Bakubusi Balabuzya

Sena ndeelede kumwaamba mweenzuma ikuti wacita cibi?

“Cakali kukatazya. Wakali mweenzuma.”—James. *

“Kumatalikilo zyintu tiizyakali kabotu. Beenzuma tiibakali kundiyanda nkaambo ndakabaamba.”—Ann.

IBBAIBBELE lyaamba kuti: “Kuli muzwalani umwi walusinizyo kwiinda munyoko.” (Tusimpi 18:24) Sena ulijisi mweenzinyoko uuli boobu? Ikuti naa mboobo, nkokuti ulaacoolwe.

Pele ino mbuti kuti mweenzinyoko ulyaamba kuti Munakristo wacita cibi? Mucikozyanyo, ino kuti katalilemeki, kafweba, kanywa makoko kacili mwana, kabelesya misamu iikola naa kucita zyintu zimwi zibi? (1 Ba-Korinto 6:9, 10; 1 Timoteo 1:9, 10) Ino ncinzi ncokonzya kucita? Sena inga wamwaambila mweenzinyoko kuti ulicizyi ncaacita? Sena inga waambila bazyali bako? Naa ulaambila bazyali bakwe? Naa ulaambila baalu mumbungano? * Ikuti naa wamwaamba, ncinzi ciyakucitika kucilongwe cenu? Sena inga cainda kubota kuumuna buyo?

Sena Ndeelede Kumwaamba naa Kuumuna Buyo?

Kunyina muntu utalubizyi. Nkaambo Ibbaibbele lyaamba kuti: “Boonse babisya akulela kubulemu bwa-Leza.” (Ba-Roma 3:23) Nokuba boobo, bamwi balacita zibi zipati. Bamwi balalubizya cakuti ikuti batagwasyigwa inga caleta mapenzi aamwi. (Ba-Galatiya 6:1) Langa-langa cakacitika eeci.

▪ Munakristo uucili mwana wazyina lya Susan wakazyiba kuti mweenzinyina Munakristo wakali kulangilila bantu boonana a Intaneti akuswiilila nyimbo zitali kabotu.

Langa-langa mibuzyo eeyi: Ikuti koli Susan, ino nookacita nzi? Sena nookacita cintu cimwi kumakani aaya? Sena nookaamba kuti nzyayebelela a Intaneti tazindijatikizyi alimwi nciindi cakwe? Ikuti Susan naakaboola kuli ndiwe kutegwa umugwasye, ino nookamwaambila nzi?

․․․․․

Susan ncaakasala kucita: Naakaakkalila ansi makani aaya, Susan wakasala kwaambila bazyali bamweenzinyina. Wakati: “Ndakali kuyoowa kubaambila bazyali bakwe nkaambo tulamvwana  kapati. Cakandikatazya kubaambila cakuti ndakatalika kulila.”

Ino uyeeya buti? Sena Susan wakacita kabotu? Sena nicakabota ikuti naakaumuna buyo?

Kutegwa waamvwisye kabotu makani aaya langa-langa twaambo ootu:

Ino mweenzinyoko ncobeni inga wacita nzi? Lugwalo lwa Tusimpi 17:17 lwaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.” Ikuti muntu umwi wacita cintu citeendelani anjiisyo zyamu Bbaibbele, nkokuti muntu ooyo uli ‘mumapenzi’ kufwumbwa naa ulizyi naa katazyi. Nokuba kuti taciyandiki ‘kuciindizya kululama’ kwiinda mukukomezya makani masyoonto, mweenzinyoko ncobeni uyakukwaambila kuti oobu bukkale tabuli bwabunakristo. (Mukambausi 7:16) Ikuumuna buyo tacigwasyi.—Levitiko 5:1.

Kolibikka muciimo cabazyali bamweenzinyoko. Kolibuzya kuti: ‘Ikuti nindali muzyali alimwi mwanaangu musimbi naa musankwa keebelela bantu boonana a Intaneti, sena inga ndayanda kuzyiba? Ino inga ndalimvwa buti ikuti mwanaangu musankwa naa musimbi kazyi kuti mweenzinyina ucita cibi pesi taambi cili coonse?’

Ino mbuti kujatikizya zyeelelo zya Leza? Eeci tacili nceciindi cakuumuna buyo. Muciindi caboobo, weelede kutobela milawo ya Leza yakulilemeka iilembedwe mu Bbaibbele. Masimpe ngakuti, ikuti wacita ciluzi ulakonzya kupa kuti Mulengi wako akkomane. (Tusimpi 27:11) Kunze lyaboobo, inga kumoyo kwasalala nkaambo ulizyi kuti wamugwasya mweenzinyoko.—Ezekiele 33:8.

“Ciindi Cakwaamba”

Ibbaibbele lyaamba kuti kuli “ciindi cakuumuna aciindi cakwaamba.” (Mukambausi 3:7) Ikanji-kanji bana tabacizyi ncobeelede kucita nokuli penzi. Ikuti mweenzinyina wacita cibi balaakwaamba kuti: ‘Tandiyandi kumunyemya mweenzuma naa kulinjizya mumapenzi.’ Ikuti ootu ntotwaambo tolikke tweelede kulangwa-langwa, nkokuti eeco cilakonzya kuba “ciindi cakuumuna.”

Nokuba boobo, wanakukomena ulatalika kuzyibona zyintu mbwakonzya kuzyibona muntu mupati. Ulakonzya kuzyiba kuti mweenzinyoko wanjila mumapenzi aboobo uyandika kumugwasya. Cakutainda mumbali, ncinzi ncokonzya kucita ikuti wamvwa kuti mweenzinyoko wacita cintu citeendelani anjiisyo zyamu Bbaibbele?

Cakusaanguna weelede kusinizya kuti ncookamvwa ncamasimpe. Ambweni makani ngookamvwa ngakubeja. (Tusimpi 14:15) Mukubusi umwi wazyina lya Katie wakati: “Mweenzuma wakatalika kundibejekezya alimwi bantu bandizyi bakali kuyeeya kuti wakali kwaamba masimpe. Eeci cakandiyoosya nkaambo ndakali kuyeeya kuti kunyina uya kundisyoma alimwi!” Ibbaibbele lyakaambila limwi kuti Jesu ‘takakosoli makani ngaamvwa buyo.’ (Isaya 11:3) Ino ncinzi ncoiya aawa? Toyelede kusyoma zyintu zyoonse nzyoomvwa. Weelede kujana masimpe. Langa-langa cakacitika eeci.

▪ James waambwa kumatalikilo kwacibalo eeci wakamvwa kuti mweenzinyina wakabelesya misamu iikola kupobwe.

Langa-langa mibuzyo eeyi: Ino nookacita nzi ikuti nookali James? Ino mbuti mbokonzya kuzyiba ikuti naa nzyookamvwa zyamasimpe?

․․․․․

James ncaakasala kucita. Kumatalikilo James wakacita kube kunyina ncazyi alimwi kunyina ncaakamvwa. Wakati, “Manjezyeezya  akatalika kundikatazya. Ndakalizyi kuti ndakeelede kumubuzya mweenzuma kujatikizya makani aaya.”

Ino uyeeya buti? Ino kusaanguna kubuzya muntu waambwa kuti talilemeki cigwasya buti?

․․․․․

Ikuti naa cilakukatazya kubuzya muntu kujatikizya makani ngookamvwa, ino ncinzi cimbi ncokonzya kucita?

․․․․․

Mweenzinyina James wakazumina kuti wakaibelesya misamu iikola kupobwe. Kumane wakamulomba James kuti ataambili muntu uuli woonse. Pele James wakali kuyanda kucita ciluzi. Alimwi wakali kuyanda kuti mweenzinyina awalo acite ciluzi. Aboobo wakamupa nsondo yomwe mweenzinyina kuti akalyaambe kubaalu bamumbungano. Wakamwaambila kuti ikuti atakalyaambi nkokuti James uyakumwaamba.

Sena uyeeya kuti ncaakacita James cakali cibotu? Nkaambo nzi ncocakali kabotu naa ncocakali cibi?

․․․․․

Mweenzinyina James tanaakalyaamba kubaalu, aboobo James wakamwaamba. Kumbele, mweenzinyina wakaliyeeya. Bakamugwasya baalu kuti aempwe akuba acilongwe alimwi a Jehova.

Sena Kwaamba Bamwi Ncibi?

Nokuba boobo ulakonzya kubuzya kuti: ‘Ikuti ndabaamba bamwi, sena tabako kundaamba kuti ndilalicenjezya? Sena inga tiicandigwasya kucita kube kunyina ncondizyi?’ Ikuti walijana mubukkale buli boobu, ncinzi ncokonzya kucita?

Cakusaanguna, ncoyelede kuzyiba ncakuti ikucita ciluzi lyoonse cilakatazya. Uyandika kuba sicamba kutegwa umwaambe mweenzinyoko wacita cibi. Inga cainda kugwasya kumwaambila Leza mumupailo makani aaya. Komulomba busongo abusicamba. Ulakonzya kukugwasya.—Ba-Filipi 4:6.

Cabili, koyeeya mbociya kumugwasya mweenzinyoko ikuti wamwaamba. Mucikozyanyo, kweezyeezya kuti uleenda amweenzinyoko mumbali amulundu mpoonya mweenzinyoko watezemuka akuwa. Kakunyina akudooneka mweenzinyoko uyandika kugwasyigwa. Pele ino mbuti kuti akaambo kakufwa nsoni wakwaambila kuti mbubo ulanyamuka akutanta alikke? Sena inga wamuleka kuti acite kweelana ambwaamba?

Ncimwi buyo ikuti mweenzinyoko watyola milawo yamu Bbaibbele. Muntu ooyo inga wayeeya kuti ulakonzya kuba acilongwe alimwi a Jehova kakunyina uumugwasya. Pele ooku nkufwubaala. Masimpe, mweenzinyoko inga waba ansoni akaambo kacintu ncaakacita. Pele ikwaambila muntu umwi kulakonzya kupa kuti mweenzinyoko agwasyigwe.—Jakobo 5:15.

Aboobo, toyelede kuyoowa kumwaamba mweenzinyoko ikuti wacita cibi. Kwiinda mukumugwasya mweenzinyoko, ulakonzya kutondezya kuti ulasyomeka kuli Jehova Leza alimwi ulamuyanda mweenzinyoko. Ambweni buzuba bumwi uyakukulumba akaambo kakumugwasya.

Zibalo azimbi zijisi mutwe wakuti “Bakubusi Balabuzya” zilakonzya kujanwa aa Intaneti akkeyala ya www.watchtower.org/ype

Bupanduluzi buyungizidwe

TWAAMBO TWAKUYEEYA

▪ Nkaambo nzi ikumwaamba mweenzinyoko wakacita cibi ncokutondezya kuti ulamuyanda?

▪ Ino mbaani mu Bbaibbele mbozyi ibakali kuyanda kusyomeka kumweenzinyina muciindi cakusyomeka kuli Leza? Ncinzi ncokonzya kwiiya kuli mbabo?

[Cifwanikiso icili apeeji 29]

Ikuti mweenzinyoko Munakristo kataciti kabotu, weelede kubona kuti wagwasyigwa