Amubalele Kabotu Bana Benu

CAKALEMBWA AMULEMBI WA SINSIMUKA! WAKU CANADA

▪ Imuteende wiitwa kuti The New York Times wakaamba kuti: “Muntu ulakonzya kwiiya zyintu zinji acipekupeku.” Nokuba boobo, “mibili amizeezo yabana ilanyongana kwiinda mukweebelela cipekupeku kwaciindi cilamfwu,” akaambo kakuti kucita boobo kubamanina maano alimwi kupa kuti batabi aciindi cakwiiya zyintu akuyanzana abantu bamwi.

Nobakamana kuvwuntauzya bana bali 2,500 ibakali kweebelela cipekupeku, mutende wakaamba kuti basikuvwuntauzya baku Cibbadela Cabana cili mudolopo lya Seattle, mucooko ca Washington, U.S.A., “bakajana kuti ibana beebelela cipekupeku kwaciindi cilamfwu bajisi penzi lyakubikkila maano kuzyintu nobasika amyaka iili ciloba.” Bana bali boobo bakajisi bukali alimwi tiibakali kubikkila maano kuzyintu kwaciindi cilamfwu. Syaazibwene mumakani alwiiyo, Dr. Jane M. Healy wakaamba kuti: “Bazyali banji ibajisi bana bajisi penzi lyakubikkila maano kuzyintu bakajana kuti bana babo bakatalika kubikkila maano kuzyintu ciindi nobakatalika kubakasya kweebelela cipekupeku.”

Ino ncinzi ncobakonzya kucita bazyali kutegwa bacesye ciindi ncobeebelela cipekupeku bana babo? Ngooyu muzeezo wakapegwa abasikuvwuntauzya: Amubabikkile ciindi cakweebelela cipekupeku bana benu abuzuba. Mutalekeli bana benu kweebelela cipekupeku lyoonse. Muciindi caboobo, amubape milimo yaaŋanda njobakonzya kucita. Amusale mapulogilamu ngayelede kweebelela mwaneenu alimwi amucizime cipekupeku ikuti naa mapulogilamu aayo amana. Ikuti kacikonzyeka, amweebelele antoomwe amwaneenu mapulogilamu ngomwasala akubandika nzyomubona. Andinywe mweelede kucesya ciindi ncomweebelela cipekupeku.

Ikuyiisya bana mbobeelede kulilemeka akupona abantu bamwi kuyandika ciindi cinji, kuba amakanze alimwi akukakatila. Ikucita boobo kuletela zilongezyo zinji. Kasimpi ikakalembwa kaindi kalaasinzya makani aaya nokati: “Iyisya mwana aende munzila iielede, lino akomena takooyooleya mulinjiyo.” (Tusimpi 22:6) Cibeela ciyandika kapati cakuyiisya ooku cijatikizya kuyiisya bana mbobeelede kulilemeka.

Bakamboni ba Jehova bagwasyigwa kucita boobo kwiinda mukubelesya bbuku lyakuti Amwiiye ku Mwiiyi Mupati ikuyiisya bana babo mbobeelede kulilemeka. Masimpe, bazyali ibabandika kabotu alimwi akubabikkila maano bana babo nobacili basyoonto balajana bulumbu butamani. Bazyali balakkomana kapati ikubona bana babo kabakomena kuba bantu balemekwa alimwi bajisi maano.