Bbaba lya Simweenzeenze

Sena Lyakalengwa Buya?

● Basimweenzeenze bamwi nobauluka balakonzya kwiima mujulu kakunyina kuuma mababa kwacisela caminiti lyomwe kakunyina kuwida ansi. Ino ncinzi cibapa kuti kabakonzya kucita boobo? Mbolipangidwe bbaba lyabo cipa kuti kabatakatazigwi kuuluka alimwi liliindene kapati ambwaabambidwe mababa andeke.

Amwaalange-lange makani aaya: Ibbaba lyasimweenzeenze lilipapalete kapati alimwi lilipetedwe-petedwe icipa kuti kalitabbookeli. Basayaansi bakajana kuti kupetwa-petwa nkolipetedwe kupa kuti simweenzeenze kakonzya kuuluka mujulu kakunyina kuuma mababa. Magazini iitegwa New Scientist yaamba kuti: “Icipa boobo ncakuti imuya ulazinguluka molipetedwe-petedwe ibbaba akupa kuti simweenzeenze kakonzya kuuluka kakunyina buyumuyumu.”

Nibakamana kwiiya mbolibambidwe ibbaba lya simweenzeenze, basyaabupampu mukupanga ndeke, ba Abel Vargas abeenzinyina bakabona kuti “ikwiiya mbwabambidwe mababa azyintu zyakalengwa a Leza kulagwasya kapati mukubamba tuncini tuuluka mbuli ndeke.” Tuncini tumwi twamusyobo ooyu itukonzya kukkwana mujanza lyamuntu alimwi itujisi kkamela naa kabelesyo kamwi, tulakonzya kubelesyegwa mumilimo minji, mbuli kuzyiba cicitika kubusena kuli ntenda alimwi akubona kusofwaala kwacilawo amuya.

Ino muyeeya buti? Sena bbaba lya simweenzeenze ilipapalete alimwi lipetedwe-petedwe lyakalibeda buyo, naa lyakalengwa buya?

[Cifwanikiso icili apeeji 16]

Kancini kaboneka mbuli simweenzeenze ikalema mamiligilamu aali 120 kalasika kumasentimita aali cisambomwe kulampa alimwi kajisi tubaba tupapalete kapati itupangidwe a silicon itupa kuti kakauluke kwiinda mukubelesya magesi

[Kulumba]

© Philippe Psaila/Photo Researchers, Inc.