“Amuzumanane Kumvwana a Jehova!”

Muswaangano Wacooko wa Bakamboni ba Jehova

● Zyuulu zyamiswaangano eeyi yacooko yamazuba otatwe, iiyakucitwa munyika yoonse iyakutalika kucitwa mu Zambia mumwezi wa August. Mu Zambia mapulogilamu abuzuba anakutalika anyimbo aciindi ca 08:20 a.m. Mutwe wamakani wabuzuba bwakusaanguna uuzwa ku Intembauzyo 73:28, ngwakuti, “Kulandibotela Kuswena Kuli-Leza.” Makani asicuuno ayakutobelwa amakani aakuti “Miswaangano Yacooko Itugwasya Kuzumanana Kuba Balongwe ba Jehova” alimwi a “Mwana Ulayanda Kumuyubununa.” Mpoonya makani aakusiilana aakuti “Amubaiye Aabo Bakazumanana Kumvwana a Jehova” ayakutondezya mbuli Abrahamu, Rute, Hezekiya, a Mariya mbobakacita boobo. Pulogilamu yamafwumofwumo iyakumana amakani aantalisyo aakuti, “Jehova Mbwatugwasya Kuti Tumvwane Anguwe.”

Cibeela cakusaanguna ciindi cakumazuba mubuzuba bwakusaanguna ncakuti, “Bwiinguzi Kumibuzyo Iijatikizya Jehova,” ciyakutobelwa amakani aakuti “Amugwasyigwe Alulayo lwa Jehova” aakuti, “Mutamukalalili Jehova.” Kumane kuyakutobela makani aakusiilana akuti, “Kubandika Kulakonzya Kugwasya Mikwasyi Kuzumanana Kumvwana a Jehova.” Eezyi zibeela zyosanwe zijisi mitwe yakuti: “Jehova, Utupa Cikozyanyo Cibotu Kapati Cakubandika,” “Nobalumi, Kamubandika Abamakaintu Banu!,” “Nobamakaintu, Kamubandika Abalumi Banu!,” “Nobazyali, Kamubandika Abana Banu!,” “Nobana, Kamubandika Abazyali Banu!” Cibeela cakumazuba ciyakumana amakani aakuti “Zilenge Zitondezya Kuti Kuli ‘Leza Muumi’!”

Buzuba bwabili bujisi mutwe wakuti “Baluleme Ulabayanda” uuzwa ku Tusimpi 3:32. Makani aakusiilana aakuti “Amubagwasye Bantu ‘Kuti Bayanzane a Leza’” anoojisi zibeela zyakuti, “Bazandukide Alimwi Batajisi Bulangizi,” “Wakababuzya,” “Amuzuzikizye Mukuli Wanu Wakuba Mukambausi Uugwasilizya,” “Amubakulwaizye Kwiinda Mukulilemeka Kabotu,” alimwi a “Amuzumanane Kubeleka Cabusungu.” Kwaakumana makani akuti, “Mulimo Waciindi Coonse Upa Kuti Kamumvwana Kapati a Jehova” alimwi aakuti, “Kuli Baabo Bamuyanda Jehova, ‘Kunyina Cikonzya Kubalebya,’” cibeela eeci camafwumofwumo ciyakumana amakani aalubbapatizyo, mpoonya aabo ibeelela baya kubbapatizigwa.

Pulogilamu yakumazuba buzuba bwabili inoojisi makani aakusiilana aajisi zibeela zili lusele “Mutazumizyi Cintu Cili Coonse Kumwaandaanya a Jehova”—“Nzila Zyabucenjezu Saatani Nzyabelesya,” “Kulikankaizya,” “Mali,” “Buponi,” “Mulimo Wakumubili,” “Kulikondelezya,” “Mukwasyi,” “Zyintu Zibambwa aba Sayaansi.” Mpoonya kuyakuba cisobano cilibedelede cakuswiilizya buyo icijisi mutwe wakuti, “Mutatyompwi Nomululamikwa a Jehova.” Pulogilamu yabuzuba oobu iyakumana amakani aakuti, “Amuzumanane Kumvwana a Jehova Mbuli Mbwaakacita Jeremiya.”

Mutwe wamakani wabuzuba bwatatu uuzwa kubbuku lya Joshua 23:8, ngwakuti, “Amukakatile Kuli-Jehova.” Lwaakumana lwiimbo alimwi amupailo, makani aakusiilana aajisi mutwe wakuti “Kulumba Jehova Akaambo Kabube Bwakwe Bubotu” ayakulanga-langa bube bwa Leza—“Ulasikilika,” “Ulaaluzyalo,” “Ulalumba,” “Mwaabi,” “Tasalululi,” “Ulalekelela,” “Mutontozi”, “Ulasyomeka.” Makani aa Aabuleya aajisi mutwe wakuti “Ino Mbuti Mbomukonzya Kumvwana a Leza?” ayakutobela. Cibeela camafwumofwumo ciyakumana kwiinda mukulanga-langa Ciiyo ca Ngazi Yamulindizi cicitwa amvwiki.

Cibeela cikkomanisya camasikati mubuzuba bwatatu, ncisobano cijatikizya bantu bamumwaanda wamyaka wakusaanguna. Citondezya ciindi Banakristo nobakali kuccija kuzwa mu Jerusalemu alimwi cijisi mutwe wakuti “Amweende Mulusyomo Ikutali Kweelana Anzyomubona.” Caakumana cisobano, kuyakutobela makani aajisi mutwe wakuti, “Amuzumanane ‘Kukkala Muciyubilo ca Mupatikampatila.’”

Amutalike kulibambila lino kutegwa mukajanike. Kutegwa muzyibe busena nkouyakubeda muswaangano ibuli afwaafwi ankomukkala amuunke ku Ŋanda ya Bwami ya Bakamboni ba Jehova iili afwaafwi naa inga mwalembela basikumwaya bamagazini eeyi. Kkeyala ya Intaneti ya www.pr418.com ilijisi mulongo wamasena moiya kubeda miswaangano yacooko munyika yoonse.