“Andiza Ninyimbo Buyo Iikonzya Kuyandika”

● Ba Juliana, Banakristo bayandwa, ibakali kukkala ku Philippines bakatalika kuciswa bulwazi bwakuluba. Kunyina ngobakali kukonzya kuyeeya nobaba banababo. Nokuba boobo, ndakali kuunka kuya kubaswaya kufwumbwa naa ndili mucilawo mobakali kukkala.

Ba Juliana tiibakali kubukila bulo alimwi bakali kulangilila buyo zyintu awindo. Cakali kukatazya kuba ambabo, mbokunga tiibakali kukonzya kundiyeeya. Bakali kwiile kupwatula buyo meso kundilanga pele kunyina nobakali kutondezya kuti bandizyiba. Ndakababuzya kuti: “Sena mucimuyeeya Jehova?” Ndakabalwiida cintu cimwi icakacitika nondakali mumulimo wakukambauka alimwi ndakababuzya mibuzyo aimwi, pele kunyina nobakatondezya kuti balimvwide nzyondaamba. Mpoonya ndakatalika kwiimba. Icakatobela cakali kukkomaninsya kapati!

Ba Juliana bakaceba, bandilanga, mpoonya abalo bakatalika kwiimba lwiimbo ndondakali kwiimba. Ndakacileka kwiimba nkaambo tiindakaazyi majwi oonse aalwiimbo mumusyobo wa Tagalog. Pele balo bakazumanana kwiimba. Bakaluyeeya lwiimbo loonse. Cakutasowa ciindi ndakalomba ngotwakali limwi kuti akandilombele bbuku lyanyimbo kuli Kamboni umwi wakali kukkala munsi-munsi. Mukaindi buyo kasyoonto wakalileta. Nokuba kuti tiindakaizyi namba yalwiimbo, ndakainda akujalula mpoonya apeeji mpolubede. Aciindi aawa, twakalwiimba antoomwe lwiimbo loonse. Nondakababuzya kuti naa kuli nyimbo zimwi nzyobakacili kuyeeya, ba Juliana bakatalika kwiimba lwiimbo lwakaindi lwakaimbwa mu Chifilipino ilwaamba zyaluyando.

Ndakabaambila kuti: “Peepe ba Juliana, kutali lwiimbo lwaawailesi kaka, ndaamba lwaku Ŋanda ya Bwami.” * Mpoonya ndakatalika kwiimba lwiimbo lumbi luzwa mubbuku lyesu lyanyimbo, alimwi abalo bakatalika kwiimba. Cakalitondezya abusyu kuti bakalikkomene kapati. Bakaleka kuungumana alimwi bakatalika kumweta-mweta.

Aciindi aawa, basimukobonyina bakalunduka kuzoobona bakali kwiimba. Bakaima awindo kabatweebela akuswiilizya. Cakali kunooneezya kubona mbobakakkomana ba Juliana akaambo kakwiimba. Cakabapa kwaayeeya majwi oonse aalwiimbo.

Kuli ceeci ndakaiya ciiyo cakuti, tokonzyi kuzyiba cintu cikonzya kubakkomanisya aabo banga tabacikonzyi kumvisya zyintu naa kwaambaula. Andiza ninyimbo buyo iikonzya kuyandika.

Kwiinde buyo mazuba masyoonto, ba Juliana bakazimina. Ndakakayeeya kaambo aaka ciindi nindakali kuswiilila nyimba zipya zya Bakamboni ba Jehova izikkomanisya, izyakazwa mu 2009. Mulakonzya kubuzya Bakamboni ba Jehova ibali mucilawo cenu kujatikizya ncomukonzya kucita kuti kamuyanda nyimbo eezyi zyakalekkoodwa.

Bupanduluzi buyungizidwe