Ncotuli waano

IBBAIBBELE litondezya kuti Mulengi wesu, Jehova Leza, taciti zyintu kakunyina kaambo naa makanze. Mucikozyanyo, amuyeeye bubambe mbwaakabikka anyika ibujatikizya bweende bwamaanzi ibupa kuti kacikonzyeka kuba azyintu zipona anyika. Ikupandulula bweende oobu, Ibbaibbele lyaamba kuti: “Milonga yoonse ilatola kulwizi lupati, nekubaboobo lwizi taluzuli: milonga ilapiluka nkukonya oko nkuyakatalikila.”—Mukambausi 1:7.

Ibbaibbele lyaamba kuti zisyomezyo zya Leza nzyamasimpe mbubonya mbuli bweende bwamaanzi bwaambwa kale. Mbubwenya mbotuzyi mazuba aano, ikupya kwazuba nkokupa kuti maanzi aali mulwaanje, mulwizi amumilonga asanduke kuba busi akuya mujulu, eeyi  njemvula njotubona iiwa. Ikujatikizya bweende oobu bwamaanzi, Jehova waamba kuti: “Mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:10, 11.

Maanzi alapilukila anyika noiwa mvwula akupa kuti kube zyintu zipona. Mbubwenya buyo, ‘ijwi lizwa kumulomo wa Leza’ lipa kuti tuzumanane kupona kumuuya. Eeci cileendelana ancaakaamba Jesu Kristo naakati: “Teensi insima ilike njaaponena muntu, ulaponena amajwi oonse aazwa kumulomo wa-Leza.”—Matayo 4:4.

Ikulya cakulya cakumuuya ncatupa Leza cipa kuti tucikonzye kupona kweelana amakanze aakwe. Pele katutanacita oobo, tweelede kuzyiba makanze aa Leza. Mucikozyanyo, ino nkaambo nzi Leza ncaakalengela nyika? Alimwi ino mbuti makanze ngajisi kujatikizya nyika mbwaatujatikizya? Atwaalange-lange makani aaya.

Makanze Ngajisi Leza Kujatikizya Nyika

Akaambo kakuti Leza uyanda kuti bantu kabakkala kabotu, wakabikka musankwa amukaintu wakusaanguna Adamu a Eva mumuunda mubotu wa Edeni. Amane wakabalailila kuti: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.”—Matalikilo 1:26-28; 2:8, 9, 15.

Ncinzi ncotwiiya kumalailile aaya? Sena taali masimpe kuti Leza wakali kuyanda kuti bantu bailime nyika yoonse kutegwa ibe paradaiso? Ijwi lyakwe lyaamba kuti: “Majulu majulu aa-Jehova, pele nyika wakiiaba kubana ba-Adamu.”—Intembauzyo 115:16.

Pele kutegwa bantu bazumanane kupona kukabe kutamani anyika kweelana amakanze aakwe, beelede kumulemeka Jehova kwiinda mukumumvwida. Sena oobo mbwaakacita Adamu? Peepe. Wakabisya kwiinda mukutyola mulawo wa Leza. Ino ncinzi cakatobela? Bana ba Adamu boonse kubikkilizya andiswe notupona sunu, bakakona cibi alufwu mbubwenya mbolyaamba Bbaibbele kuti: “Cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.”—Ba-Roma 5:12.

Nkakaambo kaako bantu boonse ncobafwida alimwi anyika ncoitali paradaiso. Sena nkokuti makanze ngaakajisi Leza kujatikizya nyika akacinca?

Peepe. Amuyeeye kuti Leza wakaamba kuti: ‘Ijwi lizwa kumulomo wangu talikooyooboola kulindime cabuyo pe’ pele “liyoozuzikizya makanze aangu akucita kabotu makani ngendalitumina.” Kunze lyaboobo, Leza wakasyomezya kuti: “Njoocita zyoonse nzinjanda.” (Isaya 45:18; 46:10; 55:11) Ncayanda Leza—imakanze aakwe—ncakuti nyika eeyi yoonse ikabe paradaiso akukkalwa abantu bamubelekela calukkomano kweelana amakanze ngaakajisi kumatalikilo.—Intembauzyo 37:29; Isaya 35:5, 6; 65:21-24; Ciyubunuzyo 21:3, 4.

 Mbwaaya Kuzuzikizyigwa Makanze aa Leza

Jehova wakatondezya busongo alimwi aluyando kwiinda mukubikka bubambe bwakuti bantu bafwutulwe kucibi azyintu zicitika akaambo kacibi, nkokuti kutalondoka alufwu. Wakacita oobo kwiinda mukupa kuti kuzyalwe mwana musankwa uutajisi cibi ncobakakona bantu boonse kuzwa kumuntu wakusaanguna, Adamu. Ibubambe oobu ncecinunuzyo, icakapegwa kutegwa bantu bapona kweelana azyeelelo zya Leza bajane buumi butamani. (Matayo 20:28; Ba-Efeso 1:7; 1 Timoteo 2:5, 6) Ino mbuti mbocakapegwa cinunuzyo?

Mungelo wa Jehova wazyina lya Gabriyeli wakaambila nakalindu Mariya kuti wakali kuyoozyala mwana munzila yamaleele nokuba kuti kunyina ‘mwaalumi ngwaakazyi.’ Leza wakacita maleele aaya kwiinda mukulonzya buumi bwa Mwanaakwe mutaanzi kuzwa kujulu akubutola mwida lya Mariya. Aboobo, wakamita kwiinda munguzu zyamuuya uusalala wa Leza.—Luka 1:26-35.

Nokwakainda myezi iisika kufwuka Jesu wakazyalwa kalondokede mbubonya mbuli muntu wakusaanguna, Adamu. Mukuya kwaciindi wakaaba buumi bwakwe bulondokede kacili cipaizyo. Kwiinda mukucita boobo, Jesu wakaba “Adamu musyaalizi” alimwi wakapa kuti bantu boonse basyomeka kuli Leza banununwe kucibi alufwu.—1 Ba-Korinto 15:45, 47.

Masimpe, makani aaya ayelede kutukulwaizya kumuyanda Leza akaambo kakuti walo wakatuyanda kapati! Mbubwenya mbolyaamba Bbaibbele, “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Nokuba boobo, tweelede kulibuzya kuti, Ino luyando lwa Leza lweelede kundikulwaizya kucita nzi? Tweelede kutondezya kuti tulalumba cipego eeci.  Amulange-lange zikozyanyo zyabantu ibakacita oobo.

Kupona Munzila Iigwasya

Denise, iwaambwa mucibalo camana wakazyi kubona kuti kulemeka Leza kwiinda mukutobela milawo amalailile aakwe kwakapa kuti kapona kabotu akuzyiba ncaponena. Wakaamba kuti: “Kwiinda mukwiiya Bbaibbele ndakazyiba kuti kunze lyakuba amakanze ngaya kuzuzikizya kumbele, Leza ujisi mulimo ngobeelede kucita aabo bamukomba. Ncindabona ncakuti ikumutembaula Leza kwiinda mukupona kweelana amakanze aakwe nenzila mbotu kapati yakubelesya lwaanguluko ndwatupede lwakulisalila.”

Andiswe tulakonzya kucita oobo kwiinda mukwiiya akucita kuyanda kwa Leza. Masimpe tulizyi kuti kwaciindi cino tatunagwasyigwa cakumaninina acipaizyo cacinunuzyo iciya kupa kuti tukonzye kulondoka munyika mpya yabululami. Nokuba boobo, tweelede kubikkila maano kapati kuzyintu zyakumuuya mbwaanga oobo mbombubo mbwaakatulenga Leza.

Dave, iwaambwa mucibalo cakusaanguna, ngumwi wabaabo bakagwasyigwa kumana nzala yakumuuya njobakajisi. Wakajana bwiinguzi bwamibuzyo njaakajisi kujatikizya ncaakali kuponena. Wakaamba kuti: “Ndayeeya mbondakali kupona kanditana kwaazyiba makanze aa Leza, ndibona kuti ndakali kwiile kusowa ciindi muzyintu zitagwasyi. Nokuba kuti icakali kundityompya aciindi eeco tiindakalicizyi, masimpe ngakuti cakali boobo akaambo kakuti tiindakali kuzibikkila maano zyintu zyakumuuya. Mazuba aano ndilijisi bulangizi. Ndilicizyi ncondiponena ancondeelede kucita mubuumi.”

Masimpe, ikwiindana amizeezo yabantu batalondokede, ncaamba Leza mu Bbaibbele kujatikizya ncotuponena cilakkomanisya. Tuli waano anyika kutegwa katutembaula zyina lya Leza akuba acilongwe a Jehova kweelana amakanze ngaakajisi naakatulenga. Kwiinda mukucita boobo tulakonzya kumana nzala yakumuuya. Alimwi tulakonzya kukkomana kukabe kutamani kweelena amajwi aakaambwa kwiinda mubusolozi bwamuuya uusalala aakuti: “Bali acoolwe bantu bajisi Jehova kuba Leza wabo!”—Intembauzyo 144:15.

[Kabbokesi/Cifwanikiso icili apeeji 8]

NCOKULI MAPENZI

Bunji bwaziindi, mapenzi ngaapa kuti bantu batamvwisyi ikaambo ncotuli waano naa ncotuponena. Viktor Frankl wakaamba kuti: “Ikuti naa buumi buli amulimo uuli woonse nkokuti aalo mapenzi kuli mbwaagwasya. Mapenzi mbobuumi alimwi kunyina naakonzya kumana mbubonya mbolubede lufwu.”

Ibbaibbele lilapandulula ikaambo ncokuli mapenzi alufwu. Leza tali nguyo uuleta mapenzi alufwu pe. Muciindi caboobo, mapenzi aaya akatalika akaambo kabanabukwetene bakusaanguna ibakazangila Mulengi wabo kwiinda mukuyanda kuti kabalisalila cakucita kakunyina kusololelwa anguwe. Eeci nceciyanza ncobakakona bana babo boonse alimwi ncecipa kuti bantu kabapenga.

Nokuba kuti ikuzyiba ikaambo ncotuli waano kunyina nokukonzya kwaamana mapenzi oonse aatusikila, ikucita boobo kutugwasya kuti tuliyumye. Kunze lyaboobo, kutugwasya kuba abulangizi bwakuti Leza uyakwaagusya mapenzi alufwu kukabe kutamani.

[Citondezyo/Cifwanikiso icili apeeji 7]

Ibbaibbele litondezya kuti zisyomezyo zya Leza nzyamasimpe mbubonya mbuli bweende bwamaanzi

(Kutegwa mubone bwini mbwaakkede mabala, amubone bbuku lini)

Mvwula ← Maanzi aasanduka kuba busi ← Maanzi aasanduka kuba busi

↓ ↓

↓ ↑

Lwizi, milonga ↑

↓

→ → Lwaanje

[Cifwanikiso icili apeeji 8, 9]

Nkaambo nzi ncotukonzya kusyoma kuti mukuya kwaciindi nyika iyakuba paradaiso akukkalwa abantu bakkomene alimwi bayumu?

[Cifwanikiso icili apeeji 9]

‘Ncindabona ncakuti ikubelekela Leza nenzila mbotu kapati yakubelesya lwaanguluko ndwandipede lwakulisalila’—Denise