Sena Sayaansi Ileendelana Ancolyaamba Bbaibbele?
Ncolyaamba Bbaibbele
Sena Sayaansi Ileendelana Ancolyaamba Bbaibbele?
“Bubotu alimwi alukkomano mulwiiyo lwangu lwasayaansi lulaboola ciindi nondizyiba cintu cimwi cipya akulyaambila kuti, ‘Anu Leza mbwaakacita oobu!’”—BA HENRY SCHAEFER, BASYAAZIBWENE MULWIIYO LWASAYAANSI (CHEMISTRY).
SAYAANSI ilatugwasya kapati mukumvwisya mboibede nyika, kuyubununa zilenge mbozibelekela aamwi, mbozicitika muciindi ceelede, calo cipa kuti bantu banji babone kuti kuli Leza ulaanguzu abusongo buteeli. Mumizeezo yabo, sayaansi taiyubununi buyo mbuli mboibede nyika, pele alimwi ilatondezya mbuli mbwayeeya Leza.
Bbaibbele lilazuminizya kukaambo aaka. Lugwalo lwa Baloma 1:20 lwaamba kuti: “Bube bwakwe [Leza] butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede, noziba nguzu zyakwe zitamani akuti ngu Leza ncobeni.” Mbubwenya buyo, ayalo Intembauzyo 19:1, 2 yaamba kuti: “Kujulu kulaamba bulemu bwa-Jehova, mweenya uukwazeme ulatondezya milimo yamaanza aakwe. Buzuba bulaambila buzubanyina, masiku alazibya masikunyina.” Nokuba kuti bubambe bwanyika bulagambya kapati, pele iyubununa buyo mbazu zisyoonto zyamu Mulengi wesu.
Sayaansi Mpoigolela
Makani manji aakasimpe kujatikizya Leza taakonzyi kuyiigwa kwiinda musayaansi. Mucikozyanyo, sisayaansi ulakonzya kupandulula kabotu zyintu zyoonse zijanika mukkekke, pele sena inga wakonzya kuzyiba kaambo kkekke ncoyapangilwa naa kuzyiba iwapangilwa? Kumibuzyo iili boobu—bantu banji balakonzya kwaamba kuti—sisayaansi weelede kubuzya muntu wapanga kkekke.
Basyaazibwene baku Austria ba Erwin Schrödinger bakaamba kuti sayaansi “ilaamba twaambo twamasimpe, pele kunyina noyaamba zyoonse . . . eezyo nzyotuyandisisya kapati mumyoyo yesu. Eeci cilabikkilizya Leza alimwi abuumi butamani.” Mucikozyanyo, Leza alikke nguukonzya kwiingula mibuzyo eeyi iitobela: Nkaambo nzi ncokuli bubumbo? Nkaambo nzi nyika yesu ncoijisi zyintu zipona zinji? Ikuti naa Leza ngusinguzuzyoonse ncobeni, nkaambo nzi ncalekelede kupenga? Sena kuli bulangizi kulibaabo bafwide?
Sena Leza wakaiingula mibuzyo eeyi? Inzya, Bbaibbele lilaingula mibuzyo eeyi. (2 Timoteyo 3:16) Mulakonzya kulibuzya kuti, ‘mbuti mbondikonzya kusinizya kuti Bbaibbele lyakazwa kuli Leza?’ Kweelana asayaansi, ncolyaamba Bbaibbele kujatikizya nyika azilenge zyeelede kweendelana asayaansi akaambo kakuti Leza takonzyi kulikazya. Sena Bbaibbele lileendelana asayaansi? Amulange twaambo ootu.
Bbaibbele Lyakaamba Zyintu Sayaansi Kaitana
Ciindi Bbaibbele nolyakali kulembwa, bantu banji bakali kusyoma kuti baleza baindene-indene bakali munyika alimwi akuti aaba baleza mbabakali kweendelezya izuba, mwezi, mbobuca, buzyazi alimwi azimwi. Pele oobu tabusi mbocakabede abasinsimi ba Leza bakaindi bana Hebrayo. Mubwini, basinsimi aaba bakalizyi kuti Jehova Leza nguukonzya kweendelezya nyika azilenge alimwi kuti wakali kucita oobu aziindi zyeelede. (Joshua 10:12-14; 2 Bami 20:9-11) Nokuba boobo, ba John Lennox, basyaazibwene munamba baku University of Oxford, ku England, bakaamba kuti aaba basinsimi “tiibakeelede kucileka kusyoma kuti baleza mbabakali kweendeelezya bubumbo . . . , akaambo kakuti tiibakali kusyoma baleza aaba kuzwa kumatalikilo. Icakabagwasya kuti batasyomi mizimo ncakuti bakali kusyoma Leza Mwini-mwini Uuli Alikke, Mulengi wajulu anyika.”
Ino kusyoma ooku kwakabagwasya buti kutasyoma mizimo? Leza mwini-mwini wakabaambila kuti ulazyeendelezya zilenge kwiinda mumilawo naa milazyo iigaminide. Mucikozyanyo, kwamyaka iinda ku 3,500 yainda, Jehova Leza wakabuzya Jobu mubelesi wakwe kuti: “Sa ulizi milao yamajulu?” (Jobu 38:33) Mumwaanda wamyaka waciloba B.C.E., musinsimi Jeremiya wakalemba kujatikizya “milao yakujulu ayaansi.”—Jeremiya 33:25.
Aboobo, boonse bakali kupona kaindi alimwi bakajisi lusyomo mubasinsimi bamu Bbaibbele bakali kukonzya kuzyiba kuti bubumbo bwakali kweendelezyegwa buya kuleka zyintu zitali zyamasimpe, cintu citabeleki kabotu ciindi coonse. Akaambo kaceeci, babelesi ba Leza aaba kunyina nobakali kukotamina zyintu nzyaakalenga Leza, mbuli zuba, mwezi, naa nyenyezi, naa kuzilanganya mbuli kuti nzyintu zyamizimo. (Deuteronomo 4:15-19) Pele, zyintu nzyaakalenga Leza bakazibona kuti zyeelede kuyiigwa akubona busongo, nguzu alimwi abube bumbi bwa Leza.—Intembauzyo 8:3-9; Tusimpi 3:19, 20.
Kweendelana ambobayeeya basayaansi mazuba aano, bana Hebrayo bakaindi abalo bakali kusyoma kuti bubumbo bwakajisi matalikilo. Ibbuku lya Matalikilo 1:1 lyaamba kuti: “Kumatalikilo Leza wakalenga ijulu anyika.” Alimwi kakwiindide myaka iili 3,500, Leza wakaambila Jobu mubelesi wakwe kuti ‘aakaanzikwa nyika taakwe ciliko,’ naa kuti ilaleleenga mujulu. (Jobu 26:7) Kakwiindide myaka iinda ku 2,500, musinsimi Isaya wakalemba kuti nyika ili mbuli mubalo naa bbola.—Isaya 40:22. *
Masimpe, Bbaibbele lileendelana asayaansi kujatikizya nyika. Ibbaibbele alimwi asayaansi zilakonzya kutugwasya kumuzyiba Leza, aboobo tweelede kuzizyiba zyoonse zyobile. Kutabikkila maano kuli cimwi cazyeezyi, inga caba mbuli kusiya cijazyo kacijalidwe cisololela kuluzyibo lwa Leza.—Intembauzyo 119:105; Isaya 40:26.
[Bupanduluzi buyungizidwe]
^ munc. 14 Ikutegwa muzyibe zinji kujatikizya kubako kwa Leza alimwi akululama kwa Bbaibbele, mwalombwa mubale broshuwa yakuti Was Life Created? alimwi abbuku lyakuti Is There a Creator Who Cares About You? akamwaigwa a Bakamboni ba Jehova.
SENA KULI NOMWAKALIBUZYIDE KUTI
● Ino zilenge zitwaambila nzi kujatikizya Leza?—Baloma 1:20.
● Ino makani nzi aakasimpe ajatikizya Leza ngobatakonzyi kuzyiba basayaansi?—2 Timoteyo 3:16.
● Nkaambo nzi basinsimi bakaindi ba Leza wakasimpe ncobatakali kusyoma mumizimo kujatikizya zilenge?—Jeremiya 33:25.
[Majwi aakwelelezya sikubala aali apeeji 25]
Zilenge zyeendelezyegwa —“amilawo iigaminide—“milao yakujulu ayaansi.”—JEREMIYA 33:25