icakamucitikila mukaintu ooyu cilabacitikila bantu banji. Alimwi twaambo twamusyobo ooyu tujatikizya bantu bali ampuwo tulaakwaambwa ziindi zinji muli sikapepele. Nomuba muzisi zisumpukide, bantu mobalibonya kuti bakkala kabotu, ibanji balipengede. Kujatikizya basimakwebo bavwubide kapati mudolopo lya New York, muteende umwi wakaamba kuti: “Kuyandisya mali kwapa kuti banji batazwidilili mumilimo yabo, babe amapenzi mumikwasyi alimwi akutalika kubelesya misamu iikola. . . . Nokuba kuti mali aacinyona mucila ngobapegwa bamwi kuma bbanga aali ku Wall Street mu U.S.A. apa kuti kabakkomana, ibamwi balatyompwa akaambo kakuti bayandika kulitakata kubeleka.”

Sena mapenzi aaya alaboola akaambo kakucita zyintu zitaluzi nobasoleka kulikkomanisya? Masimpe ngakuti, toonse tuyandika kuba amali kutegwa tuligwasye. Pele sena tweelede kuvwuba buya kutegwa katukkala kabotu? Buvwuntauzyi butondezya kuti oobo tabusyi mbwaabede makani. Mucikozyanyo, kuvwuntauzya kwakacitwa mucisi ca China ino-ino kutondezya kuti nokuba kuti cisi cilivwubide bantu tabakkutili.

Aboobo, ikukkala kabotu tacaambi buyo kuba amulimo mubotu, ŋanda, mootokala naa nkoloko iidula. Sena tacigwasyi kwaamba kuti kukkala kabotu kujatikizya bwini mbwabede muntu, nzyasyoma alimwi amakanze ngajisi mubuumi bwakwe? Mucikozyanyo, muntu ulakonzya kalibonya kabotu alimwi kali ampuwo pele katalilemeki alimwi katamvwani abantu. Umwi ulakonzya kali alubono pele akkala ansi kubona buumi bwakwe mbobubede ubona kuti zyoonse tazyigwasyi. Alimwi inga katacizyi ancaponena.

Aboobo, bantu bakkala kabotu babikkila maano kuzyintu ziyandika kapati alimwi basyoma njiisyo zigwasya. Akaambo kakucita boobo balikkalikene mumizeezo, balalilemeka alimwi balalemekwa. Alimwi bantu bali boobo balicizyi ncobaponena alimwi balakonzya kugwasya bamwi. Bamwi balakonzya kubuzya kuti: ‘Ino ninjiisyo nzi eezyo zikonzya kutugwasya? Ino ncinzi ncotuponena?’ Sena tulibuzyi bwiinguzi bwamibuzyo eeyi naa kuli kumbi nkotukonzya kubujana? Zibalo zitobela zilapandulula.

 [Kabbokesi kali apeeji 23]

Tabacizyi Cipa Kukkala Kabotu

Basikuvwuntauzya bajana kuti ibakubusi baya buvwula ibabelesya misamu iikola kutegwa bazunde muzisobano. Cibalo camu Intaneti cakuti Education Update cakaamba kuti: “Basicikolo baku kkoleji nobakabuzyigwa kuti: ‘Sena inga waubelesya musamu ooyo uupa nguzu ikutegwa uzunde muzisobano ikuti kozyi kuti kwainda myaka yosanwe uyakuciswa?,’ ibanji bakaingula kuti inzya. Nibakabuzyigwa kuti, ‘ino kuti waambilwa kuti kwainda myaka yosanwe uyakufwa?’ Bainda ku 65 pesenti bakaingula kuti inga baubelesya musamu ooyo.”