Nzila Yabili: Kulyaaba

“Abo mbaakakakatizya Leza muntu atabapambukanyi.”—Matayo 19:6.

Ncocaamba eeci. Banabukwetene ibazwidilila balizyi kuti tabeelede kulekana. Ikuti kwaba mapenzi, balasoleka canguzu kwaamana muciindi cakulekana. Ikuti aumwi wabo kalyaabide kumweenzinyina, banabukwetene balasyomana. Aumwi wabo usyoma kuti mweenzinyina uyakuzumanana kulemeka lukwatano lwabo.

Ino nkaambo nzi ncociyandika eeci? Ikulyaaba ncintu ciyandika kapati mulukwatano. Nokuba boobo, ikuti mazwanga avwulisya, banabukwetene balakonzya kulimvwa mbuli kuti kulyaaba mulukwatano mbuzike buya ikutali kukubona kuti ncintu ciyandika. Mukuya kwaciindi majwi aakuti “tuya kukkala limwi kusikila lufwu lukatwaandaanye,” alakonzya kubapa kulimvwa mbuli kuti baangilidwe buya, aboobo inga balombozya kujana nzila zyakuti balekane. Nokuba kuti tabakonzyi kulekana caantangalala, balakonzya kulekana munzila zimwi—mucikozyanyo, balakonzya kuleka kwaambauzyanya muciindi cakubandika kujatikizya mapenzi ngobajisi.

Amusole nzila eeyi. Kwiinda mukubelesya mibuzyo eeyi iitobela amulilingule kutegwa mubone naa mulilyaabide kulukwatano lwenu.

▪ Ciindi notuzwangana, sena inga ndiyeeya kuti ndakalubizya kukwata naa kukwatwa kumuntu ooyu?

▪ Sena kanji-kanji inga ndilombozya kuba amuntu umwi ikutali ngotukwetene limwi?

▪ Sena zimwi ziindi ndaambila ngotukwetene limwi kuti, “ndakusiya” naa “ndiyakujana umbi uundiyanda”?

Amusale cakucita. Amuyeeye cintu comwe naa zyobile nzyomukonzya kucita kutegwa muyumye cilongwe cenu angomukwetene limwi. (Mucikozyanyo: Mulakonzya kumulembela kagwalo ngomukwetene limwi, kubikka zifwoto zyamukaintu naa mulumi wenu kuncito, naa kumutumina luwaile abuzuba nomuli kuncito, kutegwa mumwaanzye buyo.)

Mulakonzya kuyeeya nzila azimbi, mpoonya amumubuzye ngomukwetene limwi kuti aambe nzila zikonzya kumukkomanisya.

[Cifwanikiso icili apeeji 4]

Kulyaaba kukwabilila lukwatano lwenu mbubwenya mbuli zibulo zibikkidwe mumabali aamugwagwa mbozikwabilila myootokala kuti itazwi mumugwagwa

[Kulumba]

© Corbis/age fotostock