Mulwazi Ulaangulukide Kulisalila

AKALEMBWA ASIKULEMBA SINSIMUKA! WAKU ITALY

▪ Bakamboni ba Jehova balakaka kubikkwa bulowa. Ikukaka kwabo kuyeeme amilawo yamu Bbaibbele iijatikizya bulowa, mulawo iwakusaanguna kupegwa waamba kuti: “Pele tamweelede kulya nyama antoomwe abuumi bwayo, nkokuti bulowa bwayo.” Banakristo bamumwaanda wamyaka wakusaanguna bakaambilwa kuti: “Mulikasye . . . kubulowa.”—Matalikilo 9:4; Incito 15:29; Levitiko 17:14.

Mudolopo lya Monterenzio lili mucisi ca Italy, basicikolo bakusekondali bakaambilwa kuti balembe mulaso waamba bubotu bwakusanga bulowa. Akati kabasicikolo aaba, kwakali umwi wa Bakamboni ba Jehova wiitwa kuti Benedetta, walo wakalemba makani aatobela:

“Bantu banji balizyi kuti Bakamboni ba Jehova balakaka kubikkwa bulowa akaambo kakuti batobela njiisyo zyamu Bbaibbele, pele eeci tacaambi kuti balazikaka nzila zimwi zyabusilisi. Masimpe ngakuti, Bakamboni ba Jehova balabubikkila maano buumi bwabo. Balayanda kapati kuti balo abana babo bajane busilisi bubotu, alimwi balilisungwide kutobela nzyobaamba bamadokotela ikuti naa basilisi aabo kabazilemeka nzyobasyoma.”

Benedetta wakazumanana kulemba kuti: “Mulwazi aumwi ulaangulukide kulisalila busilisi mbwabona kuti mbubotu, weelede kupegwa bulemu alimwi akwaambilwa bubotu abubi bwabusilisi mbwayanda.”

Mutabi wakabunga kalanganya bulowa busangwa kali mudolopo lya Monterenzio ikaitwa kuti AVIS (Association of Italian Blood Donors) kakapa bulumbu kuli basicikolo ibakainda bamwi kulemba mbobalimvwa kujatikizya makani aaya. Imagazini iiyitwa kuti Monterenzio Vivace yakaamba kuti: “Benedetta Barbi wakalumbaizyigwa akaambo kamulaso ngwaakalemba akaambo kakuti wakaliindene kapati ambobayeeya bantu banji—makani ngaakalemba akaliindene kapati ambobazilanga zyintu bakabunga ka AVIS—pele sicikolo ooyu wakaamba nzyasyoma munzila yabulemu alimwi kakunyina kutikila kubbazu lyomwe.”

Nokuba kuti “mbobazibona zyintu Bakamboni ba Jehova kuliindene ambobazibona bantu banji,” bamadokotela banji babona kuti nzyobasyoma Bakamboni kuli mbozigwasya. Nzyobasyoma Bakamboni nzyezyapa kuti basilisi bajane nzila zili mbozibede izipa kuti kakutazwi bulowa bunji ciindi nobaandula muntu. Eeci capa kuti bantu baciswa—Bakamboni abaabo batali Bakamboni—bagwasyigwe. Nokuba boobo, kaambo kapati ikapa kuti Bakamboni ba Jehova kabakaka kubikkwa bulowa kajanika mu Bbaibbele kweelana ambokwatondezyegwa kumatalikilo aacibalo eeci.

Ciindi ciboola mwaakuswaigwa a Bakamboni ba Jehova, amukababuzye kuti, ‘Ino Mulengi waabona buti makani aajatikizya bulowa?’ Bakamboni balilibambilide kuyoovwiila mubuzyo ooyu “amoyo mutete.”—1 Petro 3:15

[Kabbokesi/Cifwanikiso icili apeeji 30]

MAKANI AAMBI

Kwiinda mukugwasyigwa abasyaazibwene, DVD yakuti Transfusion Alternatives ibandika makani aabusilisi alimwi amilawo iijatikizya nzila zimwi zyabusilisi zitabelesyi bulowa. Mulakonzya kwiijana kuli Bakamboni ba Jehova.