“Mutalibilikili Zyajuunza”

Ba Renée bakasika mpobaalilwa kuliyumya. Balumi babo, ba Matthew bakanyina mulimo uusitikide kwamyaka iinda ali yotatwe. Baamba kuti: “Ndakali kulibilika kapati akaambo kakuti tiindakazyi cakali kuyakutobela.” Ba Matthew bakasola kuyumya-yumya bakaintu babo kwiinda mukubatondezya kabotu kabotu kuti bakalijisi zyintu ziyandika kapati mumukwasyi. Pele balo bakaingula kuti: “Kaambo kapati nkakuti tamubeleki, aboobo tunyina mali!”

MASIMPE, ikubula mulimo wakumubili ncintu cilibilisya kapati. Muntu uutabeleki ulalibuzya mumoyo kuti: ‘Ino ndilili nondiya kujana ncito? Ino kwacecino ciindi ndilaubamba buti mukwasyi?’

Nokuba kuti kulibilika kuli boobu kuli buyo kabotu, Jesu Kristo wakapa lulayo lukonzya kugwasya muntu kuti aleke kulibilika. Wakati: “Mutalibilikili zyajuunza . . . Buzuba bwasunu bulizulide mapenzi aabo bwalo.”—Matayo 6:34

Amuzyibe Cimupa Kulibilika

Jesu tanaakaamba kuti tweelede kucita mbuli kuti tunyina mapenzi. Pele ikulibilika akaambo kamapenzi aatanacitika, ngotuyeeyela buyo, kulakonzya kutupa kwiindila kulibilika. Masimpe ngakuti, tunyina nguzu zyakucinca ciyakucitika junza, kufwumbwa naa ncibotu naa ncibi. Pele tulakonzya kulanganya zyintu zicitika buzuba oobo.

Sena ncuuba kucita boobu? Peepe! Ba Rebekah, ibajisi balumi ibakagusyigwa mulimo ngobakali  kubeleka kwamyaka iili 12, bakaamba kuti: “Ikuti konyongene kapati mumoyo, cilakatazya kuyeeya kabotu. Nokuba boobo, twakeelede kukkala ansi akuyeeya. Aboobo ndakasolekesya kuliyumya kutegwa ndikkalikane mumizeezo. Nindakabona kuti zyintu nzyondakali kulibilika tiizyakacitika akucitika, ndakazyiba kuti kulibilika maliminya buyo. Notwakatalika kubikkila buyo maano kuzyintu naa mapenzi aabuzuba abumwi, twakaleka kulibilika azyintu zitanacitika.”

Amulibuzye kuti: ‘Ino ncinzi cindilibilisya kapati? Sena cintu eeci cilalangilwa kucitika ncobeni? Ino kulibilika zyintu zitanacitika kundijatikizya buti?’

Amwiiye Kukkutila Azyintu Nzyomujisi

Mbotuzilanga zyintu kulakonzya kutupa kulibilika naa pe. Aboobo, Ibbaibbele litukulwaizya kuti: “Kufumbwa twanoojisi cakulya acakulivumba, nciconya eco mbubo ncinji.” (1 Timoteo 6:8) Ikukkutila caamba kukkomana twanoojisi zyintu ziyandika ncobeni mubuumi muciindi cakuyandisya zyintu zitayandiki kapati. Ikuti kamuyandisya zyintu zinji, ciyakumwaalila kuubya-uya bukkale bwenu.—Marko 4:19.

Nobakalingula bukkale bwabo, ba Renée bakakonzya kukkutila azyintu nzyobakajisi. Baamba kuti: “Kunyina nitwakaalilidwe kubbadelela ŋanda amalaiti. Penzi lini ndyakuti tiitwakalina kubuzyibila buumi oobu alimwi ikulombozya kupona mbuli leliya notwakali kubeleka cakandipa buyo kwiindila kupenga mumoyo.”

Tiilyakalampa, ba Renée bakabona kuti mubwini tabuli bukkale oobu bupya bwakali kubapa kupengana kapati mumoyo pele ninzila njobakali kuzilanga zyintu. Baamba kuti: “Ndakatalika kuzilanga bweelede zyintu akuleka kulombozya kuti zibe mbondakali kuyanda. Nindakatalika kukkutila azyintu Leza nzyaakali kutupa abuzuba, ndakaba muntu uukkomene.”

Amulibuzye kuti: ‘Sena ndilijisi ziyandika zyasunu? Ikuti naa mboobo, sena inga ndaleka kulibilika zyacifwumo nkaambo ndilaalusyomo lwakuti ndiyakuzijana alimwi?’

Kuzilanga kabotu zyintu ncecintu cakusaanguna iciyandika kutegwa mucikonzye kupona buumi buuba-uba ciindi nomutajisi mali. * Pele ino zyintu nzi zimwi zikonzya kumugwasya ciindi nomutajisi mali akaambo kakuti tamubeleki?

Bupanduluzi buyungizidwe

[Kabbokesi kali apeeji 5]

Kalya Uzumanana!

Nokwakainda nsondo zili mbozibede ba Fred kabalangaula mulimo pele kabataujani, bakayeeya kuti tabakaujani limbi. Baamba kuti: “Cakali mbuli kulindila muntu ngomwapangene limwi kuti azikumulonde kucitisyini mpoonya tasiki.” Ba Fred bakasala kubikkila maano kuzyintu nzyobakali kukonzya kucita kutali nzyobatakali kukonzya kucita. Bakatuma magwalo aakulembela mulimo kumakkampani naaba yaayo nkobatakali kulangila kuti inga babanjizya ncito. Bakali kuunka kufwumbwa nkobabaita kuyakwiingula mibuzyo alimwi bakali kulomya kulibambila kabajisi lusyomo lwakuti “makanze aabasungu alaleta zilyo zinji.” (Tusimpi 21:5) Baamba kuti: “Kwaziindi zyobilo ndakaitwa kukkampani imwi, kwalo balupati-pati bamulimo nkobakandibuzya mibuzyo iikatazya kapati.” Masimpe kalya uzumanana. Ba Fred baamba kuti bakaujana mulimo.

 [Kabbokesi/Cifwanikiso icili apeeji 6]

Cintu Ciyandika Kapati Kwiinda Mali

Ino ncinzi ciyandika kapati, kusyomeka naa mali? Amubone Tusimpi tobile twamu Bbaibbele.

“Muntu mutengwana [naa mucete] uuenda cakululama mubotu kwiinda muntu muvubi uupilingene.”—Tusimpi 28:6.

“Bulilu bwazisyu buli antoomwe aluyando mbubotu kwiinda musune uuyokedwe alusulo.”—Tusimpi 15:17.

Kubula mali takweelede kupa muntu kuleka kusyomeka alimwi akuleka kulemekwa. Aboobo ciindi balumi babo nobakagusyigwa ncito, ba Renée bakaambila bana babo kuti: “Bamaalumi banji bakaisiya mikwasyi yabo. Pele bauso balo tiibakamusiya. Mwalibonena mbobamuyanda ambobamugwasya mumapenzi oonse. Bauso balaamoyo mubotu kapati!”