Bakubusi Balabuzya

Mbaani Bakonzya Kuba Beenzuma Beni-beni?

“Ikuti ndanyema ndiyanda muntu uukonzya kundiswiilila. Ikuti kandityompedwe ndiyanda muntu uukonzya kundiyumya-yumya. Ikuti kakuli kaambo kandikkomanisya ndilaakuyanda muntu ngondikonzya kwaambila kaambo aako. Ncindiyanda kapati nkuba abalongwe.” —Brittany.

KWAAMBWA kuti ibana bayanda bananyina mbobakonzya kusobana limwi kaali bakubusi bayanda bantu ibakonzya kuba beenzyinyina ncobeni. Ino nkwiindana nzi kuliko aawa?

Kuli bantu mbomwaambaula limwi, pele mweenzyinyoko nguyooyo ngomumvwana ncobeni naa ngomweendelana.

Kuyungizya waawo, Ibbaibbele lyaamba kuti: “Mulongwe ulayanda mweenzinyina ciindi coonse, pele munyina uzyalilwa kugwasya muziindi zyamapenzi.” (Tusimpi 17:17, BT) Cakutadooneka, muntu uuli boobu uliindene kapati abaabo mbowakali kusobana limwi kubwana!

Masimpe ngakuti: Noya bukomena weelede kuba abeenzyinyoko

(1) Bajisi bube bubotu.

(2) Batobela zyeelelo zyamu Bbaibbele.

(3) Bakonzya kukukulwaizya kucita zyintu zibotu.

Mubuzyo: Mbuti mbokonzya kumuzyiba mweenzyinyoko kuti uuli boobu? Atulange-lange twaambo ootu.

Kaambo Kakutaanguna Bube Bubotu

Ncoyelede kuzyiba. Tabali boonse bakonzya kuba beenzyinyoko beni-beni. Ibbaibbele lyaamba kuti: “Nkobali [balongwe] basikuupaupa ameso.” (Tusimpi 18:24) Aaka kaambo inga kalimvwisya mbuli kuti nkakubeja. Pele ikuti naa wayeeya: Sena kunyina muntu ngomwakali kumvwana limwi wakakuunina, kukubejekezya naa kukuvwiya? Zyintu zili boobu zilakonzya kupa kuti uleke kubasyoma beenzyinyoko. * Ncoyelede kuzyiba ncakuti ikuba abeenzyinyoko  bali kabotu kulayandika kapati kwiinda kuba abeenzyinyoko banji pele batalilemeki.

Ncokonzya kucita. Kosala beenzyinyoko bajisi bube bubotu naa balilemeka.

“Bantu boonse balamulumbaizya imweenzuma Fiona. Ndiyanda kuti andime kabandilumbaizya.”—Yvette, ulaamyaka iili 17.

Sola nzila eeyi.

1. Bala Ba-Galatiya 5:22, 23.

2. Kolibuzya kuti, “Sena beenzuma balalilemeka kweelana ‘amicelo yamuuya’?”

3. Kolemba mazyina abeenzyinyoko mbomumvwana limwi ansi aawa. Kumbele aazyina alimwi, lemba bube butondezya ibwini mbwabede mweenzyinyoko ooyo.

Zyina Bube

․․․․․ ․․․․․

․․․․․ ․․․․․

․․․․․ ․․․․․

Muzeezo: Ikuti naa ooyo ngomvwana limwi kajisi buyo bube butali kabotu, inga cagwasya kuyandaula umbi!

Kaambo Kabili—Zyeelelo zyamu Bbaibbele

Ncoyelede kuzyiba. Kutegwa usale beenzyinyoko bali kabotu weelede kulangisya. Ibbaibbele lyaamba kuti: “Uuenda abasongo ulasongwaala, pele muzwalani wabafubafuba ulabisizigwa.” (Tusimpi 13:20) Mulugwalo oolu, ibbala lyakuti “bafubafuba” talyaambi bantu batako maano. Muciindi caboobo, lyaamba bantu batayandi kutobela zyeelelo zibotu, ibatalilemeki. Toyelede kusobana abantu bali boobo!

Ncokonzya kucita. Muciindi cakusobana amuntu uuli woonse, weelede kusala. (Intembauzyo 26:4) Eeci tacaambi kuti weelede kulanga musyobo naa ciwa camuntu. Kusala kwaambwa waawa nkwakuti, weelede “kwaandaanya mululami asizibi, muntu uuyoowa Leza amuntu uutamuyoowi.”—Malaki 3:18.

Leza tasalululi, pele ulasala caboola kumakani aakubona baabo ‘bakonzya kukkala muŋanda yakwe.’ (Intembauzyo 15:1-5) Andiwe ulakonzya kucita oobo. Ikuti kotobela zyeelelo zya Leza, ulakonzya kuyandwa abaabo batobela zyeelelo eezyo. Bantu bali boobo mbabakonzya kuba beenzyinyoko ncobeni!

“Ndilikkomene kuti bazyali bangu bakandigwasya kusala beenzuma beni-beni—bamusela wangu alimwi bayumu kumuuya.”—Christopher ulaamyaka iili 13.

Sola nzila eeyi.

Ingula mibuzyo iiccilila:

▪ Nondili abeenzuma, sena ndilaakuyoowa kuti balakonzya kundiyunga akupa kuti ndicite cintu cimwi cibi?

□ Inzya □ Peepe

 ▪ Sena ndilayoowa kwaambila bazyali bangu kujatikizya beenzuma mbondijisi akaambo kakuyoowa kuti inga tiibandizumizya kumvwana abantu bali boobu?

□ Inzya □ Peepe

Muzeezo: Ikuti naa waingula kuti inzya kumibuzyo iili atala aawa, inga cainda kukugwasya kuyandaula beenzyinyoko balilemeka kabotu. Ulakonzya kutalika abaabo bakwiinda ciimo alimwi bajisi cikozyanyo cibotu ca Bunakristo.

Kaambo Katatu—Kukukulwaizya kucita zyintu zibotu

Ncoyelede kuzyiba. Ibbaibbele lyaamba kuti: “Mweenda abamineme anywebo mulaminama.” (1 Ba-Korinto 15:33) Mukubusi wazyina lya Lauren wakaamba kuti: “Basicikoloma bakali kunditantamuka ndakaka kucita zyintu nzyobakali kundaambila. Ndakali kulendelelwa, aboobo ndakatalika kucita zyintu nzyobakali kucita akaambo kakuyanda buyo kubakkomanisya.” Kweelana ancaakaamba Lauren, ikuti naa koile kutobela zyeelelo zyabamwi, ibeenzyinyoko balakonzya kutalika kukweendelezya akukutontaika mbuli mbobeenda nsolo. Oobo tabusyi mboceelede kuba!

Ncokonzya kucita. Ikuti naa kuli bayanda kuti ucince akutalika kucita zyintu nzyobacita, inga cainda kugwasya kuleka kusobana ambabo. Ikuti naa wacita oobo ulakonzya kulimvwa kabotu akujana beenzyinyoko beni-beni ibakonzya kukukulwaizya kucita zyintu zibotu.—Ba-Roma 12:2.

“Imweenzuma Clint ulikkalikenyi alimwi ulaalulomba, aboobo ulandikulwaizya kapati.”—Jason ulaamyaka iili 21.

Sola nzila eeyi.

Kolibuzya mibuzyo iiccilila:

▪ Sena ndilaakucinca nsamino yangu, mbondaambaula naa mbondililemeka akaambo kakuyanda buyo kukkomanisya beenzuma?

□ Inzya □ Peepe

▪ Sena ndilaakuunka kumasena aatali kabotu akaambo kakuyungwa abeenzuma?

□ Inzya □ Peepe

Muzeezo: Ikuti naa waingula kuti inzya kumibuzyo iili atala aawa, inga cainda kukugwasya kulomba lugwasyo kubazyali bako naa kumuntu umwi mupati kulindiwe. Alimwi ikuti naa uli umwi wa Bakamboni ba Jehova, ulakonzya kuunka kumwaalu Munakristo akumulomba kuti akugwasye kubona mbokonzya kusala beenzyinyoko bakonzya kukukulwaizya kucita zyintu zibotu.

Zibalo azimbi zijisi mutwe wakuti “Bakubusi Balabuzya” zilakonzya kujanwa aa Intaneti akkeyala ya www.watchtower.org/ype

Bupanduluzi buyungizidwe

TWAAMBO TWAKUYEEYA

▪ Ino muntu uuli buti ngoyanda kuti abe mweenzyinyoko, alimwi nkaambo nzi?

▪ Mbube nzi mboyelede kuba ambubo kutegwa beenzyinyoko kabakuyanda?

[Kabbokesi kali apeeji 27]

NZYOBAAMBA BAKUBUSINYOKO BAMWI

“Ibazyali bangu nibakali kundikasya kusobana abeenzuma bamwi, ndakali kuyeeya kuti kunyina umbi ngondikonzya kumvwana anguwe kunze lyabantu aaba. Pele lulayo ndobakali kundipa bazyali bangu lwakali lubotu, alimwi nindakakkala ansi kuyeeya makani aaya, ndakabona kuti ndakali kukonzya kuba abeenzuma banji beni-beni.”—Cole.

“Ikutola lubazu mumulimo wakukambauka wa Banakristo kwandigwasya kuzyibana akumvwana abantu baindene-indene ibali mumbungano, ibana abapati. Alimwi ndilaakuba aciindi cinji cakuyanzana abantu bamuyanda Jehova.”—Yvette.

“Ndakali kupaila kuti ndijane beenzuma babotu, pele ndakabona kuti tiindakali kubweza ntaamu yakubayandaula. Aboobo, ndakabweza ntaamu akutalika kubandika abamwi kumiswaangano ya Bunakristo. Tiilyakalampa pe ndakaba abeenzuma banji bapya. Mazuba aano tandilendelelwi bunji bwaziindi.”—Sam.

[Kabbokesi kali apeeji 28]

SOLA NZILA EEZYI

Bandika abazyali bako kujatikizya beenzyinyoko. Kobabuzya bakwaambile beenzyinyina mbobakajisi nobakali bakubusi. Sena baluuside akaambo kabeenzyinyina mbobakasala? Ikuti naa mboobo ino nkaambo nzi? Kobabuzya bakwaambile mbokonzya kweeleba mapenzi ngobakajana.

Beenzinyoko kobazyibya kubazyali bako. Ikuti naa ulayoowa kucita boobo, kolibuzya kuti, ‘Ino ncinzi cindipa kuyoowa?’ Sena kuli cintu cimwi ncobalaakucita beenzyinyoko ncoyeeya kuti inga tiicabakkomanisya bazyali bako? Ikuti naa mboobo, weelede kusala bantu bakonzya kuba beenzyinyoko ncobeni.

[Kabbokesi kali apeeji 28]

NZILA ZYOTATWE ZIKONZYA KUPA KUTI UZUMANANE KUBA ABEENZYINYOKO BABOTU

▪ Kobaswiililisya. Weelede kubabikkila maano beenzyinyoko.—Ba-Filipi 2:4.

▪ Kobalekelela. Taaku muntu uulondokede. “Toonse tulalubya muziyanza zinji.”—Jakobo 3:2.

▪ Kobapa ciindi. Ncibotu kubapa ciindi cakulikkalila beenzyinyoko. Beenzyinyoko beni-beni kunyina nobakonzya kukulekelezya.—Mukambausi 4:9, 10.

[Cifwanikiso icili apeeji 26]

Ikuti kotobela zyeelelo zya beenzyinyoko akaambo buyo kakuyanda kubakkomanisya, balakonzya kukutontaika mbuli mbobeenda cisolo