Ncolyaamba Bbaibbele

Sena Mapenzi Ngomujisi Ncisubulo Cizwa Kuli Leza?

Mukaintu umwi ulaamyaka iili 50 naakazyiba kuti ulaabulwazi bwakkansa wakaamba kuti, “Ndibona mbuli kuti ndili mukusubulwa a Leza.” Mpoonya naakayeeya cibi ncaakacita musyule, wakati: “Ndiyeeya kuti Leza usola kundiyeezya cibi ncindakacita.”

NOBAJANIKA mumapenzi, bantu banji balaakuyeeya kuti Leza nguuli mukubasubula akaambo kacibi ncobakacita. Ikuti basikilwa penzi lyacibukila mbuta, balaakutongooka kuti: “Ino penzi eeli lyandisikila-sikila buti? Ncibi nzi ncindakacita?” Sena tweelede kuyeeya kuti imapenzi aatusikila ncitondezyo cakuti Leza tatukkomanini? Sena masimpe kuti notusikilwa mapenzi citondezya kuti tuli mukusubulwa a Leza?

Bakombi Basyomeka Bakali Kusikilwa Mapenzi

Amuyeeye ncolyaamba Bbaibbele kujatikizya mwaalumi uutegwa Jobu. Cakutayeeyela, Jobu wakasweekelwa lubono lwakwe loonse. Kuzwa waawo, bana bakwe boonse ibali kkumi bakajaigwa aguwo. Mpoonya, wakaba acilwazi cimana mubili alimwi cisesemya. (Jobu 1:13-19; 2:7, 8) Imapenzi aaya akapa kuti Jobu alilauke kuti: “Janza lya Leza lyanduuma!” (Jobo 19:21, BT) Mbubonya mbobayeeya ibanji mazuba aano, kuboneka kuti Jobu wakali kuyeeya kuti Leza nguwakali kumusubula.

Pele, Ibbaibbele litondezya kuti katana kunjila mumapenzi Jobu, Leza ilwakwe wakaamba kuti Jobu wakali “muntu uutakwe mulandu, uululeme, uulemeka Leza akuyoowa cibi.” (Jobu 1:8) Mbokunga majwi aaya atondezya kuti Leza wakali kumukkomanina Jobu, kunyina notukonzya kwaamba kuti imapenzi aakamusikila akali kutondezya kuti wakali kusubulwa a Leza.

Masimpe ngakuti, mu Bbaibbele kuli zibalo zinji zyaamba bantu baluleme ibakasikilwa  mapenzi. Mucikozyanyo, nokuba kuti Josefa wakali mubelesi wa Leza uusyomeka, wakaangwa kwamyaka minji aatako akaambo. (Matalikilo 39:10-20; 40:15) Munakristo uusyomeka Timoteo wakali apenzi ‘lyakutabukila bulo.’ (1 Timoteo 5:23) Naba Jesu Kristo iwatakacita cibi cili coonse wakapenzyegwa katana jaigwa calunya. (1 Petro 2:21-24) Aboobo, taceeleli kuyeeya kuti mapenzi aatusikila atondezya kuti tuli mukusubulwa a Leza. Pele ikuti naa Leza tali nguyo uuleta mapenzi, ino nkokuti azwa kuli?

Ikuzwa Mapenzi

Ibbaibbele litondezya kuti Saatani Diabolosi nguwakaleta mapenzi kuli Jobu. (Jobu 1:7-12; 2:3-8) Kuyungizya waawo litondezya kuti mapenzi manji aatusikila mazuba aano azwa kuli Saatani. Lyaamba kuti: “Nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.” (Ciyubunuzyo 12:12) Mbokunga ‘ngomwami wanyika ino,’ Saatani uli mukuyunga bantu banji kucita zyintu zibi izipa kuti bantu kabapenga kapati.—Johane 12:31; Intembauzyo 37:12, 14. *

Nokuba boobo, tatweelede kuyeeya kuti imapenzi oonse aatusikila azwa kuli Diabolosi. Akaambo kakuti twakakona cibi akutalondoka, zimwi ziindi talaakucita zyintu zitali kabotu zyalo zikonzya kutunjizya mumapenzi. (Intembauzyo 51:5; Ba-Roma 5:12) Mucikozyanyo, atwaambe kuti umwi muntu katalyi kabotu naa katapumuni acaali. Ikuti naa muntu uuli boobo watalika kuciswa-ciswa, sena inga twaamba kuti ngu Diabolosi wapa kuti cibe boobo? Peepe, muntu uuli boobo utebula nzyaakasyanga. Aayo mapenzi ngakuliyandila. (Ba-Galatiya 6:7) Ibukkale oobo buleendelana akaambyo kamu Bbaibbele kakuti: “Bufubafuba bwamuntu [bulamutola] kukunyonyooka.”—Tusimpi 19:3, BT.

Kaambo akamwi nkotweelede kuyeeya nkakuti imapenzi manji aatucitikila alaboola akaambo kakuti toonse buyo ‘tulasikilwa ziindi zyalufwu azyamapenzi.’ (Mukambausi 9:11) Mucikozyanyo, atwaambe kuti muntu umwi uya bweenda munzila mpoonya mvwula yatalika kuwa. Kweelana abusena mpabede, muntu ooyo ulakonzya kuteta kapati naa pe. Mbubwenya buyo, ‘kuziindi zino zikataazya,’ imapenzi alakonzya kutucitikila aciindi ncotutayeeyeli. (2 Timoteo 3:1-5) Kweelana aciindi alimwi abukkale bwesu, bunji bwaziindi imapenzi aaya alakonzya kutukomenena naa pe. Pele, sena eeci caamba kuti imapenzi aatusikila taakamani?

Mapenzi Oonse Alaafwaafwi Kumana

Icikkomanisya ncakuti, ino-ino Jehova Leza ulaamana mapenzi oonse aatusikila. (Isaya 25:8; Ciyubunuzyo 1:3; 21:3, 4) Kwaciindi cino, utondezya kuti ulatubikkila maano ncobeni kwiinda ‘mukutuyiisya akutontozya myoyo yesu a Magwalo’ alo aatugwasya kuzunda mapenzi ngotujana akulangila buumi bubotu mbotuya kuba ambubo kumbele. (Ba-Roma 15:4; 1 Petro 5:7) Kuciindi eeco, aabo baluleme mumeso aa Leza baya kupona kukabe kutamani munyika mpya mutako mapenzi aali oonse.—Intembauzyo 37:29, 37.

Bupanduluzi buyungizidwe

[Kabbokesi kali apeeji 30]

SENA KULI NOMWAKALIBUZYIDE KUTI?

▪ Sena mbaasizibi balikke ibasikilwa mapenzi?—Jobu 1:8.

▪ Sena mapenzi oonse azwa kuli Diabolosi?—Ba-Galatiya 6:7.

▪ Sena mapenzi taakamani?—Ciyubunuzyo 21:3, 4.

[Majwi aakwelelezya sikubala aali apeeji 30]

“Bantu boonse buyo balasikilwa ziindi zyalufu azyamapenzi.” —Mukambausi 9:11