Bakubusi Balabuzya

Mbuti Mbondikonzya Kuzuzikizya Mbaakani Zyangu?

INO nciili ncokonzya kusala aali zyeezyi?

● Kutalitenga

● Kuba abeenzinyoko banji

● Kukkomana kapati

Cilakonzyeka kuba azyoonse zyotatwe! Mbuti mbocikonzyeka? Kuti naa waba ambaakani akuzizuzikizya. kolanga-langa twaambo tutobela.

Kutalitenga Kuti naa wabika mbaakani nzyokonzya kuzuzikizya mukaindi kasyoonto, ciyakukuyumya-yumya kutegwa ukacikonzye kuzuzikizya mbaakani zipati. Alimwi cilakonzya kukuyumya-yumya kuzunda buyumu-yumu bwabuzuba abuzuba—mbuli kuyungwa abakubusinyoko. Kuti naa wacita oobo bamwi balakonzya kukulemeka. Bamwi balakonzya kucileka kukuyunga. Alimwi balakonzya kutalika kukulombozya.—Amweezyanisye a Matayo 5:14-16.

Kuba abeenzinyoko banji Bantu banji balamvwa kabotu kukkala abaabo bajisi mbaakani—aabo bacizyi ncobayanda alimwi bayandisya kucicita. Kuti bamwi baba acilongwe anduwe akaambo kambaakani zyako, kanji-kanji balakonzya kukugwasyilizya kutegwa uzizuzikizye mbaakani zyako.—Mukambausi 4:9, 10.

Kukkomana kapati Utayoowi: Tacikkomanisyi kulendelelwa naa kwiide kulindilila zyintu noziyaakuba kabotu mubuumi bwako. Kulubazu lumwi, ikuti naa waba ambaakani akuzizuzikizya cilayumya-yumya. Nkakaambo kaako mwaapostolo Paulo, Imunakristo wamumwaanda wamyaka wakusaanguna ncaakaambila kuti: “Tandibaliki mbuli kuti tandikuzyi nkondiya pe.” (1 Bakolinto 9:26) Alimwi kozyiba kuti, ikuti naa mbaakani zyako kazili zipati, uyookkomana kapati waakuzizuzikizya.

Sena ulilibambilide kutalika? kotenda akuvwunga peeji iili kululyo, akutobela malailile. *

Zibalo zimbi zyakuti “Bakubusi Balabuzya” zilakonzya kujanwa a Intaneti akkeyala ya www. watchtower.org/ype

[Bupanduluzi buyungizidwe]

 ZYAKUYEEYESYA

● Sena cilakonzyeka kuba ambaakani zinji aciindi comwe?—Bafilipi 1:10.

● Sena kusala zyakucita caamba kuti muleelede kuyeeya kufwumbwa ciindi?—Bafilipi 4:5.

[Kabbokesi/Cifwanikiso icili apeeji 25]

Mbokonzya kuzuzikizya mbaakani zyako

KOZIZYIBA Tusimpi 4:25, 26 1

“Mutayoowi kusala mbaakani zipati-pati. Ikuti bamwi bakazizuzikizya mbaakani eezyo, inga mwacikonzya anywebo.”—Roben.

1. Kozizyiba mbaakani nzyokonzya kulisalila. Komusola muzeezo ooyu. Utapengi kuyeeya; kolemba buyo kufwumbwa nzyoyeeya. Kolemba mizeezo iili 10 naa 20.

2. Koilanga-langa mizeezo njowalemba. Ino nguuli muzeezo uukukomanisya loko? Ino nguuli uukatazya kapati? Ino nguuli ngokonzya kukkomanina kuti naa wauzuzikizya? Kozyiba kuti, mbaakani ziinda kubota nzeezyo zijisi mpindu kuli nduwe.

3. Kozyaandaanya. Cakusaanguna, kosala mbaakani nzyokonzya kuzuzikizya mumazuba masyoonto. Wamana, usale nzyokonzya (kuzuzikizya munsondo zisyoonto naa myezi misyoonto). Ulembe manamba kweelana mboyanda kuzizuzikizya.

Citondezyo

Bulongwe Kuba acilongwe aumwi ngootwiipene myaka yakuzyalwa. Kubukulusya cilongwe cakaindi.

Buumi bubotu Kucita zisobano kwamaminiti asika ku 90 nsondo ansondo. Koona kwamaola asika kulusele buzuba-abuzuba.

Cikolo Kucita kabotu muciiyo canamba. Kukaka kweenwa twanoolemba misunko nokuba kuti bamwi bandiyunga kucita oobo.

Zyakumuuya Kubala Bbaibbele kwamaminiti asika ku 15 buzuba-abuzuba. Kukambaukila umwi ngotwiiya limwi nsondo iino.

 [Caption icili apeeji 26]

KOYEEYA Tusimpi 21:5 2

“Kuba ambaakani ncibotu, pesi muleelede kuyeeya mbomukonzya kuzizuzikizya. Kuti naa taakwe nomwacita oobo, mbaakani zyanu zilaba zyabuyo.”—Derrick.

Wamana kusala mbaakani, ucite zyintu eezyi zitobela kumbaakani imwi aimwi:

1. Kolemba mulongo wambaakani zyako.

2. Kolemba deeti noyanda kuzizuzikizya. Kuti mbaakani kaitakwe buzuba bwakuzuzikizigwa cili mbuli ciloto buyo.

3. Koyeeya ncoyelede kucita.

4. Koyeeyela buyumu-yumu mbokonzya kujana. Mpoonya koyeeya ncokonzya kucita kutegwa ubuzunde.

5. Kolisungula. Koba amakanze aakuti uyakubeleka canguzu kutegwa uzuzikizye mbaakani zyako. Lino saina akulemba deeti.

Kwiiya Chingisi kulibambila kuunka kubukuwa July 1

Zyakucita

1. Kujana kabbuku kakozyanisya Chitonga a Chingisi.

2. Kwiiya mabbala ali 10 amu Chingisi mvwiki amvwiki.

3. Kuswiilila kuli bamwi bakanana Chingisi.

4. Kulomba umwi kuti andigwasye kuzyiba mbocikananwa Chingisi.

Buyumu-yumu mbondikonzya kujana

Kuti kakunyina uukanana Chingisi

Ncondikonzya kucita

Kuswiilila kumabbuku aakalekoodwa mu Chingisi aajanika a Intaneti ya www.pr418.com.

․․․․․ ․․․․․

Kusaina Deeti

KOBWEZA NTAAMU! Johane 13:17 3

“Mbaakani zilakonzya kusinkilizyigwa, aboobo mweelede kuzumanana kubelekela mpawo.”—Erika.

Talika cakufwambaana. Ulibuzye kuti, ‘Ino ncinzi ncondikonzya kucita sunu kujatikizya mbaakani zyangu?’ Masimpe, tacikonzyeki kucita zyoonse nzyomwakanza, pesi eeco taceelede kukulesya kuzuzikizya mbaakani zyako. Kweelana ambolyaamba Bbaibbele, “uuyeeya muuwo takonzyi kubyala, ayooyo uulanga mayoba takonzyi kutebula.” (Mukambausi 11:4) Ujane cakucita ndilyonya sunu—nociceya—alimwi akucizuzikizya.

Koziinduluka mbaakani zyako buzuba abuzuba. Koliyeezya mboziyandika mbaakani zyako. Ubone Mboyaambele kwiinda mukukkwenyuna naa kulemba deeti ambaakani njowazuzikizya.

Konyoneka. Nokuba kuti makanze ngojisi mabotu, mukuya kwaciindi ambweni inga ayandika kucinca. Eeco cili kabotu. Takuyandiki kuti ukakatile kumbaakani zyako. Zumanana kuyaambele kusikila ukazizuzikizye mbaakani zyako.

Koyeezyeezya. Kociyeeyela buyo kuti waizuzikizya mbaakani yako. Kolimvwa kubotelwa. Mpoonya, uziinduluke mumizeezo ntaamu ziyandika. Wamana, ubone mbokonzya kwiizuzikizya ambonga walimvwa. Lino kobweza ntaamu.

[Picture]

Mbaakani zili mbuli cifwanikiso caŋanda citondezya mboiya kuba ya kuyakwa, pele kutegwa ikayakwe kuyandika kubeleka canguzu

[Kabbokesi kali apeeji 25]

NZYOBAAMBA BEENZINYOKO

“Ncuuba-uuba kutyompwa kuti kakunyina ncomulangila naa ncomuyanda kuuya kucita. Pesi kuti naa wasala mbaakani nzyoyanda kuzizuzikizya uuya kulimvwa kabotu.”—Reed.

“Mutalipi mulandu ikuti naa mwakakilwa kuzuzikizya mbaakani zyanu muciindi ncomwali kuyanda. Kulimvwa oobo takugwasyi. Amuzumanane buyo kusoleka!”—Cori.

“Amubuzye baabo bakazuzikizya mbaakani zyabo mbuli zyeezyo nzyomwasala. Balakozya kumukulwaizya akumupa malailile aakonzya kumugwasya. Amubaambile bamumukwasyi wanu mbaakani zyanu kutegwa kabamugwasilizya.”—Julia.

[Diagram icili apeeji 24]

(For fully formatted text, see publication)

Kotenda

Kovwunga