Ncolyaamba Bbaibbele

Sena Mweelede Kubbadela Kutegwa Mugwasyigwe Abeendelezi Bacikombelo?

MUMASI manji, beendelezi bazikombelo zya Banakristo alimwi azitali zya Bunakristo balabbadelesya kutegwa bacite milimo iijatikizya bukombi. Milimo eeyi ilakonzya kubikkilizya lubbapatizyo, bwiinga naa malila. Mali ngobabbadelesya manji kapati.

Beendelezi bamwi bazikombelo balavwozyegwa amfulumende kutegwa bacite milimo iicitwa abeendelezi bacikombelo mbuli kupaila noitanatalika miswaangano yabasikubamba milawo iicitwa abuzuba. Bantu balalumba akaambo kamilimo eeyi, alimwi basizikombelo balijisi zyintu zinji nzyobeelede kubbadelela. Pele sena Bbaibbele lilazizumizya zilengwa zyakubbadelesya bantu ibayanda kugwasyigwa abeendelezi bazikombelo naa kupa bantu kuyeeya kuti mulawo buya kuti beelede kubbadela?

“Ŋanda Yamakwebo”?

Ciindi Jesu Kristo naakali anyika, beendelezi mucikombelo cabama Juda alimwi abantu bamwi bakali kubelesya ziindi zyamiswaangano yacikombelo kuti bajane mpindu, ikapati ciindi capobwe lya Kwiindilila. Sena Jesu wakacikkomanina cilengwa eeci? Peepe! Mubwini, Bbaibbele lyaamba kuti “wakamwaya mali aabasikusintana, akusowaila matafule aabo.” Wakaamba kuti: “Mutiiciti ŋanda ya-Taata kuti ibe ŋanda yamakwebo.”—Johane 2:14-16.

Cintu cili mbuli ceeci cakacitika mumazuba ngaakali kupona musinsimi Mika, mumwaanda wamyaka walusele B.C.E. Bbaibbele lyaamba kuti, beendelezi bacikombelo cabana Israyeli bakali ‘kusampaula lubeta,’ alimwi bapaizi bakali ‘kuiisya cakuvola.’ Pele kumwi bakali kulitaminina kuti Leza nguwakali kubagwasilizya, bakali kwaamba kuti: “Sa Jehova tali akati kesu”? (Mika 3:9, 11) Pele Jehova Leza tanaakali akati kabo alimwi talinguwe wakali kubeendelezya. Muciindi caboobo, micito yabo yakali kumusulula alimwi aaka kaambo wakakasalazya kwiinda mumusinsimi wakwe.

Mazuba aano, beendelezi banji bazikombelo bacita zyintu cabulyato, aboobo, bapa kuti masena ngobakombela abe ‘maanda amakwebo.’ Mubwini, mbunga zyacikombelo zyoonse zilacita makwebo, kanji-kanji zilacita makwebo aakonzya kuleta mpindu mpati nozisambala zifwanikiso ziiminina Jesu a Mariya, alimwi azyintu zimwi zinji zibelesyegwa mubukombi. *—1 Johane 5:21.

“Mwakapegwa Buyo, Anywe Amupe Buyo”

Ciindi naakali kulailila baapostolo bakwe kuti bakambauke, kuponya balwazi, alimwi akubusya bafwu, Jesu wakaamba kuti: “Mwakapegwa buyo, anywe amupe buyo.” (Matayo 10:7, 8) Inzya, basikumutobela  beni-beni tiibakeelede kubbadelesya bantu. Kuyungizya waawo, Jesu wakapa cikozyanyo cibotu mukugwasya bantu kakunyina kubabbadelesya.

Katobela cikozyanyo ca Jesu, mwaapostolo Paulo wakacita mulimo wakwe “cakutavola mali.” (1 Ba-Korinto 9:18) Ciindi naakali kuyandika mali, wakali kucita mulimo wakupanga matente. (Incito 18:1-3) Aboobo, wakali kukonzya kwaamba kujatikizya nguwe abamisyinalinyina kuti: “Tatuli mbuli banji baulisya Majwi aa Leza.” (2 Ba-Korinto 2:17, BT) Pele ino mbuti caboola kukujana mali aayandika kubelesyegwa mumbungano, ndiza kubbadelela naa kuula ŋanda yakucitila miswaangano?

“Oyu Uupa Calumwemwe Nguuyandwa Kwa-Leza”

Bakamboni ba Jehova balajana mali aayandika kwiinda mukusanga kwakuliyandila. Batobela njiisyo yakuti, “Umwi aumwi uleelede kupa mbuli mbwayanda mumoyo wakwe, kutabi cakunyonosya moyo nanka cakusinikizigwa, nkaambo oyu uupa calumwemwe nguuyandwa kwa-Leza.” (2 Ba-Korinto 9:7) Nkakaambo kaako Bakamboni tabaulisyi mabbuku aabo nokuba kubbadelesya bantu akaambo kamilimo iicitwa mumbungano, mbuli yakubbapatizya, kweendelezya bwiinga naa malila. Kuyungizya waawo, kumiswaangano yabo tabapi cimanya kkumi naa kwiinzya mbale yamulumbo. Kufumbwa muntu uuyanda kusanga kutegwa agwasilizye mulimo wabo wakukambauka munyika yoonse, ulakonzya kucita oobo kwiinda mukubikka mali mutubbokesi tubikkidwe mumasena mobaswaanganina.

Kwiinda mukusanga kwakuliyandila, Bakamboni ba Jehova nyika yoonse mboizulwa balajana mali aakubelesya Mumaanda aa Bwami, Mumaanda Aakucitila Miswaangano Mipati, mumaofesi aamitabi, mumasena musimbilwa mabbuku, alimwi aakugwasya baabo ibacitikilwa ntenda zyacilengwa Leza. Bamwi, mbuli mukamufwu mucete Jesu ngwaakalumbaizya bakonzya buyo kupa kusyoonto. (Luka 21:2) Bamwi balakonzya kupa kunji. Kufwumbwa naa zyintu zili buti, aabo batobela njiisyo zyamu Bbaibbele alimwi akusanga kweelana ambobakonzya balakkutila kapati, bajana zileleko zya Leza zinji kapati alimwi alukkomano lwini-lwini.—Incito 20:35; 2 Ba-Korinto 8:12.

Bupanduluzi buyungizidwe

SENA KULI NOMWAKALIBUZYIDE KUTI?

● Ino Jesu wakabaambila nzi aabo ibakali kucita makwebo mutempele?—Johane 2:14-16.

● Sena mwaapostolo Paulo wakali kubbadelwa akaambo kamilimo njaakali kucita mumbungano?—2 Ba-Korinto 2:17.

● Ino nkupa kuli buti kumukkomanisya Jehova?—2 Ba-Korinto 9:7.

[Majwi aakwelelezya sikubala aali apeeji 15]

“Mutiiciti ŋanda ya-Taata kuti ibe ŋanda yamakwebo.”—Johane 2:14-16