Kulendelelwa Munyika Iizwide Mincini

MAZUBA aano, ikwiinda lyoonse, kuli zibelesyo ziindene-indene izyapa kuti cuube-ube kubandika akutuminana milumbe abantu bali kule, mbuli mafooni aamunkomo alimwi a Intaneti. Nokuba boobo banji, ibana abapati, balalendelelwa. Ino nkaambo nzi?

Mubbuku lyabo litegwa Loneliness—Human Nature and the Need for Social Connection, basyaabusongo ba John T. Cacioppo aba William Patrick balaabandika makani aakulendelelwa. Balaamba zyabuvwuntauzi butondezya kuti “Ikuyaambele mukubelesya Intaneti kwapa bantu banji kulizandula alimwi eeci cibapa kutyompwa akaambo kakuti tabajisi ciindi cakuyanzana akubandika abantu.”

Mubukkale bwamazuba aano, bantu bajisi maankamaanka cakuti balabula aciindi cakubonana akubandika abantu bambi. Bantu nobabandika aluwaile naa kutuminana milumbe a Intaneti, kanji-kanji tacikonzyeki kubona busyu bamweenzinyika, mbwamweta-mweta akutondezya luyando.

Eeci cilacitika kumilimo, pele alimwi cilacitika kapati mumikwasyi. Mumikwasyi minji, banamukwasyi balamwaikizyanya aumwi kumilimo yakwe, tabajisi ciindi cakulida antoomwe nokuba kwiizya. Bakubusi balijisi makkompyuta aabageme alimwi kanji-kanji tabakkali antoomwe abanamukwasyi. Nokuba kuti balijisi mincini eeyi iibagwasya kubandika akutuminana milumbe, banji balalendelelwa.

Mazuba aano, nobaba banabukwetene balakonzya kujana buyumu-yumu akaambo kakulendelelwa. Ikuti kabatajani ciindi cakubandika, aumwi unoojisi bubi muli zyakucita zyakwe alikke. Banabukwetene balapenga kapati mumoyo ikuti kabalimvwa kulendelelwa nokuba kuti bakkala antoomwe.

Bazyali bali balikke balakonzya kulendelelwa. Ikujata bubi mukubelesya mincini yasayaansi iyabandikwa atala aawa kulakonzya kupa kuti bazyali kababula ciindi cakubandika abana babo naa bana kubula ciindi cakubandika abazyali babo. Alimwi bantu batakwete naa kukwatwa balayanda kujana bakukwatana limwi, nokuba boobo tabanajana.

Ikulendelelwa lyaba penzi pati ilikonzya kuba akati kazyintu zipa bantu kuba bacakolwa, balyato, kubelesya misamu iikola, buvwuule nokuba kulijaya. Aboobo cilayandika kapati kuzyiba zyintu zipa bantu kulendelelwa. Kubweza ntaamu eeyi yakusaanguna inga kwatugwasya kulwana penzi eeli.