Sena Bamakaintu Baleelede Kuyiisya Mumbungano?
Ncolyaamba Bbaibbele
Sena Bamakaintu Baleelede Kuyiisya Mumbungano?
MUKAINTU umwi wacikombelo ca Katolika wakalembela balembi bamuteende uutegwa USA Today kuti: “Cilandinyemya kujana kuti kusikila asunu bamakaintu tabasalwi kuba basololi mucikombelo.” Bantu banji mbobalimvwa oobu. Kayi muzikombelo zimwi, bamakaintu balasalwa kuba bapaizi, babishopo alimwi balazumizyigwa kuyiisya.
Zikombelo zyoonse, eezyo zitazumizyi bamakaintu kuba basololi mucikombelo alimwi azeezyo zibazumizya kuyiisya mucikombelo, zilitaminizya kuti zicita zyintu kweelana a Magwalo. Pele mizeezo eeyi tayeendelani a Bbaibbele. Ino nkaambo nzi ncocili boobo? Kutegwa mwiingule mubuzyo ooyu, cakusaanguna amubone bbala eeli lya Chigiliki lyakuti di·aʹko·nos, ilyaamba “similimo” mumbungano mbolibelesyegwa mu Bbaibbele.
Mumwaanda Wamyaka Wakusaanguna
Ino mulizyi buti bbala lyakuti di·aʹko·nos naa similimo? Banji inga baamba kuti lyaamba musololi wacikombelo, abe mwaalumi naa mukaintu uusololela mumakani aabukombi. Nokuba boobo, Ibbaibbele libelesya bbala eeli munzila ziindene-indene. Amuyeeye mukaintu Munakristo, Febe, uulya mwaapostolo Paulo ngwaakaamba kuti “mucizi wesu Febe. Ngusimilimo [di·aʹko·nos] wambungano yaku-Kenekreya.”—Ba-Roma 16:1.
Sena muyeeya kuti Febe wakali kwiima kumbele mumbungano yaku Kenekreya, kayiisya mucikombelo? Mubwini, ino milimo nzi njaakali kucita? Mulugwalo ndwaakalembela bana Filipi, Paulo wakaamba kuti bamakaintu bamwi ‘wakali kulwa naa kubeleka ambabo munkondo ya-Makani Mabotu’ naa mukukambauka makani mabotu.—Ba-Filipi 4:2, 3.
Inzila njobakali kubelesya kapati Banakristo bamumwaanda wamyaka wakusaanguna mukumwaya mulumbe mubotu yakali yakuyiisya “mukati kabantu akunjilauka mumaanda,” nkokuti kubuleya alimwi akuŋanda aŋanda. (Incito 20:20) Aabo bakali kucita mulimo ooyu bakali kwiitwa kuti mbaasimilimo. Akati kabo kwakali abamakaintu, mbuli Priskila. Ooyu mukaintu, antoomwe amulumaakwe, ‘bakamupandulwida kabotu nzila ya-Leza’ imwaalumi wakali kuyoowa Leza pele iwatakalina kubbapatizyigwa akuba Munakristo. (Incito 18:25, 26) Mbubwenya mbuli Febe, kulibonya kuti Priskila alimwi abamakaintu bambi banji bakali basimilimo bacibwene.
Mulimo Uulemekeka
Sena mulimo wakukambauka kubuleya tiiwakali kuyandika kapati cakunga wakeelede kubelekwa buyo abamakaintu, eelyo balo bamaalumi kabageme kubeleka mulimo uuyandika kapati wakusololela mbungano? Peepe. Amubone twaambo ootu tobile. Kakusaanguna nkakuti, Bbaibbele lilaamba cakusalazya kuti Banakristo boonse, kubikkilizya abamaalumi ibajisi mikuli milemu mumbungano, bakeelede kukambauka kubuleya. (Luka 9:1, 2) Kabili nkakuti, kukambauka kubuleya yakali njenzila alimwi asunu icili njenzila Banakristo, bamaalumi abamakaintu, mbobatobela mulawo wa Jesu wakuti “mukabaiisye bantu bamisyobo yoonse.”—Matayo 28:19, 20.
Kuli mulimo aumbi uuyandika kapati bamakaintu bamwi ngobabeleka mumbungano. Paulo wakalemba kuti: “Abalo bakaintu bapati . . . babe bafundisi babululami, kuti bafundisye bakaintu bacili bana kuyanda balumi babo akuyanda bana babo.” (Tito 2:3, 4) Aboobo bamakaintu basimide alimwi ibazyi kabotu Munakristo mbwaelede kupona bajisi mukuli wakuyiisya bamakaintu bacili bana-bana kuti abalo basime. Awalo mulimo ooyu ulalemekwa.
Kuyiisya Mumbungano
Bbaibbele kunyina mpolyaamba kuti bamakaintu beelede kwiima kumbele lyabantu mumbungano akuyiisya. Muciindi caboobo, mwaapostolo Paulo wakabalailila kuti “baumune mumbungano.” Ino nkaambo nzi? Kaambo kamwi nkaakalemba nkakuti “zintu zyoonse buyo zicitwe kabotu akucililana.” (1 Ba-Korinto 14:34, 40) Kutegwa zyintu kazyeenda kabotu mumbungano, Leza wakapa bamaalumi mukuli wakuyiisya. Pele tacaambi kuti kufwumbwa mwaalumi ulipedwe mukuli wakusololela mbungano akaambo buyo kakuti mwaalumi; mukuli ooyu upegwa buyo kuli bamaalumi beelela ncobeni. *—1 Timoteo 3:1-7; Tito 1:5-9.
Sena mulimo Leza ngwapede bamakaintu taulemekeki? Peepe. Amuyeeye kuti Jehova Leza ulabasala kuti bacite mulimo uuyandika kapati, iwakupa bumboni kujatikizya nguwe. (Intembauzyo 68:11) Akati ka Bakamboni ba Jehova mazubaano, bamaalumi abamakaintu ibacita mulimo wakukambauka bagwasya tuulunzuma twabantu kuti beempwe akweelela kuyakufwutuka. (Incito 2:21; 2 Petro 3:9) Ooyu mulimo mupati.
Bubambe oobu bwakuti bamaalumi abamakaintu kababelekela antoomwe bupa kuti kube luumuno akulemekana. Mucikozyanyo: Meso amatwi abelekela antoomwe kugwasya muntu weenda amaulu kukosola mugwagwa imuli myootokala minji kakunyina kulimbwa. Mubwenya buyo, ciindi bamaalumi nobazuzikizya mikuli njobapedwe abalo bamakaintu nobabeleka milimo njobapedwe, imbungano ilalongezegwa akuba aluumuno.—1 Ba-Korinto 14:33; Ba-Filipi 4:9. *
Bupanduluzi buyungizidwe
^ munc. 13 Mutalubi kuti nguzu nzyapedwe mwaalumi mumbungano kuli mpozigolela. Weelede kulibombya kuli Kristo akucita zyintu kweelana anjiisyo zyamu Bbaibbele. (1 Ba-Korinto 11:3) Kuyungizya waawo, aabo ibapedwe mikuli mumbungano beelede “kulibombya umwi aumwi kumweenzinyina,” alimwi beelede kulicesya akukamantana.—Ba-Efeso 5:21.
^ munc. 15 Alimwi bamakaintu Banakristo bapa cikozyanyo cibotu kubangelo kwiinda mukulemeka mukuli Leza ngwapede bamaalumi mumbungano.—1 Ba-Korinto 11:10.
SENA KULI NOMWAKALIBUZYIDE KUTI:
● Ino mbuti bamakaintu bamumbungano yamumwaanda wamyaka wakusaanguna mbobakali kuyiisya?—Incito 18:26.
● Ino mbaani basalidwe kuti basololele mumbungano?—1 Timoteo 3:1, 2.
● Ino Leza wiibona buti milimo njobacita bamakaintu Banakristo mazubaano?—Intembauzyo 68:11.
[Cifwanikiso icili apeeji 15]
“Mwami watuma inkombe; banakazi baikanana ninkamu impati.”—INTEMBAUZYO 68:11