Ino Mbuti Bazyali Mbobakonzya Kugwasya?

KABUNGA kamwi kajatikizya makani aalwiiyo mucisi ca United States kakulwaizya basicikolo bali kuzikolo zyasekondali kwiinda mukubaambila kuti: “Amutondezye kuti mulilisungwide kubeleka kusikila mpomugolela.” Akaambo kakulisungilizya kuti bazuzikizye mbaakani zyabo, bakubusi banji basola kucita zyintu nzyobatakonzyi. Madeline Levine, iwaambwa mucibalo cainda wakalemba kuti: “Ibana banji balakonzya kuba amapenzi akaambo kakuba aaziiyo zinji, kubeleka milimo minji kucikolo, kwiiya zyintu zyakusekondali naa kukkoleji kacitanasika ciindi cabo alimwi balasungilizyigwa abamayi bayanda kuti bazwidilile mulwiiyo lwabo.” Basicikolo bali muciimo eeci balakonzya kutalika kuciswa-ciswa akukopana mumizeezo.

Ikuti naa mulalibilika nomubona mbwalibilika mwaneenu akaambo kamilimo yakucikolo, nywebo kumugama amwiinke kucikolo. Amubandike abamayi, basikupa lulayo alimwi abalupati-pati bacikolo. Amubaambile nzyomubona. Mulijisi nguzu zyakucita boobo.

Ibbaibbele likulwaizya bazyali kuti kababikkila maano kuzyintu nzyobacita bana babo nobayaabukomena. Musa wakaambila bazyali bamucisi ca Israyeli kuti: “Muleelede kwaaiyiisya bana banu, akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.”—Deuteronomo 6:7.

Kubikkila kapati maano kulwiiyo lwamwaneenu tacipandululi kuti munjililila twaambo twakwe itutamujatikizyi. Citondezya kuti mulamugwasyilizya mwaneenu. Alimwi eeci cilakonzya kugwasya mwaneenu kuti acesye kulibilika akaambo kamilimo njapegwa kucikolo.

 [Cifwanikiso icili apeeji 8, 9]

 Amubandike abamayi alimwi abasikupa lulayo kujatikizya kulibilika kwamwaneenu