Sena Lukwatano Lwenu Inga Lwabambululwa?

Bamukamwini ŋanda babona kuti ŋanda yabo iyanda kuwa, pele basala kuti baibambulule.

SENA andinywe mbomuyanda kucita oobo kulukwatano lwenu? Ikuti naa mboobo, ino mukonzya kutalikila aali? Amusole nzila eezyi zitobela.

1 Amusale cakucita.

Amupangane angomukwetene limwi kuti muyakubelekela antoomwe kutegwa kube luumuno alimwi mulukwatano lwenu. Amuzilembe zyintu nzyomwasala kucita. Ikuti nyoonse nyobilo mwabikkila maano kulukwatano lwenu, muyakubelekela antoomwe kubambulula lukwatano lwenu.—Mukambausi 4:9, 10.

2 Amulizyibe penzi.

Ino ncinzi canyonganya lukwatano lwenu? Mumuzila omwe, amulembe zyintu zyeelede kucitika mulukwatano lwenu pele nzyomutaciti naa zyintu nzyomuyanda kuti zicince. (Ba-Efeso 4:22-24) Amuzyibe kuti, icintu ncomwabona kuti ncecileta mapenzi mulukwatano cilakonzya kwiindana ancaabona ngomukwetene limwi.

3 Amulibikkile mbaakani.

Mumyeezi iili cisambomwe iiboola, ino muyanda kuti kamusikide aali mukubambulula lukwatano lwenu? Ino nkucinca kuli buti nkomuyanda kubona mumyeezi eeyi? Amwiilembe mbaakani yenu. Kuzizyiba kabotu zyintu nzyomuyandika kucita, kuyakupa kuti cimuubile kuzuzikizya mbaakani yenu.—1 Ba-Korinto 9:26.

 4 Amutobele lulayo lwamu Bbaibbele.

Mwamana kulizyiba penzi ndyomujisi akucinca kuyandika, amutobele lulayo lwamu Bbaibbele. Injiisyo zyamu Bbaibbele zilabeleka lyoonse. (Isaya 48:17; 2 Timoteo 3:17) Mucikozyanyo, Ibbaibbele limukulwaizya kuti nywebo angomukwetene limwi kamulekelelana. Inzya, Bbaibbele lyaamba kuti ncibotu ‘kuyandisya kulekelela milandu.’—Tusimpi 19:11; Ba-Efeso 4:32.

Nokuba kuti kumatalikilo zyintu ziboneka mbuli kuti tazicinci, mutatyompwi pe! Ibbuku litegwa The Case for Marriage lyaamba buvwuntauzi bumwi bukulwaizya, ibwakatondezya kuti: “Cilagambya kuzyiba kuti: bunji bwabanabukwetene (86 pesenti) ibazumanana kukkala antoomwe nokuba kuti bajisi mapenzi mulukwatano lwabo bajana kuti, kwainda myaka yosanwe, bakkala kabotu.” Nobaba banabukwetene ibatali kukkala kabotu mulukwatano bajana kuti zyintu zyacinca, lino bakkala kabotu.

Ambweni oobo mbocibede akulindinywe. Basikumwaya magazini eeyi, Bakamboni ba Jehova, bajana kuti mu Bbaibbele kujanika njiisyo zigwasya kubanabukwetene. Mucikozyanyo, banabukwetene banji bakkala kabotu ikuti boonse bobilo kabajisi luzyalo, kabali batete moyo alimwi kabalekelelana amoyo woonse. Bamakaintu bazyiba mbokugwasya kuba amoyo “mubombe muntontozi,” alimwi abalo bamalumi babona bubotu bwakutaba alunya kubamakaintu babo.—1 Petro 3:4; Ba-Kolose 3:19.

Eezyi njiisyo zyamu Magwalo zilagwasya nkaambo Sikwaanza Bbaibbele, Jehova Leza, ngowakatalisya bubambe bwalukwatano. Ikuti kamuyanda makani aayungizidwe kujatikizya Bbaibbele mbolikonzya kumugwasya mulukwatano lwenu, mwakulwaizigwa kuti mubuzye bakamboni ba Jehova. *]

Bupanduluzi buyungizidwe