‘Ndijisi Zyintu Zinji Zyakucita’

BASIKUZUNDANA kunyamuna zibulo zilema kuzisobano zyakuzundana zyanyika yoonse balainzya ciindi cili mbocibede nobaya basole kunyamuna zibulo zilema kwiinda nzyobanyamuna lyoonse. Basaanguna kulizibizya kunyamuna zibulo zisyoonto, kutegwa babe anguzu zyakunyamuna zibulo zipati. Ikuti nobali kutatanyana kunyamuna zibulo zilema lyoonse, nobali kulibikka muntenda yakunyonganya milambi yabo alimwi aamaswaanganino aazifwuwa, calo icikonzya kupa kuti bacilekelelimwi kunyamuna zibulo.

Mbubwenya buyo, mbomuli basicikolo, andiza mulabeleka canguzu kucikolo. Alimwi nomupegwa milimo iikatazya naa nomulibambila misunko, mulilisungwide kubeleka canguzu. * Pele ino mbuti kuti mazuba oonse mucita buyo milimo yakucikolo? Mulakonzya kwaalilwa kulya kabotu alimwi akutajana ciindi cikkwene cakoona masiku. Mukuya kwaciindi, mulakonzya kuciswa akaambo kakubeleka ciindi coonse, kutalya kabotu alimwi akutajana ciindi cikkwene cakoona. Andiza mbomulimvwide lino. *

Milimo Yakucikolo Iitamani Yalo Iipegwa Kuti Ikacitilwe Kuŋanda

Hiroko, * sicikolo wakucisi ca Japan uujisi myaka yakuzyalwa iili 15 waamba kuti: “Mbondiyaabuya mumagiledi aamujulu, ayalo milimo njobandipa kucikolo yakucitila kuŋanda iyaabuvwula alimwi akukatazya. Kumanizya milimo eeyi kutola ciindi cilamfwu. Ndijisi zyintu azimwi nzyondiyanda kucita, pele ndiyandika kumanizya milimo yakucikolo kutegwa bayi bakailange-lange buzuba butobela. Zimwi ziindi inga ndilalibilika.” Kujatikizya mulimo ngwapegwa kuyoocitila kuŋanda, Svetlana, sicikolo uukkala kucisi ca Russia walo uujisi myaka yakuzyalwa iili 14 wakalemba kuti: “Cilandikatazya kumanizya mulimo wangu ngobandipa bayi kuti nkaucitile kuŋanda. Mwaka amwaka, ziiyo nzyondeelede kwiiya zilavwula alimwi abalo bamayi balandipa milimo minji. Alimwi bayi abamwi babona kuti ciiyo ncobayiisya cilayandika kapati kwiinda ziiyo nzyobayiisya bambi. Cilakatazya kujana ciindi cakuti ndiicite kabotu milimo yoonse.”

Ino nkaambo nzi bamayi ncobapa basicikolo milimo minji yakucitila kuŋanda? Gilberto, uukkala kucisi ca Brazil uujisi myaka yakuzyalwa iili 18 wakalemba kuti: “Bamayi baamba kuti basola kutugwasya kutegwa tukacikonzye kulembwa mulimo nociba ciindi kwakujanika kuti kuli bantu banji ibayandaula mulimo ngomunya ooyo ngotuyanda.” Nokuba boobo, mulakonzya kulimvwa kuti milimo njobamupa bamayi kuyoocitila kuŋanda yavwulisya. Andiza mulakonzya kucesya kulibilika kwiinda mukucinca nzila mbomwiibona milimo njomujisi alimwi akubweza ntaamu yakuzyeendelezya kabotu zyintu.

Amubone kuti, ikuba amilimo minji kumugwasya kuti mukacikonzye kuzwidilila mwaakukomena. Nokuba kuti kuboneka mbuli kuti tamukaleki kucita milimo eeyi, myaka yenu yakwiiya iyoofwambaana kumana kwiinda mbomwali kuyeeyela. Ciindi nomuyootalika kubeleka, muyookkomana akaambo kakuti mwakali kwiimana milimo iikatazya njomwakali kupegwa. ‘Muyoobona bubotu akaambo kakuti mwakabeleka canguzu,’ ciindi nomwakacili kucikolo.—Mukambausi 2:24, NW.

 Mulakonzya kucesya kulibilika kwiinda mukubeleka canguzu alimwi akuzyeendelezya kabotu zyintu. (Amubone kabbokesi kakuti,  “Zyintu Nzyomukonzya Kucita Kutegwa Mucesye Kulibilika.”) Ikuti lyoonse kamufwambaana kumanizya kucita mulimo ngobamupa alimwi akuucita kabotu, inga baakutalika kumusyoma bamayi benu alimwi akuyanda kumugwasya. Amweezeezye buyo kuti mujisi cilongwe cili boobu abayi benu bamwi. Ikuti kwacitika cintu cimwi ncomwatali kulangila mpoonya mwabaambilila limwi kuti tamukakonzyi kuumanizya mulimo muciindi ceelede, sena tamuzumini kuti bayi inga bamulekelela? Daniele umwi wababelesi ba Jehova “waka[li ku]syomeka, alimwi katakwe kampenda nekaba kaambo kali buti ikakajanwa mulinguwe.” Akaambo kakuti Daniele wakali kubeleka canguzu, mwami wakali kumuyanda alimwi akumusyoma. (Daniele 6:4) Ikuti mwaiya Daniele munzila njomucita milimo yakucikolo njobamupa, bayi bayoomufwida luse ciindi nomuyooyandika lugwasyo.

Sena kuswiililisya ciindi nomuli mucikolo, kucita mulimo ngomwapegwa kuyoocitila kuŋanda alimwi akumanizya milimo imbi kulakonzya kupa kuti kulibilika koonse kujatikizya makani aakucikolo kumane? Peepe. Pele kulibilika kumwi kulakonzya kuboola akaambo kakuyanda kuti kamucita kabotu kucikolo. Muciindi cakutaikkomanina milimo yakucikolo, muyoojana kuti muyooyandisisya buya kwiiya alimwi akugwasigwa aziiyo.

Kulibilika kuli boobu kuli kabotu alimwi kulayandika. Nokuba boobo, mulakonzya kulibilika akaambo kazyintu zinyina mpindu zyalo izikonzya kumuletela buyo mapenzi.

Izyintu Zitajatikizyi Ziiyo Zyabapa Kujata Maankamaanka

Amweezeezye muntu uubalisya kapati mootokala. Mpoonya asika azitondezyo zitondezya kuti weelede kwiima ulaajata mabbuleki akwiima. Mpoonya uluulyata alimwi akuulundusya. Ino ncinzi cikonzya kucitika kumootokala wamuntu ooyu weenzya boobu? Ulakonzya kunyonyoona injini alimwi azibeela zimwi zyamootokala. Pele kacitana kucitika eeci, ulakonzya kuujaya kwiinda mukuba muntenda mpati.

Mbubwenya buyo, basicikolo banji balabeleka kapati kabatanatalika kwiiya alimwi anobakotoka. Mubbuku ndyaakalemba lyakuti Doing School, Denise Clark Pope wakaamba majwi aaya ikujatikizya basicikolo banji mbaakayaanya: “Bakali kufwaambana kubuka kutegwa baunke kucikolo kwiinda bapati banji ibaunka kumilimo, alimwi bakali kuccelwa koona akaambo kakusobana bbola, kwiiya kuzyana, kucita miswaangano yatubunga twabasicikolo, kubeleka milimo iivwolwa mali alimwi ayakucikolo njobapegwa kuyoocitila kuŋanda.”

 Ikuti basicikolo kababeleka boobu abuzuba, balakonzya kuliletela mapenzi. Akaambo kakulibilika kapati, balakonzya kuciswa mwida alimwi amutwe. Balakonzya kutalika kuciswa-ciswa akaambo kakuti mibili yabo inga kiitajisi nguzu zyakulikwabila kumalwazi akaambo kakukatala ciindi coonse. Mpoonya balakonzya kwaalilwa kuzumanana kucita zyintu nzyobakali kucita alimwi balakonzya kukatazyigwa kuti babe anguzu nzyobakajisi. Sena cintu cili boobu cilamucitikila?

Cili kabotu kubeleka canguzu kutegwa muzuzikizye mbaakani zigwasya, pele nokuba kuti muli bayumu, kuli zyintu zimwi nzyomutakonzyi kucita mubuzuba. Ibbaibbele lipa lulayo oolu lwabusongo: “Butontozi bwanu abuzibwe kubantu boonse.” (Ba-Filipi 4:5) Muntu mutontozi tasali kucita zyintu zikonzya kumuletela mapenzi naa kupenzya bantu bamwi. Ujisi maano mbuli aamupati alo aayandika kapati munyika yamazuba aano iitakkalikene. Aboobo kutegwa mutalileteli mapenzi aakuciswa-ciswa, mweelede kuba abutontozi—kuleka kucita zyintu zimwi zinyina mpindu.

Kuyandaula Buvwubi

Nokuba kuti butontozi mbube bukonzya kubagwasya kuzuzikizya mbaakani zyabo, ibakubusi bamwi babona mbuli kuti mbobubalesya kuzizuzikizya. Basicikolo aaba basyoma kuti cintu ciyandika kapati kuti muntu azwidilile nkuba amulimo mubotu akuvwola mali manji. Eeyi njemizeezo njaakajana Denise Clark Pope akati kabakubusi mbaakayaanya. Wakaamba kuti: “Aaba basicikolo balombozya kuba aciindi cinji cakoona kutegwa balikwabilile kumapenzi aakuciswa-ciswa, pele tabakonzyi kucita boobo akaambo kakuba azyintu zinji zyakucita, kucikolo, mumukwasyi, alimwi amikuli minji njobajisi kumilimo. Alimwi bakali kulombozya kuba aciindi cinji cakuba abalongwe babo, kucita zyintu zimwi naa kujana mazuba aakulyookezya, pele bunji bwabo bakali kusyoma kuti kucita boobo nokwakapa kuti baleke kucita kabotu kucikolo.  Bakabona kuti beelede kusala akuti buumi bwabo bwakumbele bwakali kuyandika kapati kwiinda lukkomano ndobakonzya kuba andulo kwaciindi cino.”

Basicikolo ibali boobu beelede kulanga-langa ncaakaamba mwaalumi umwi musongo naakati: “Nkaambo nimpindunzi njajana muntu nikuba kuti wavuba nyika yoonse anukuti wanyanzigwa buumi bwakwe? Na ncinzi ncakonzya kupa muntu kuti anunune buumi bwakwe?” (Matayo 16:26) Mumajwi aaya, Jesu Kristo wakacenjezya kuti mbaakani nzyotukonzya kusola canguzu kuzuzikizya munyika iino taziko mpindu akaambo kakuti kucita boobo kulankonzya kutuletela mapenzi aandene-andeene alimwi kulakonzya kunyonganya cilongwe cesu a Jehova.

Mubbuku ndyaakalemba Madeline Levine ilitegwa The Price of Privilege, wakaamba kujatikizya “masimpe aakuti mali, cikolo, nguzu, mpuwo, alimwi alubono tazikonzyi kukwabilila muntu kupenzi lyakubula lukkomano naa kutyompwa.” Denise Clark Pope iwaambwa kale wakaamba kuti: “Ndilabona bana abazyali banji balasolekesya kulondoka akaambo kakuti bayeeya kuti muntu weelede kulondoka kutegwa azwidilile.” Alimwi wakazumanana kwaamba kuti: “Tweelede kuzyiba zyintu ziyandika alimwi akulikwabila kuzyintu zikonzya kutuletela malwazi.”

Kuli zyintu zimwi ziyandika kapati kwiinda mali. Eezyi zibikkilizya kuba amanjezeezya mabotu, kutalibilika, kutaciswa-ciswa akuba acilongwe cibotu a Mulengi wesu. Eezyi nzipego kuzwa kuli Leza. Ikuti naa mwaleka kuzibikkila maano zyintu eezyi akaambo kakuyandisya kuba ampuwo alubono, cilakonzya kumukatazya kuzijana alimwi. Kujatikizya kaambo aaka, amubone Jesu ncaakayiisya: “Bali acoolwe bacete mumuuya, nkaambo Bwami bwakujulu mbubwabo.”—Matayo 5:3.

Ibakubusi banji balizyi kuti kaambo aaka nkamasimpe. Nokuba kuti balakonzya kucita kabotu kucikolo, balizyi kuti lwiiyo abuvwubi kunyina nozikonzya kubapa lukkomano lutamani. Balizyi kuti kusoleka kuzuzikizya mbaakani eezyi mmaliminya. Aaba basicikolo balizyi kuti kuyandaula ‘zyintu zyakumuuya’ nkokukonzya kubapa kuti bakabe abuumi bukkomanisya kumbele. Basikumwaya magazini eeyi naa Bakamboni ba Jehova bakubusena nkomukkala bayookkomana kumutondezya mbomukonzya kuba alukkomano eelyo nomuyandaula zyintu zyakumuuya.

Bupanduluzi buyungizidwe

[Majwi aakwelelezya sikubala aali apeeji 14]

Nokuba kuti muli bayumu, kuli zyintu zimwi nzyomutakonzyi kucita mubuzuba

[Majwi aakwelelezya sikubala aali apeeji 16]

Kuba aluzyibo lwa Mulengi wenu ndolwiiyo iluyandika kapati ndomukonzya kujana

[Kabbokesi/Zifwanikiso izili apeeji 13]

 ZYINTU NZYOMUKONZYA KUCITA KUTEGWA MUCESYE KULIBILIKA

❑ Sena inga cimutolela ciindi cilamfwu kuvwunauna mapepa alimwi amabbuku kutegwa mujane cintu ncomuyandaula? Bantu bamwi bayandika lugwasyo kutegwa kababikka kabotu zyintu. Tamweelede kulisenda kulomba lugwasyo.

❑ Sena mulawayawaya? Amusole kumana mulimo kacitanasika ciindi ncomweelede kuumanizya. Muyoobona mbomuyookatalukwa akukkomana alimwi eeci ciyoomukulwaizya kuti mucileke kuwayawaya kucita mulimo wenu wakucikolo.

❑ Sena ciindi nomuli mucikolo inga mutalika kuyeeya zyintu zimwi muciindi cakubikkila maano? Kwamwezi omwe, amusole kucita eeci: Amuswiililisye kumibandi iicitika mucikolo alimwi akulemba makani kutegwa mukaabelesye kumbele. Muyoogambwa kubona mbociyoomuubila kucita mulimo ngobamupa bayi wakucitila kuŋanda. Eeci ciyoopa kuti mucesye kulibilika akaambo kamilimo yakucikolo.

❑ Sena mwakasala kucita ziiyo zimwi ziyungizidwe kuli zeezyo nzyomweelede kucita cakunga muyandika kubeleka canguzu alimwi akujana ciindi cinji cakuti muzizuzikizye? Sena masimpe mulayandika kuzicita ziiyo eezyi? Amubandike abazyali benu. Amubuzye muntu waalanga kabotu makani aalwiiyo kutegwa mumvwe ncakonzya kwaamba kujatikizya kaambo aaka. Mulakonzya kujana kuti ziiyo eezyo zyakulisalila tazigwasyi kapati mumakani aalwiiyo lwenu.

 [Kabbokesi kali apeeji 6]

Bukwabilizi Bwakuyeeyela

“Imbono zyamuntu muvubi ngumunzi wakwe muyumu; zili mbuli bulambo bulamfu bwakumuvuna [mumizeezo yakwe, NW].” (Tusimpi 18:11) Mumazuba aansiku, bantu bakali kubona kuti bulambo bulamfwu bwakali kukonzya kubakwabilila kuli basinkondonyina. Pele amweezyeezye kuti mukkala mumunzi uujisi bulambo bwakuyeeyela buyo. Nokuba kuti mukonzya kulimvwa kuti mulikwabilidwe, oobu bulambo tabukonzyi kumukwabilila kuli basinkondonyoko.

Mbubwenya mbuli bantu ibakkala mubusena butakwabilidwe, bakubusi bayandaula buvwubi balangilwa kuyootyompwa. Sena muli bazyali? Muyoocita kabotu ikuti mwabagwasya bana benu kweeleba ntenda yakuyandisya lubono alimwi akutakkala mumunzi uujisi bulambo bwakuyeeyela.

Ootu twaambo tuzwa mu Bbaibbele tulakonzya kumugwasya ciindi nomubandika amwaneenu:

▪ Kanji-kanji, mapenzi aaboola akaambo kabuvwubi mmanji ikwiinda yaayo aakonzya kumanizyigwa. “Kukutisya kwamuvubi takumuzumizyi koona.”—Mukambausi 5:12; 1 Timoteo 6:9, 10.

▪ Muntu uucizyi kusala zyakucita, ulakkomana nokuba kuti tavwubide. “Makanze aabasungu alaleta zilyo zinji, pele uufwanzya makani ulajana bucete buyo.”—Tusimpi 21:5; Luka 14:28.

▪ Ikuba amali ngotukonzya kubelesya kuula zyintu ziyandika kapati mubuumi bwesu kupa kuti tukkutile. “Utandipi bucete nanka buvubi”—Tusimpi 30:8. *

Bupanduluzi buyungizidwe

 [Zifwanikiso izili apeeji 15]

Mulimo ngobamupa kuti mukacitile kuŋanda AMUUBONE kuba cibeela calwiiyo iluyoomugwasya mwaakutalika kubeleka

[Zifwanikiso izili apeeji 15]

Ikusoleka kucita zyintu zinji kulakonzya kumulesya kuzuzikizya mbaakani zyenu