Ndilangila Kuya Kubaambila Kuti, “Mukwasyi Lino Wakkwana!”

AKALUULWA ABA ABIGAIL AUSTIN

Ndakajisi myaka yakuzyalwa iili fwuka. Buzuba bumwi mu April 1995, kabunga kabantu bamumbungano yesu bakayeeya kuunka kuya kulyookezya kubusena buli kulaale adolopo. Twakatalika lweendo lwesu, abamwi mumootokala wabo. Mebo, mupati wangu Sarah, amulongwe wesu uutegwa Deborah, kubikkilizya abazyali bangu, twakali mumootokala omwe. Cakutayeeyelwa kwakaboola mootokala umwi wakali kubalika kapati alimwi wakali kweendela kucibeela camugwagwa nkotwakabede, akupwaya mootokala wesu. Ndime endikke ndakafwutuka.

NDAKABUKILA kucibbadela nokwakainda mvwiki zyobile. Cipapa camutwe wangu cakapapauka, alimwi bamadokotela bakandibikka tubulo-bulo kutegwa mutwe ujatane. Pele ndakafwambaana kupona. Basazima bakandaambila cakacitika, pele tiindakasyoma. Ndakazumanana kuyeeya kuti bazyali bangu alimwi amucizyi wangu bakaliboolede kundibona nindakali koona mucibbadela alimwi ndakali kubayeeya. Lilikke buyo nondakajokela kuŋanda nondakabona kuti anu nincobeni tabaciko. Ndakausa kapati.

Ino ncinzi cakandigwasya kuliyumya mumapenzi aaya?

Lukono Lwakubelekela Jehova Cakusyomeka

Ndime ndakali keela akati kabana bosanwe. Aciindi noyakacitika ntenda, Sarah wakajisi myaka yakuzyalwa iili 22, Shane iili 20, Jessica iili 17 walo Luka wakajisi iili 15. Twakajisi bazyali babotu kapati alimwi bakali kutubikkila maano. Bataata, ba Steve, bakali baalu Mumbungano ya Bakamboni ba Jehova yaku West Yorkshire ku Shipley alimwi bantu boonse bakali kubayanda kapati akaambo kakuti bakali kubikkila maano kumapenzi abantu alimwi akubagwasya. Abalo bamaama, ba Carol, bakali kuyandwa kapati nkaambo bakali kulanganya bacembeede mumbungano mbuli kuti mbazyali babo. Bakali kutupangila mapobwe tobana-bana alimwi bakali kutugwasya kujana balongwe babotu. Boonse bakalaangulukide kusika nkotuzwa. Bazyali besu bakatuyiisya kuba alubomba alimwi akubalanganya kabotu basimukoboma.

Lyoonse muli Bwatatu twakali kwiiya Bbaibbele antoomwe mumukwasyi. Zimwi ziindi twakali kucita zisobano zyamu Bbaibbele alimwi twakali kusama mbuli bantu bakaindi ibalembedwe mu Bbaibbele. Katucili baniini, Bamaama a Bataata bakatuyiisya mbokulibambilwa miswaangano yesu yambungano alimwi akukambauka mulumbe wamu Bbaibbele kumaanda abantu. Nokuba kuti bakajisi zinji zyakucita akaambo kakulanganya bana bosanwe, bakali kujana ciindi cakuba andiswe alimwi bakatugwasya kuti tube acilongwe ciyumu a Jehova.

Ciindi Sarah, Shane alimwi a Jessica nobakamanizya cikolo, bakaba bapainiya, nkokwaamba kuti bakatalika mulimo wa Bunakristo wakukambauka waciindi coonse, mbubwenya bwakacita mulongwe wesu Deborah. Twakali kumvwana kapati a Sarah. Wakali kundilanganya mbuli bamaama, alimwi ndajala cikolo twakali kubeleka limwi mukugwasya bantu kuti baiye Bbaibbele. Mazuba aalya akali kundikkomanisya. Ndakali kubona mbobakali kukkomana bapainiya boonse, alimwi ndakali kunoneezyegwa kuba ambabo. Ndakajisi mbaakani yakuba mupainiya antoomwe a Sarah ndaakumana cikolo.

Mumazuba aakulyookezya, mukwasyi wesu alimwi abamwi mumbungano kanji-kanji bakali kucita zyintu antoomwe. Bana abapati bakali kumvwana kapati alimwi bakali kuyandana. Tiindakalizyi  kuti aaba bantu mbotwakali kumvwana limwi kapati bakali kuya kundigwasya alimwi akunduumbulizya kumbele amazuba.

Noyakainda Ntenda

Nobakandisaina kucibbadela, ndakajokela kuŋanda. Shane a Jessica bakali kucita mapisiweeki kumwi kabacita mulimo wakukambauka waciindi coonse alimwi bakali kubeleka canguzu kuti bajane mali aayandika kuula zyaaŋanda.

Abalo Bakambonima banji mumbungano yesu bakatugwasya. Bakatucitila zyintu zinji kapati! Bakali kutupa zyakulya, kutuulila zyintu alimwi akutuwasyila zisani mane kusikila ciindi notwakacikonzya kulicitila zyintu tolikke. Tulabalumba kapati. Bakamboni bazwa kumasena aandeene-andeene bakatupa zipego zinji alimwi akututumina makaadi, kutondezya luyando luli mumbunga ya Jehova.

Nokwakainda mwaka, bakwesu alimwi amucizyi wangu bakabona kuti ndakali kuyandika kukomenena mumukwasyi muli bazyali boonse bobile. Mikwasyi imwi mumbungano yakalyaaba kundilela, aboobo banamukwasyi wangu bakakkala ansi akulanga-langa mukwasyi ngobakali kukonzya kusala Bamaama a Bataata iwakali kukonzya kundigwasya kuti ndikomene kabotu akuzumanana kubelekela Leza. Mukwasyi umwi wakeelela kapati. Ba Billy, ibaalu, alimwi abakaintu babo ba Dawn, bakali kumvwana kapati abazyali bangu alimwi bakajisi mwana musimbi uutegwa Lois iwakajisi myaka yakuzyalwa yosanwe. Bakazumina kundilela alimwi kuzwa ciindi eeciya bandilanganya caluyando mbuli mwana wakulizyalila. Nokuba kuti Lois tanaakazumanana kuba ngomwana alikke akaambo kandime, kunyina naakaba amunyono, kusikila sunu tulamvwana kapati mbuli bantu bazyalwa da lyomwe.

Icakandigwasya Kuliyumya Mumapenzi

Kumatalikilo ndakali kulibuzya kuti naa nkaambo nzi eeci cintu cuusisya kapati ncocakacitikila mukwasyi wesu, ikapati kubona kuti bazyali bangu, kubikkilizya a Sarah alimwi a Deborah, bakali kumuyanda kapati Jehova alimwi abantu bambi. Pele ndakayeeya cibalo camu Bbaibbele ca Jobu, walo wakazumanana kusyomeka kuli Leza nokuba kuti wakafwidwa bana bakwe boonse. (Jobu 1:19, 22) Nakayeeya kuti, ‘Mubwini Sataani ngookaleta kupenga alufwu munyika, akuti inga wakkomana kapati ikuti ntenda eeyi yatupa kuleka kubelekela Leza.’ (Matalikilo 3:1-6; Ciyubunuzyo 12:9) Alimwi ndakayeeya kuti, caluyando Jehova ulitupede bulangizi bwabubuke. (Johane 5:28, 29) Tuya kubonana alimwi abanamukwasyi kubikkilizya a Deborah, aciindi aawa tunooli muparadaiso anyika! Inzya buya, cilongwe cangu a Jehova cakaindila kuyuma.

Ndayaanya bantu ibakafwidwa bayandwa babo, ndilauusa ikuti naa tabanamvwide ncolyaamba Bbaibbele kujatikizya cisyomezya cabubuke. Inga ndiyanda kubaambila zyabulangizi oobu nkaambo ndili masimpe kuti akaambo ka Jehova alikke alimwi ambunga yakwe, twacikonzya kuliyumya mubukkale bwesu oobu bukatazya kapati, katuzyi kuti zyintu ziyakuba kabotu kumbele.

Ambweni eeci cakatucitikila cagwasya munzila aimbi, capa bazyali bamwi kuti balibuzye kuti: ‘Sena bana besu twakabayiisya munzila yakuti kufwumbwa naa twafwa, inga balo bazumanana kubelekela Jehova?’

Ndasola kupona mbuli kuti Bamaama a Bataata bacipona. Ndilizyi kuti bakali kuyanda kuti nkebeleka canguzu mukugwasya bantu, mbubwenya mbobakali kucita. Kuzwa nindakamanizya cikolo, ndicita mulimo wabupainiya alimwi lino tubelekelaamwi a Lois mumulimo ooyu. Bakwesu amucizyi wangu balalikkalila aumwi amukwasyi wakwe alimwi balikkomene kubelekela Jehova mumbungano mobabede.

Ndilangila nyika mpya njaakasyomezya Leza alimwi abubuke. Takukoyooba limbi lufwu alimwi akumvwa kucisa. (Ciyubunuzyo 21:3, 4) Kuzyiba kuti toonse tuyakuba antoomwe alimwi kundipa kuliyumya. Ndilangila kuciindi nondiya kubonana a Bamaama, Bataata, Sarah, alimwi a Deborah, kubatambula akubaambila kuti, “Mukwasyi lino wakkwana!”

[Cifwanikiso icili apeeji 18]

Abigail (wabili kuzwa kulumwensi) kali amukwasyi uumulela