Sena Bantu Babi Baya Kupya Mulilo Uutamani?
Ncolyaamba Ibbaibbele
Sena Bantu Babi Baya Kupya Mulilo Uutamani?
GERTRUDE mukambausi wakucikombelo ca Pentecost wakali kusyoma kuti bantu babi baya kupya mumulilo uutamani. Tiicakali kumukkomanisya kumvwa muntu waamba kuti bantu babi tabakapyi mulilo uutamani, akaambo kakuti eeci tiicakali kweendelana anzyaakali kusyoma. Wakali kuyeeya kuti, ikuti naa kunyina mulilo uutamani nkokuti bantu babi tabakasubulwi pe. Gertrude wakazumanana kusyoma kuti bantu babi baya kupya mulilo uutamani. Wakaamba kuti: “Inga tiindayanda kumukomba Leza ikuti bantu babi tabakapyi mulimo uutamani.”
Sena bantu babi baya kupya mulimo uutamani kweelana ambobayiisya muzikombelo zinji? Ikuti naa tabakapyi, ino ncisubulo nzi ncobayoopegwa?
Ciindi Cakusaanguna Leza Ncaakasubula Bantu Babi
Kweelana ancolyaamba Bbaibbele, Leza naakalenga bantu bobilo bakusaanguna, bakali londokede. (Matalikilo 1:27; Deuteronomo 32:4) Wakababikka mumuunda wa Paradaiso akubapa coolwe cakupona kukabe kutamani. Nokuba boobo, Leza wakakasya Adamu a Eva kucita cintu comwe. Leza wakabacenjezya kuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.”—Matalikilo 2:16, 17.
Nokuba boobo, bazyali besu bakusaanguna tiibakamumvwida Leza. Aboobo, Mulengi wakabapa cisubulo calufwu. “Uyoolya insima cakufwa mitukuta mane ukapiluke kunyika, nkaambo mulinjiyo mowakagwisigwa, nkaambo uli bulongo buyo, akooko kubulongo nkoelede kupiluka.”—Matalikilo 3:19.
Ikuti naa Leza wakali kuyanda kusubula Adamu Eva mumulilo uutamani, tee naakabaambila? Masimpe ngakuti, Leza tanaakaamba kuti bayoopenzyegwa baakufwa. Ino mbuti mbobakali kukonzya kupenga mbwaanga tiibakajisi cintu cili coonse cakali kukonzya kuzumanana kupona nobakafwa? Ibbaibbele lilakasalazya kaambo aaka nolyaamba kuti: “Muntu uubisya, ngonguwe uuyoofwa.”—Ezekiele 18:4. *
Mbwaanga Leza ngo Mulengi alimwi nguutupa buumi, ulizyi cicitika muntu afwa. Mujwi lyakwe utwaambila kuti “bafwide tabezi cintu niciba comwe.” (Mukambausi 9:5) Nkakaambo kaako Adamu a Eva nobakafwa tiibakali kukonzya kumvwa kucisa mumulilo uutamani. Bakajokela kubulongo nkokuti bakaleka kupona. Taaku ‘cintu nociba comwe ncobakazyi’.
Sena Tulakonzya Kupenga Ikuti Twafwa?
Kulugwalo lwa Ba-Roma 5:12, Ibbaibbele lyaamba kuti: “Cibi cakanjila munyika kumaanza aamuntu omwe buyo, alwalo lufwu nkaambo kacibi, nkabela mbubonya obo lufu mbulwakazida bantu boonse.” Sena inga ceelela kusyoma kuti bantu balapenzyegwa akaambo kazibi zyabo mumulilo uutamani ikuti naa Adamu walo iwakaleta lufwu kubantu boonse wakaba buyo bulongo ciindi naakafwa?—1 Ba-Korinto 15:22.
Toonse tulajatikizyigwa acisubulo ncaakapegwa Adamu. “Cakuvola cazibi ndufu.” Kuyungizya waawo, muntu nafwa, ‘ulaangununwa kumulandu wazibi.’ (Ba-Roma 6:7, 23) Ikuti naa bantu boonse, ibabotu ababi nobafwa tabapengi, ino Leza uyoobasubula buti basizibi?
Bululami bwa Leza
Makanze aa Leza kujatikizya bantu bamumvwida kunyina naakacinca kuzwa ciindi naakalenga banabukwetene bakusaanguna akubaambila kuti bazyale bana akuzuzya nyika alimwi akwiilanganya. (Matalikilo 1:28) Asunu tulizyi kuti aaya ngamakanze ngajisi, nkaambo nokwakainda ciindi wakazyi kwaamba kuti: “Balulami bayookona nyika, bayookala alinjiyo lyoonse.”—Intembauzyo 37:29
Amubone kuti lugwalo oolu lwaamba kuti balulami baya kukkala anyika ino. Bayoopona calukkomano kakunyina kuciswa. Makanze aa Leza aakuti nyika ikkalwe abantu baluleme ‘ayoozuzikizyigwa.’ Eeci ciya kucitika aakunyonyoona bweende bwazyintu bubyaabi ibuliko lino akuleta nyika mpya yabululami.—Isaya 55:11, Daniele 2:44; Ciyubunuzyo 21:4.
Tuulunzuma twabantu ibakafwa kabatazyi nzyayanda Leza bayoobusyigwa akuyiisyigwa zyintu ziyandika kutegwa bakakkale munyika mpya ya Leza. (Isaya 11:9; Johane 5:28, 29) Kulubazu lumwi, aabo ibayookaka kutobela milawo ya Leza bayoonyonyoonwa ‘mulufwu lwabili.’ Eeci caamba kuti kunyina nobayoobusyigwa alimwi.—Ciyubunuzyo 21:8; Jeremiya 51:57.
Masimpe, mbwaanga Jehova ngu Leza waluyando kunyina naya kuumpa bantu mumulilo uutamani. (1 Johane 4:8) Alimwi kunyina nayoolekelela kuti bubi buzumanane. Aboobo lugwalo lwa Intembauzyo 145:20 lutwaambila kuti: “Jehova ulabamba boonse bamuyandisya, pele basizibi boonse ulabanyonyoona.” Inzya, Jehova mululami alimwi ulatuyanda.
Bupanduluzi buyungizidwe
^ munc. 8 Ibbaibbele talyaambi kuti ‘muntu muumi’ ulaacibeela citalibonyi alimwi citafwi. Lugwalo lwa Matalikilo 2:7 lwaamba kuti: “Jehova Leza wakabumba muntu. Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi.” Aboobo, Adamu kunyina naakapegwa cintu cimwi caandene amubili wakwe. Pele walo kumugama wakaba muumi.
SENA KULI NOMWAKALIBUZYIDE KUTI?
▪ Ino ncinzi cicitika muntu afwa?—Matalikilo 3:19.
▪ Ino bafwide bali muciimo nzi?—Mukambausi 9:5.
▪ Ino mbuti Leza mbwaya kubasubula babi?—Intembauzyo 145:20.
[Majwi aakwelelezya sikubala aali apeeji 27]
“Bafwide tabezi cintu niciba comwe.”—Mukambausi 9:5