Ncolyaamba Bbaibbele

Ino Madaimona Mbaani?

ZYEELO, basyaamankwamu amadaimona misyobo yamizimo bantu bamuzikombelo ziindene-indene njobasyoma kuti ilabalwana bantu naa kubalanganya. Bamwi tabasyomi misyobo yamizimo iili yoonse nkaambo baamba kuti kucita boobo nkusyoma zyintu zitako naa zyakuyeeyela buyo. Ino Bbaibbele lyaamba nzi?

Ibbaibbele liyiisya kuti Mulengi mwini Muuya alimwi akuti zilenge zyakwe zyakusaanguna zyakali zyamuuya naa bangelo. (Johane 4:24; Ba-Hebrayo 1:13, 14) Alimwi Bbaibbele lilaamba zyamyuuya mibi, zimwi ziindi lyaamba muuya eeyi kuti madaimona. (1 Ba-Korinto 10:20, 21; Jakobo 2:19) Pele taliyiisyi kuti Leza wakalenga madaimona pe. Aboobo, ino madaimona mbaani alimwi akazwa kuli?

“Baangelo Bakabisya”

Leza naakalenga zilenge zyamuuya, wakazipa lwaanguluko lwakulisalila, zyakali kukonzya kusala kucita ciluzi naa citaluzi. Cuusisya ncakuti, naakamana kulengwa muntu, mweelwe uutazizilwe wabangelo bakasala kucita citaluzi kwiinda mukuzangila Leza.

Cilenge camuuya cakasaanguna kuzanga cakazooba Saatani. Jesu wakaamba kuti Saatani “takede mubwini.” (Johane 8:44) Ino ncinzi cakapa kuti Saatani azangile Leza? Wakatalika kunyomenena kukombwa ikweelede buyo Mulengi alikke, alimwi wakazumanana kucita ceeco ncaakali kulombozya kwiinda mukutalisya businkondonyina a Leza. Oobu mbwakalipanga kuba “Saatani,” ibbala lyaamba “sikukazya.” Kakwiindide myaanda yamyaka iili mboibede, kalitanacitika Zambangulwe lyakumazuba aa Nowa, ibangelo bambi bakamusangana Saatani mukuzangila Leza, bakasiya masena aabo akujulu akulicinca mibili yabo kuba yabuntu mpoonya akuzookkala anyika. (Matalikilo 6:1-4; Jakobo 1:13-15) Nolyakacitika zambangulwe, “baangelo bakabisya” bakalicinca mibili yabo kuba yamuuya akupilukila kubusena bukkala zilenge zyamuuya. (2 Petro 2:4; Matalikilo 7:17-24) Kumbele bakazooitwa kuti madaimona.—Intembauzyo 106:37; Marko 1:34.

Lino ibangelo bazangi aaba bakalijana mubukkale bwiindene kapati abobuya mbobakajisi kabatanazanga. Lugwalo lwa Juda 6 lwaamba kuti: “Baangelo abatakajatisya bwami bwabo bwakusaanguna pele bakabusia busena bwabo, [Leza] wakabaanga azyaanzyo zitamani mumudima uusia mbi, kuti bakalindile mane kusikila kulubeteko lwabuzuba bupati.” Inzya, Leza taakaazumizya madaimona kuti azumanane kukkala mumasena aangawo aakujulu pele, muciindi caboobo, wakaasowela “mutulambwe twamudima uusia mbi,” ali mumudima wakumuuya.

“Nguuena Bantu Boonse Baansi”

Nokuba kuti kunyina naakonzya kulisandula akuba amibili yabuntu alimwi, madaimona alijisi nguzu alimwi alakonzya kweendelezya mizeezo alimwi amaumi aabantu. Mubwini Saatani, amakamu aakwe aamadaimona, “nguuena bantu boonse baansi.” (Ciyubunuzyo 12:9; 16:14) Mubuti? Ikanji-kanji, kwiinda ‘mumafundisyo aabadaimona.’ (1 Timoteo 4:1) Eezi njiisyo zyakubeja, kanji-kanji izijatikizya bukombi, zyaofwaazya tuulunzuma twabantu kutegwa batazyibi kasimpe kujatikizya Leza. (2 Ba-Korinto 4:4) Atulange-lange zikozyanyo zimwi.

● Njiisyo yakuti bafwide balapona. Kwiinda mubasangu, majwi alimwi anzila zimwi zyabucenjezu, madaimona acenga bantu kusyoma kuti bantu bapona balakonzya kwaambaula abafwide. Kunze lyaboobo, makani aaya aakubeja apa bamwi kusyoma kuti kuli cibeela camubili cizumanana kupona muntu afwa. Nokuba boobo,  cakusalazya Bbaibbele lyaamba kuti: “Bafwide tabezi cintu niciba comwe.” (Mukambausi 9:5, 6) Akaambo kakuti ‘bakaya mubukata,’ tabacikonzyi kutembaula Jehova.—Intembauzyo 115:17. *

● Kutalilemeka. Lugwalo lwa 1 Johane 5:19 lwaamba kuti “Nyika yoonse ikede muzibi.” Saatani amadaimona aakwe babelesya sikapepele anzila zimwi kusumpula muzeezo mubi wakuti bantu balaangulukide kucita zisusi zyanyama. (Ba-Efeso 2:1-3) Aboobo, kutalilemeka kwamusyobo uuli woonse kubikkilizya akoonana kutali kwamumulawo kulidumide mazuba aano. Mane buya micito iili boobu bamwi baibona kuti ili buyo kabotu, kakuli zyeelelo zyamu Bbaibbele bazibona kuti nzyintu zyansiku.

● Kukulwaizya micito iijatikizya mizimo. Mwaapostolo Paulo wakaswaana musimbi mubelesi iwakanjidwe “muuya wakusonda,” iwakali kumupa ‘kuvubya basimalelaakwe akusonda.’ (Incito 16:16) Paulo wakakaka kuswiilila ncaakali kwaamba musimbi ooyu nkaambo wakalizyi kuti madaimona ngaakali kumupa nguzu zyakucita boobo. Kuyungizya waawo, tanaakali kuyanda kubisizya Leza nkaambo misyobo yoonse yamizimo, kubikkilizya akulingula nyenyezi alimwi akubelesya nguzu zyamasalamuzi, ilamusesemya.—Deuteronomo 18:10-12.

Amulikwabilile Kumadaimona

Ino inga mwalikwabilila buti kumyuuya mibi? Ibbaibbele liingula kuti: “Eno amulibombye kuli-Leza. Amumukazye Saatani, uyoomucija.” (Jakobo 4:7) Tulatondezya kuti tulaatobela malailile aaya kuti katupona kweelana anjiisyo zyamu Bbaibbele, ibbuku lisetekene liyubununa Saatani, madaimona alimwi “ameeneeno” aabo. (Ba-Efeso 6:11; 2 Ba-Korinto 2:11) Ibbaibbele alimwi litwaambila kuti myuuya mibi kubikkilizya aboonse bamukazya Leza tabanooliko lyoonse pe. (Ba-Roma 16:20) Lugwalo lwa Tusimpi 2:21 lwaamba kuti: “Baluleme bayookala munyika; Baololokede mbebayoosyaala mulinjiyo.”

Bupanduluzi buyungizidwe

SENA KULI NOMWAKALIBUZYIDE KUTI:

● Sena Leza ngowakalenga madaimona?—2 Petro 2:4.

● Sena mulakonzya kwambaula abafwide?—Mukambausi 9:5, 6.

● Ino inga mwalikwabilila buti kumadaimona?—Jakobo 4:7.

[Majwi aakwelelezya sikubala aali apeeji 13]

Madaimona alasola kuyunga bantu munzila zinji