Zikozyanyo Zyamikwasyi Iyazwidilila—Cibeela Cakusaanguna

Mbuli mbokwatondezyegwa mu Sinsimuka! eeyi yaalubazu, mikwasyi iizwidilila zimwi ziindi ayalo ilaba amapenzi. Eeci tacigambyi nkaambo tupona muziindi izyaambwa mu Bbaibbele kuti “ziindi zikatazya.” (2 Timoteo 3:1) Mumikwasyi yoonse kulaba mapenzi aasiyene-siyene.

Pele mutalubi kuti, ikuzwidilila takubooli akaambo kakubula mapenzi pe. Mukwiimpana, Jesu wakaamba kuti: “Bali acoolwe bacete mumuuya.” (Matayo 5:3) Mikwasyi iibikkila maano kuzyintu zyakumuuya kwiinda mukutobela njiisyo zyamu Bbaibbele yazwidilila nokuba kuti ilacitikilwa mapenzi. Amubone zikozyanyo.

Kulela Mwana Uulemene. Ibbaibbele lilaamba mbokuyandika kapati kubabamba kabotu banamukwasyi, kubikkilizya abaabo ibayandika kubikkilwa maano kapati. Lyaamba kuti: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumina.”—1 Timoteo 5:8.

Apeeji 15, ba Victor, ibakkala ku South Africa baluula mbuli balo abakaintu babo mbobabamba mwanaabo mulema kwamyaka iinda ku 40.

Kulelwa abantu bambi kuzwa kubwana. Injiisyo zyamu Bbaibbele zilakonzya kugwasya muntu kulimvwa kuti ulayandika—nokuba kuti bazyali bakwe bakamusowa. Inzya, Ibbaibbele lyaamba kuti Jehova Leza ‘ulabagwasya’ bamucaala.—Intembauzyo 10:14.

Apeeji 16, ba Kenyatta, ibakaintu bakkala ku United States, baamba cabagwasya kuliyumya mubuumba mbobajisi akaambo kakuti tababazyi bazyali babo beni-beni.

Kuliyumya mumapenzi aakufwidwa muzyali. Ikufwidwa muzyali ncintu cicisizya moyo kapati. Ibbaibbele lilakonzya kugwasya. Sikwaanza Bbaibbele, Jehova, ngu “Leza siluumbulizyo loonse.”—2 Ba-Korinto 1:3.

Apeeji 17, ba Angela, ibakkala ku Australia, bapandulula mbuli cilongwe cabo a Leza mbocabagwasya kuliyumya mumapenzi aakufwidwa muzyali.

Mikwasyi yoonse ilijisi mapenzi. Mbuli zibalo zitobela mbozitondezya, aabo batobela njiisyo zyamu Bbaibbele bajana nzila zibagwasya kuliyumya mumapenzi aabasikila.

 [Kabbokesi/Zifwanikiso izili apeeji 15]

Mbondibamba Mwanaangu Uulemene

Akaluulwa aba Victor Maynes, ibakkala ku South Africa

“Kuzwa ciindi Andrew naakazyalwa, tulamusamika, kumusanzya alimwi zimwi ziindi tulamusanina. Lino ulaamyaka iili 44.”

TWAKABONA kuti kuli cilubide akaambo kakuti Andrew tanaakaninga kutalika kweenda naakakkwanya mwaka omwe. Aciindi mpoonya aawa wakazikuyuminina. Cakufwambaana, twakamutola kucibbadela, eelyo bakaakutwaambila kuti ulaamaafwa naa bulwazi bwakusuntuka. Pele oobu tiibwakali mbobulwazi bolikke mbwaakajisi. Naakapimwa alimwi kwakajanika kuti boongo bwakwe tabuli kabotu.

Notwakasola nzila zyabusilisi zisiyene-siyene, Andrew wakaleka kuyuminina. Kwaciindi cili mbocibede, wakali kupegwa misamu yamisyobo yone ziindi zyotatwe abuzuba. Pele penzi eeli lyakuboongo talikonzyi kusilikwa amisamu pe. Nociba ciindi cino kajisi myaka yakuzyalwa iili 44, boongo bwakwe bubeleka mbuli bwamwana uujisi myaka yosanwe naa illi cisambomwe.

Bamadokotela bakali kutukulwaizya kuti Andrew tumutole kuŋanda nkobalela bantu balemene, pele tiitwakazumina kucita boobo. Twakali kukonzya kumubamba mwaneesu, aboobo twakasala kumulela nokuba kuti mulimo ooyu wakali kunookatazya.

Aboobo, toonse mumukwasyi tulamulanganya Andrew. Ibana besu bambi ibakacili aŋanda—basimbi bobile amusankwa omwe—bakali kugwasilizya kapati alimwi ndilabalumba lyoonse. Alimwi mbotuli Bakamboni ba Jehova, basyomima bamumbungano bakali kutugwasya kapati. Zimwi ziindi bakali kutupa zyakulya akumubamba Andrew swebo twaunka mukukambauka naa notwakali kucita milimo imbi.

Lyoonse tulaayeeya majwi ali kulugwalo lwa Isaya 33:24, aatusyomezya kuti bumwi buzuba, “takukooyooba naba omwe akati kabantu banyika uuamba kuti, Ndaciswa.” Tulaalusyomo lwakuti Leza uyakwaazuzikizya makanze aakwe aakuleta nyika mpya alimwi akwaamanina limwi malwazi oonse. (2 Petro 3:13) Aboobo, tulangila buzuba Andrew nayakuba kabotu. Kwaciindi cino, tulaasyoma majwi aa Jesu aakuti ikuti naa twasaanguna kuyandaula Bwami bwa Leza mubuumi bwesu, tunoojisi zyintu zyoonse nzyotuyandika. (Matayo 6:33) Twalibonena ameso Leza mbwatupa zyintu nzyotuyandika. Tatubuli kantu pe.

Mubwini tabali boonse ibacikonzya kulanganya wamumukwasyi uuciswa-ciswa aŋanda. Kulindinywe nomwakasala kucita boobu, cakusaanguna ndimukulwaizya kuti kamupaila lyoonse. (1 Petro 5:6, 7) Cabili, mweelede kumuyanda kapati mwaneenu, alimwi mutani kuboni mbuli kuti takonzyi kwiiya kujatikizya Leza. (Ba-Efeso 6:4) Catatu, amubabikkilizye banamukwasyi boonse kuti bagwasilizye. Cane, amuyeeye kuti nkuuŋanda yenu nkwakonzya kujana bantu bamuyanda kapati. Nokuba boobo, bukkale buliimpene. Pele swebo tulikkomene kuti twakasala kumulela Andrew. Kulindime, ngomwana uuyandwa kapati—imwaalumi uuyandwa kwiinda.

 [Kabbokesi/Zifwanikiso izili apeeji 16]

Kulelwa Abantu bambi

Akaluulwa aba Kenyatta Young, ibakkala ku United States

“Ikuti koli muzyaanyina naa mwana wakujana, mbubo nkaambo ukkala abanyoko naa bauso ibakuzyala. Pele cilisiyene ikuti naa ulelwa aabantu bambi buyo. Tandizyi naa ndakakozya bani.”

TANDIBAZYI bamaama abataata bandizyala. Kabamitide ndime, bamaama bakali kunywa kapati bukoko alimwi akubelesya misamu iikola. Nendakazyalwa, bakanditola kuŋanda nkobalelela bana ibanyina bazyali alimwi ndakakkala kumaanda manji amusyobo ooyu kabatana kundibwezya bantu ibakandikomezya. Bakandibweza kanditana kukkwanya myaka yakuzyalwa yobile.

Bataata ibakandikomezya baamba kuti ciindi mukaintu iwakali kubeleka kuŋanda nkobalelela bana ibanyina bazyali naakabatondezya cifwoto cangu bakayanda kuti bandibweze. Mpoonya-mpoonya ndakabayanda bamaama bapya. Ndakabaambila kuti mbaamaama alimwi akuti ndakali kuyanda kuunka kuŋanda ambabo.

Ndilayeeya kuti nindakacili mwana ndakali kulibilika kuti andiza inga ndalubizya aboobo inga bandijola nkobakandijana. Ndakali kuyeeya kuti tandeelede kucita macece naa kuciswa mbuli mbubacita bana bamwi. Ndakali kuyoowa nokuba kuciswa syini. Bazyali bangu bakali kundaambila lyoonse kuti balandiyanda alimwi kunyina nobakali kukonzya kundisiya.

Nociba ciindi cino kandili mupati, zimwi ziindi ndilakatazigwa amizeezo yakuti ambweni tandiyandwi mbuli bana bakakomezyegwa abazyali babo beni-beni. Ndatiizyibile-zyibile, bantu bandaambila kuti, “Kolumba lyoonse nkaambo ujisi bazyali babotu kapati balo ibakalyaaba kukubweza!” Kulumba kwalo ndilalumba, pele majwi aali mbuli yaaya andipa kulimvwa kuti kuli cilubide kulindime alimwi akuti muntu weelede kusolekesya buya kutegwa akonzye kundiyanda.

Cilandiyumina kuzumina kaambo kakuti ndiza tandikabazyibi akubazyiba bataata beni bandizyala. Zimwi ziindi cilandicisa nondiyeeya kuti bamaama tiibakaleka kunywa bukoko akubelesya misamu iikola kutegwa bacikonzye kundilela, mbuli kuti tiindakali kuyandika. Zimwi ziindi balandeetezya. Kanji-kanji inga ndiyeeya kuti, ikuti naa tukayaane, ndiyakubaambila kuti ndakazwidilila mubuumi alimwi tabeelede kulimvwa bubi akaambo kakuti bakandisowa.

Bazyali bangu ibakandikomezya Mbaakamboni ba Jehova, alimwi cipego ciinda kubota ncobakandipa nduzyibo luzwa mu Bbaibbele. Lyoonse ndilakulwaizyigwa amajwi aalembedwe ku Intembauzyo 27:10 aakuti: “Taata abaama nebandisia, Jehova ulandibamba.” Masimpe eeci ncicakandicitikila. Alimwi kuli bubotu mbondakajana mukulelwa. Mucikozyanyo, ndilanoneezyegwa kapati kubona bantu mbobapona, andiza cili boobu akaambo kakuti tanduuzyi mukwasyi wangu wini-wini. Ndilabayanda bantu, alimwi eeci ncecintu ciyandika kapati mumulimo wa Bunakristo wakukambauka. Kuba umwi wa Bakamboni ba Jehova alimwi akukambauka makani aamu Bbaibbele kundipa kulimvwa kuti ndili muntu alimwi kundigwasya kuzyiba ncondiponena. Ikuti naa ndatyompwa, ndilaunka kuyakugwasya bantu. Kuyiisya bantu kujatikizya Bbaibbele, kwandipa kupanga cilongwe ambabo. Aumwi muntu ulacitikilwa zyintu zibotu mubuumi nzyakonzya kwaambila bamwi.

 [Kabbokesi/Zifwanikiso izili apeeji 17]

Kuliyumya Kuti Mwafwidwa Muzyali

“Nibakafwa bataata, ndakamvwa mbuli kuti bukwabilizi boonse mbondakajisi bwamana. Bataata balo ibakazyi nzyintu zyoonse alimwi ibakali kundicitila zyintu zyoonse mubuumi bwangu tiibakaciliko.”

Akaluulwa aba Angela Rutgers, ibakkala ku Australia

BATAATA bakafwa ciindi nindakali mukubusi, myaka iili kkumi yainda. Myezi iili cisambomwe kabatanafwa, bakaandulwa kucibbadela alimwi kabacili mumalo, badokotela bakatwaambila kuti kunyina cimwi ncobakali kukonzya kucita. Bamaama bakayandisya kuzyiba cini ncobakali kupandulula badokotela, mupati wangu musankwa walo wakanetuka, alimwi mebo ndakapengana kapati mumizeezo. Nikwakainda myezi iili cisambomwe, bataata kafwa.

Aciindi eeci, ndakapegana kapati mumoyo. Ndakali kuyanda kuti beenzuma bazyibe mbondakali kulimvwa, pele tiindakali kuyanda kuti kabandicita mbuli kuti ndilipengede. Aboobo, ndakasolekesya kusisa bwini mbundakali kulimvwa. Kulubazu lumwi, ndakali kuyeeya kuti ikuti kandiyanda kuba antoomwe abeenzuma, nkokuti ndakeelede kulicengeezya kuti zyintu zyoonse zili buyo kabotu. Ndakkala ansi kuyeeya, inga ndiyeeya mbubakandikkazikila moyo beenzuma.

Sena ambuli sunu ndilalipa mulandu akaambo kalufwu lwaba Taata? Inzya, ndilacita oobo. Inga ndilombozya kuti niinga ndakali kubaambila lyoonse kuti, “Ndilamuyanda.” Niinga ndakali kubakumbata ciindi aciindi alimwi akujana ciindi cinji cakuba ambabo. Nokuba kuti ndilalyaambila kuti tabusyi mbobanga bayanda kuti kandilimvwa oobu, pesi cicindikatazya.

Mbondili umwi wa Bakamboni ba Jehova, ndilaumbulizyigwa kapati ciindi nondibala zisyomezyo zyabubuke izilembedwe mu Bbaibbele. (Johane 5:28, 29) Inga ndiyeeya buyo mbuli kuti bataata bakaunka amusinzo mulamfwu pele baya kujokela kuŋanda nokuba kuti buzuba bwini tabuzyibidwe. Cigambya ncakuti, nibakafwa bataata, tiindakali kukulwaizyigwa ciindi bantu nibakali kundaambila kuti “Bauso bayakubuka alimwi.” Ndakali kuyanda kuti ‘bataata baboole ndemunya liya.’ Pele cikozyanyo cakuba mumusinzo mulamfwu cakandigwasya kapati. Cakali kutondeka kububuke, alimwi candigwasya kuliyumya mukusweekelwa ooku.

Banakristoma bandigwasya kapati. Ndilayeeya muntu umwi wakandaambila kuti tanaakali kulimvwa kabotu kwaamba zyalufwu lwabataata pele lyoonse wakali kutuyeeya, mebo alimwi amukwasyi wangu. Ndakali kwayeeya majwi aakwe aaya lyoonse. Akandigwasya ikapati ciindi nokwakanyina muntu waamba cili coonse, nkaambo akandipa kuzyiba kuti nokuba kuti bantu tabaambi cili coonse, balandiyeeya mebo alimwi amukwasyi wangu. Eeci cakandikulwaizya kapati.

Nikwakainda myezi yone kuzwa ciindi nibakafwa Bataata, Bamaama bakatalika kutola lubazu kapati mumulimo wakukambauka, alimwi ndakabona kuti bakali kujana lukkomano kapati mukucita boobu. Aboobo, ndakatalika kuunka ambabo. Cilagambya kubona mbuli kugwasya bantu mbokugwasya muntu kuliyumya. Eeci cayumya lusyomo lwangu mujwi lya Leza amuzisyomezyo zyakwe, alimwi cindigwasya kuti nditanikubikkili buyo maano kubuumba bwangu.