Kuzyiba Zyintu Zipa Bantu Kulendelelwa

KULENDELELWA kuliindene akuba buyo olikke. Kanji-kanji muntu uulendeledwe inga ulombozya kuba amuntu wakuyanzana awalo. Pele muntu iwasala buya kuba alikke inga taambwi kuti ulilendeledwe pe.

Zimwi ziindi, cilayandika kuba olikke. Bamwi balacita oobo kutegwa bajane ciindi cakupaila alimwi akuzinzibala kuyeeya, mbuli mbwaakacita Jesu Kristo. (Matayo 14:13; Luka 4:42, BT; 5:16; 6:12) Pele ikulendelelwa ncintu citakkomanisyi. Ino ncinzi cikonzya kupa muntu kulendelelwa?

● Kulendelelwa Mumadolopo Mapati

Mumadolopo mapati, bantu banji bakkalana afwaafwi kapati. Nokuba boobo, cilagambya kujana kuti ikukalana afwaafwi ooku kupa kuti bantu baindile buya kulendelelwa. Akaambo kakuti buumi bwamumadolopo bupa bantu kujata bubi, cilaala kuzyibana kabotu abasimukobonyina. Aboobo, bakkala abantu mbobatazyi. Ikutasyomana ikuboola akaambo kakutazyibana kabotu alimwi akutayanda kuti zyintu nzyobacita zizyibwe kupa kuti bantu bamumadolopo mapati kabalendelelwa.

● Kutabelesyegwa Kabotu

Mbelekelo yamumakkampani manji mapati yapa babelesi kulendelelwa akulimvwa mbuli kuti tababeleki kabotu. Kanji-kanji inga balimvwa mbuli kuti lyoonse babeleka mbuli bazike alimwi balakatala kapati.

Alimwi babelesi bamumakkampani mapati balacincwa-cincwa akubelekela kumasena aambi calo cibapa kulibilika akulendelelwa. Kawaamba zyababelesi banji bamumakkampani  mapati amwi aamu France ibalijaya, imuteende wamucisi oomu uutegwa International Herald Tribune wakaamba kuti bunji bwababelesi balimvwa kuti “babelesyegwa mbuli bazike akaambo kakuyaambele kwamakwebo.”

● Kubelesya Mincini

Basyaabusongo baku Japan, ba Tetsuro Saito, bakaamba kuti: “Mafooni aamunkomo alimwi amincini imwi iibelesyegwa kubandika, zyapa bantu kwaalilwa kubandika kabotu mulomo mpande.” Imuteende waku Australia uutegwa Sunday Telegraph wakaamba kuti: “Zibelesyo zyasayaansi . . . zipa bantu kutayanda kuyanzana abantu bambi. Bantu . . . batuminana buyo milumbe amafooni naa a Intaneti muciindi cakubandika buya.”

Naakali kwaamba cimupa kulendelelwa, Rachel, imusimbi waku France uujisi myaka yakuzyalwa iili 21 wakatongauka kaamba kuti: “Bantu inga tabacisoli buya kubonana abamwi, kayi basyoma kuti cili buyo kabotu mbwaanga balabandika akutuminana milumbe amafooni aa Intaneti. Pele mebo cindipa kulendelelwa kapati.”

● Kulongauka

Akaambo kakuti cilakatazya kujana ncito, bantu balalongauka kutegwa bakalangaule milimo naa kuti batatandwi ncito ikuti basikubalemba mulimo babaambila kuti bakabelekele kubusena bumbi. Eeci cipa kuti kabasiya basimukobonyina, beenzinyina, basicikolonyina alimwi zimwi ziindi nokuba kusiya banamukwasyi. Aabo balonga inga balimvwa mbuli kuti ncisamu cazyulwa akusimpilwa aambi pele miyanda yasyaala.

Francis ulabuyeeya buzuba naakalonga kuzwa ku Ghana kuya ku France. Wakaamba kuti: “Ndakalendelelwa kapati akaambo kakutazyiba mwaambo, kubula beenzuma alimwi ampeyo.”

Kabaluula mbobakalimvwa nobakalongela kucisi ca England, ibakaintu bategwa ba Behjat bakaamba kuti: “Cakandikatazya kapati kuzizyibila zilengwa zyamucisi oomu. Ndakazyibana abantu pele ndakanyina balongwe beni-beni naa banamukwasyi mbondakali kukonzya kubandika abalo akubaambila bwini mbondakali kulimvwa.”

● Kufwidwa

Kufwidwa mulumi naa mukaintu cipa yooyo wafwidwa kulendelelwa kapati. Mulumi naa mukaintu wafwidwa ulaindila kulendelelwa ikuti wakali kulwazya kwaciindi cilamfwu. Kanji-kanji inga ulimvwa kuusa kapati.

Ba Fernande, bamukamufwu ibakkala mudolopo lya Paris, baamba kuti: “Icindikatazya ncakuti tandicijisi mulumi, imulongwe ncobeni, ngondikonzya kwaambila zili kumoyo.” Ba Anny baamba kuti balabayeeya balumi babo ikapati nobayanda kusala cakucita mumakani aabusilisi naa makani aamwi.

● Kulekana, Kwaandaana, Kubula Wakukwatana Limwi

Kulekana naa kwaandaana kanji-kanji kupa kulendelelwa naa kulimvwa mbuli kuti muntu uutakonzyi kuzwidilila mukucita cintu cili coonse. Kwiinda mbobakali kuyeeya kaindi basyaabupampu, mubwini bana mbobapenga kapati. Baamba kuti bana bajisi bazyali bakalekana balangilwa kuti banooli bantu balendeledwe baakukomena.

Aabo ibatanakwata naa kukwatwa akaambo kakuti tabanajana bakukwatana limwi beelede kuti zimwi ziindi balalendelelwa. Ikulendelelwa  kulaindila ikuti bamwi ibatacizyi kwaambaula babaambila majwi mbuli aakuti, “Ino uyakukwata naa kukwatwa lili?”

Bazyali bali balikke abalo balalendelelwa. Kuba muzyali kulakkomanisya pele alimwi kulijisi mapenzi amwi aayo bazyali bali balikke ngobeelede kulanganya kakunyina uubagwasya.

● Kucembaala Alimwi Abwana

Zimwi ziindi bantu bacembeede balakonzya kulimvwa kulendelelwa nokuba kuti banamukwasyi balababikkila maano. Inga basazinyina abeenzinyina kababaswaya zimwi ziindi, pele mazuba amwi naa nsondo buya nokutakwe uubaswasya balalendelelwa.

Tabali bapati balikke ibalendelelwa, abalo bana balalendelelwa. Bana banji balizyibizya kucita zyakulikondelezya balikke, mbuli kweebelela cipekupeku, kusobana zisobano zyaacipekupeku akusobanya kkompyuta.

Sena cilakonzyeka kujana nzila zikonzya kulesya kulendelelwa? Ino ncinzi cikonzya kumugwasya ikuti naa mwalimvwa kulendelelwa?

[Majwi aakwelelezya sikubala aali apeeji 21]

“Ndakalendelelwa kapati akaambo kakutazyiba mwaambo, kubula beenzuma alimwi ampeyo”