Ncolyaamba Bbaibbele

Sena Muntu Ulakonzya Kubayanda Basinkondonyina?

Jesu Kristo wakaamba kuti: “Ndamwaambila kuti, amuyande basinkondonyoko, amubakombele bamupenzya, kuti mube bana bakwe Usowanu uuli kujulu, nkaambo ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.”—Matayo 5:44, 45.

SENA bukombi bupa bantu kuyandana akukkala muluumuno naa kuti buleta buyo kusulaikana alimwi amanyongwe? Mazuba aano ibanji babona kuti bukombi mbobupa bantu kutamvwana, ikapati ikuti bwanjila mutwaambo twacisi, mukusalaulana musyobo naa kuyandisisya cisi. Pele, kweelena amajwi aa Jesu, ‘ibana ba Leza’ beni-beni baiya Leza mukuyanda bantu—kubikkilizya abasinkondonyina.

Aumwi mubelesi wa Leza wakaamba kuti: “Anooli sinkondonyoko wafwa inzala, umusanine; afwa nyota, umunywisye . . . Utazundwi kububi pe, uzunde bubi kukucita bubotu.” (Ba-Roma 12:20, 21) Pele sena muntu inga wakonzya kutondezya luyando luli boobu munyika iino munyina lukamantano? Cakusinizya, Bakamboni ba Jehova baingula kuti ‘inzya’! Amubone cikozyanyo ca Jesu abasikumutobela bakusaanguna.

Bakali Kuyanda Basinkondonyina

Jesu wakali kuyiisya kasimpe kujatikizya Leza alimwi bantu banji bakali kukkomana kumuswiilila. Nokuba boobo bantu bamwi bakali kumukazya akaambo kakuti tiibakaninga kumuswiilila naa akaambo kakuyungwa abasinkondonyina Jesu. (Johane 7:12, 13; Incito 2:36-38; 3:15, 17) Pele Jesu wakazumanana kukambaukila bantu boonse mulumbe uupa buumi, kubikkilizya abasikumukazya. (Marko 12:13-34) Ino nkaambo nzi? Nkaambo wakalizyi kuti bamwi balakonzya kucinca bukkale bwabo, ikumuzyiba kuti ngo Mesiya alimwi akutalika kupona kweelena akasimpe kali mu Jwi lya Leza.—Johane 7:1, 37-46; 17:17.

Amasiku, bantu ibakajisi zilwanyo nibakamujata Jesu, wakatondezya kuti wakali kubayanda basinkondonyina aaba. Mane wakaponya sinkondonyina ooyo Petro ngwaakazutula kutwi apanga. Aciindi eeci, Jesu wakaamba njiisyo iiyandika kapati iibasololela basikumutobela kusikila asunu. Wakaamba kuti: “Boonse babweza ipanga bazoovwinyaunwa kupanga.” (Matayo 26:48-52; Johane 18:10, 11) Nokwakainda myaka iili 30, Petro wakalemba kuti: “Kristo alakwe wakamucisilwa, wakamusiila cibonesyo, kuti mukatobele mumikondo yakwe. . . . Naakapenzegwa takakabbodola, pe, pele makani aakwe wakaasia mumaanza aa [Leza].” (1 Petro 2:21, 23) Cakutadooneka, Petro wakalizyi kuti basikutobela Kristo beni-beni beelede kutondezya luyando, ikutali kupilusya cibi kucibi.—Matthew 5:9.

Boonse ‘ibatobela mumikondo ya Jesu’ balatondezya luyando aluzyalo mbuli nguwe. Ilugwalo lwa 2 Timoteo 2:24 lwaamba kuti: “Muna-Mwami teelede kulwana pe, uleelede kuba mutete-moyo kubantu boonse, . . . akubosya moyo.” Munakristo ulatondezya bube oobu kwiinda mukuba aluumuno akumvwana abantu.

“Bangambela ba-Kristo” Basiluumuno

Paulo wakalembela basyominyina kuti: “Lino tuli bangambela ba-Kristo . . . Tulamukombelezya muzina lya-Kristo kuti, Amuyanzanye a-Leza.” (2 Ba-Korinto 5:20) Bangambela tabatoli lubazu mutwaambo twazisi mobabelekela. Mulimo wabo ngwakwiiminina mfwulumende yacisi cankobazwa.

Ncimwi buyo abangambela ba Kristo alimwi abatumwa bakwe. Balizyi kuti Jesu Mwami alimwi basumpula Bwami bwakwe bwakujulu kwiinda mukukambauka makani mabotu caluumuno. (Matayo 24:14; Johane 18:36) Aboobo Paulo wakalembela Banakristo bamumazuba ngaakali kupona kuti: “Kulwa kwesu takweensi kwaansi pe, nkaambo zintu zyesu zyakulwisya tazyeensi  zyabantu buyo, nzyanguzu zya-Leza zyakumwaisya . . . miyeeyo yoonse azintu zyoonse zili buti zilisumpula cakulwisya luzibo lwa-Leza.”—2 Ba-Korinto 10:3-5; Ba-Efeso 6:13-20.

Ciindi Paulo naakalemba majwi aaya, Banakristo bakali kupenzyegwa mumasi manji. Mubwini, abalo bakali konzya kujola cibi kuli baabo ibakali kubapenzya. Pele muciindi caboobo, bakazumanana kubayanda basinkondonyina alimwi bakali kukambauka kubantu boonse ibakali kuyanda kuswiilila mulumbe waluumuno. Ibbuku litegwa Encyclopedia of Religion and War lyaamba kuti: “Basikutobela Kristo bakusaanguna bakakaka kutola lubazu munkondo amumilimo yabusikalumamba,” nkaambo bakalizyi kuti eezyi “tazyeendelani abukkale bwaluyando mbobakaiya kuli Jesu, amalailile aakuti kabayanda basinkondonyina.” *

Mbubwenya mbuli Banakristo bakusaanguna, Bakamboni ba Jehova balizyi kuti Jesu Mwami wabo. Alimwi balizyi kuti ngo Mwami wa Bwami bwa Leza—imfwulumende yakujulu iiya kuleta luumuno lutamani akuliiba anyika ino-ino. (Daniele 2:44; Matayo 6:9, 10) Aboobo, mbobali bangambela abatumwa, baambilizya kujatikizya Bwami oobu. Kuyungizya waawo, balasolekesya akuba basicisi babotu mumasi mobakkala, balabbadela mitelo alimwi balaitobela milawo ikuti kiitakazyanyi amilawo ya Leza.—Incito 5:29; Ba-Roma 13:1, 7.

Cuusisya ncakuti, mbubwenya mbucakabede aku Banakristo bakusaanguna, Bakamboni zimwi ziindi balabejekezyegwa alimwi akupenzegwa. Nokuba boobo, kunyina nobajolela muntu cibi. Muciindi caboobo, basola kukkala “abantu boonse caluumuno,” kabasyoma kuti basikubakazya bamwi balakonzya kutalika ‘kuyanzana a-Leza’ akuba abulangizi bwabuumi butamani. *—Ba-Roma 12:18; Johane 17:3.

Bupanduluzi buyungizidwe

SENA KULI NOMWAKALIBUZIDE KUTI?

▪ Ino Banakristo beelede kubacitila buti basinkondonyina?—Matayo 5:43-45; Ba-Roma 12:20, 21.

▪ Ino Jesu wakacita buti ciindi naakali kupenzyegwa?—1 Petro 2:21, 23.

▪ Ino nkaambo nzi Banakristo bakusaanguna ncobakaisulide nkondo?—2 Ba-Korinto 5:20; 10:3-5.