Cintu Cibotu Kwiinda Buumi Bwesu Bwamazuba Aano

Akaluulwa aba Murat Ibatullin

Mu 1987, bacibeela camfwulumende ya Russia cilanganya buponi bwabantu (Ministry of Health) bakandituma kucisi ca Uganda, mu Africa. Ndakazumina kubelekela kucisi eeci kandili dokota kwamyaka yone. Alimwi buya, tiindakali kuyanda kujokela ku Russia, pele ndakali kuyanda kuba aluzyibo ilwakali kukonzya kundigwasya kuyoobelekela kuzisi zimbi mbuli ku Australia, ku Canada, naa ku United States of America. Pele mu 1991, ndakacinca mizeezo yangu, mpoonya ndakajokela ku Russia. Andipandulule.

NDAKAZYALWA mu 1953 mudolopo lya Kazan’, idolopo pati lyamu Republic of Tatarstan, cisi cili akati mu Russia. Bazyali bangu mbamusyobo waci Tatar, alimwi bunji bwabantu bamusyobo ooyu mba Muslimu. Nindakali mwana, ndakali kubona basyaanene abaneene kabafwugama akupaila kuli Allah. Ibana babo, kubikkilizya abazyali bangu bakali kutwaambila kuti tatweelede kubanyonganya akuti katubasiya balikke muŋanda. Bazyali bangu bakali kufwa nsoni akaambo kakuti bakali kutobela ci Kkomunizimu alimwi aciindi eeco tiibakali kusyoma muli Leza.

Ciindi nindakajisi myaka yone yakuzyalwa, ndakaciswa bulwazi bwa polio. Ciindi coonse nindakali mwana cakali kumanina buyo kuzibbadela. Ndilayeeya ciindi basyaanene kabandipailila kuti ndipone. Ndakali kuyanda kuba abuumi bubotu mbuli bana bamwi, nokuba kuti ndakalilemene kukuulu, ndakali kusobana bbola alimwi azisobano zimwi.

Nindakali kukomena, ndakali aaluyandisisyo lwakuya kuba dokotela. Tiindakali kuzulilwa mucikombelo cili coonse, naa kusyoma muli Leza. Tiindakazyi kuti Leza nkwali. Aciindi eeco, tiindakali kwiiyanda njiisyo yaci Kkomyunizimu alimwi ziindi zinji ndakali kukazyanya abataata alimwi abaaisya. Baaisya bakali baiyi baku Yunivesiti, mpoonya bataata bakali kubeleka mucibeela cabasilikani ciitwa kuti KGB (State Security Committee). Ciindi nindakamanizya lwiiyo lwabusilisi, mbaakani yangu yakali  yakuba muntu uucibwene kapati mumulimo wabusilisi (neurosurgeon) alimwi akuunka kuyoobelekela kucisi cimbi.

Kuyandaula Buumi Bubotu

Mu 1984, ndakamanizya lwiiyo luyungizidwe lwabusilisi mumakani aakkansa yakubongo. Mpoonya mu 1987, ndakatumwa ku Uganda kucibbadela caku Mulago. Mebo, amukaintu wangu Dilbar, alimwi abana besu, Rustem iwakajisi myaka iili ciloba alimwi a Alisa iwakajisi myaka yone ciindi nitwakalongela kucisi eeci cibotu. Mulimo kucibbadela wakali muyumu alimwi wakali kubikkilizya akwaandula bantu bajisi kazunda ka HIV. Ziindi zinji ndakali kuunka akuzibbadela zimbi zyamucisi eeci, akaambo kakuti aciindi eeco kwakali buyo basilisi bobilo ibacibwene mumakani aakusilika bulwazi bwansinga ibakali kubeleka mucisi eeci.

Bumwi buzuba, nitwakali mucintoolo cisambalilwa mabbuku, mebo amukaintu wangu twakabona Bbaibbele lyamwaambo waci Russia ciindi cakusaanguna. Twakaula ma Bbaibbele aali mbwaabede akwaatumina beenzuma baku Soviet Union, nkaambo kuciindi eeco cakali kukatazya kuula Bbaibbele. Twakasola kubala zyaandaano zisyoonto kuzwa mu Bbaibbele eeli pele tiitwakali kuzimvwisya, mpoonya twakaleka kulibala.

Nokuba boobo, kwamyaka yotatwe, twakazumanana kuunka kuzikombelo ziindene-indene zyamucisi eeci alimwi twakali kusola kumvwisya nzyobakali kusyoma bantu bamucisi eeci acakali kubapa kukkomana mubuumi. Alimwi ndakatalika kwiiya bbuku lya Koran mumwaambo waci Arabic. Aciindi eeci mebo a Rustem twakali kwiiya mwaambo waci Arabic. Nikwakainda myezi misyoonto kuzwa ciindi nitwakatalika kwiiya ci-Arabic, twakali kucikonzya kubandika abantu mumwaambo ooyu.

Aciindi aawo, twakaswaangana abamisyinali bayiisya Bbaibbele bobilo ba Heinz Wertholz ibakazwa ku Germany abakaintu babo ba Marianne, ibakazwa ku Austria. Mumubandi wesu wakusaanguna, tiitwakabandika makani aajatikizya bukombi. Twakali buyo mbuli bantu bali boonse ibazwa ku Europe baswaangana mu Africa. Twakababuzya ncibakaboolela mu Uganda, mpoonya bakatwaambila kuti bakali bamisyinali, Bakamboni ba Jehova akuti bakaboolela kugwasya bantu kwiiya Bbaibbele.

Mpoonya ndakayeeya ciindi nindakali kucikolo cayunivesiti ku Russia, muciiyo cimwi bakatwaambila kuti cikombelo ca Bakamboni nkakamu kakali kujaya bana akunywa bulowa bwabo. Ndakabaambila ba Heinz aba Marianne makani aaya, mbwaanga ndakalizyi kuti taali aamasimpe. Bakatupa mabbuku obilo aakuti Mulakonzya Kupona Kukabe Kutamani mu Paradaiso Anyika, * mpoonya twakaabala mumawoola masyoonto buyo. Nindakamana kubala, ndakamubuzya Dilbar mbwaakalimvwa, wakandaambila kuti wakazikkomanina kapati nzyaakali kubala cakuti wakafwunduka mpeyo! Ndakamwaambila kuti andime mbondakalimvwa mbweenya oobo.

Kuzwa waawo, twakaba aluyandisisyo lwakubandika aba Heinz aba Marianne alimwi. Nitwakaswaangana alimwi, twakabandika zibalo zinji. Nzitwakaiya mu Bbaibbele zyakatunjila mumyoyo. Twakakulwaizyigwa kwaambila beenzuma nzitwakali kwiiya. Bantu mbotwakaambila babikkilizya baiminizi bacisi ca Russia alimwi abamuzisi zimbi, amwiiminizi wacikombelo ca Katolika wakazwa ku Vatican. Ooyu mwiiminizi wa Katolika wakatugambya naakaamba kuti Cizuminano Cakale “ncakubeja.”

Kujokela Kucisi Cesu

Kakusyeede mwezi omwe kuti tujokele ku Russia mu 1991, mebo a Dilbar twakaba Bakamboni ba Jehova. Twakakanza kuti twaakujokela buyo ku Kazan’, tuyakuzumanana kuswaangana. Cakatutyompya ncakuti, mumyezi yotatwe  katuli ku Kazan’, kunyina Kamboni uuli woonse ngutwakabona, noiba Ŋanda ya Bwami. Aboobo twakatalika kukambauka kuŋanda aŋanda, mbuli cilengwa ca Bakamboni ba Jehova munyika yoonse, nokuba kuti eeci cakali kuyandika kuti katubeleka buyo tolikke. Eeci cakapa kuti tucikonzye kutalisya ziiyo zya Bbaibbele zisyoonto, kubikkilizya amukaintu umwi wakazooba Kamboni kumbele.

Kuzwa waawo, twakaswaigwa a Kamboni uucembeede iwakatambwide kkeyala yesu kuzwa kuli ba Kamboni baku Uganda. Kumane twakatalika kuswaangana akucita miswaangano mukaanda kasyoonto, katuli 15 mukabunga. Twakali kulembelana tugwalo aba Heinz abakaintu babo, cakuti mane bakaboola kutuswaya ku Kazan’. Mukuya kwaciindi, aswebo twakabaswaya ku Bulgaria, kucisi nkobakatumwa kuyoobeleka mulimo wabo wabumisyinali ngobacibeleka asunu.

Cisi Cokwesu Cazyala Micelo Mibotu

Aciindi cili coonse, ndakali kubandika kasimpe kamu Bbaibbele ababelesima muzibadela zyaku Russia. Mukuya kwaciindi, banji bakakatambula kasimpe akuba Bakamboni ba Jehova, kubikkilizya amusilisima umwi. Mu 1992, kuzwa ciindi nitwakasika mu Kazan’, mukabunga kesu kaba Kamboni twakavwula kusika ku 45, mpoonya mwaka wakatobela twakainda ku 100. Mazuba aano mu Kazan’, kuli mbungano zili ciloba zya Bakamboni—zyosanwe zili mumwaambo waci Russian, yomwe ili mumwaambo waci Tatar, alimwi iimbi njamwaambo wakutambaika. Alimwi kuli akabunga kamwaambo waci Armenian alimwi a Cingisi.

Mu 1993, ndakajanika kumuswaangano wabusilisi mudolopo lya New York, kwalo nkondakaswaya maofesi mapati aa Bakamboni ba Jehova ku Brooklyn. Ndakabonana aba Lloyd Barry, ibakali kugwasilizya mukulanganya mulimo wabukambausi wa Bakamboni ba Jehova nyika yoonse. Nokuba kuti bakajisi bubi, bakajana ciindi cakubandika andime.

Twakabandika kujatikizya penzi lyakubula mabbuku mumwaambo waci Tatar. Nikwakainda myaka misyoonto, kwakabambwa kabunga kabasanduluzi bamwaambo ooyu mucisi ca Russia, alimwi mabbuku akatalika kumwaigwa mumwaambo ooyu. Eelo kaka twakakkomana kapati kutambula magazini ya Ngazi Yamulindizi, imagazini yakabambilwa kwiiya Bbaibbele! Kuzwa ciindi eeco, imbungano yamwaambo waci Tatar yakatalika.

Kutabelesya Bulowa Mubusilisi

Ndilaitobela milawo ya Leza mumakani aakulilemeka, iibikkilizya alulayo luli mulugwalo lwa Milimo 15:20, ilwaambila mubelesi wa Leza kuti ‘abutantamuke . . . bulowa.’ Mukapango 29 Ibbaibbele liyungizya kuti babelesi ba Leza beelede “[ku]zumanana kutantamuka zyintu zituulwa kumituni, bulowa, zisinidwe alimwi abwaamu.”

Aboobo, ciindi Bakamboni ba Jehova nobayandaula busilisi, balabalomba bamadokota kuti bakulemeke kusala kwabo mumakani aakutabelesya bulowa nobasilikwa. Kwaciindi cino, ndibeleka mukkomitii iitwa kuti: Hospital Liaison Committee yaba Kamboni ba Jehova. * Mu 1997, ciindi mwana uujisi mwaka omwe wazyina lya Pavel, iwakazwa mudolopo lya Novosibirsk naakali kuyandika kwaandulwa cakufwambaana, banyina bakalomba kugwasyigwa. Aciindi eeco, kwakali buyo bamadokotela basyoonto mu Russia ibakalyaabide kuubeleka mulimo ooyu wakwaandula kakunyina kubelesya bulowa. Twakabagwasya kuyandaula dokotela wakali kukonzya kuubeleka mulimo ooyu.

Nokwakainda kaindi kasyoonto, twakabajana bamadokotela kucibbadela cimwi ku Kazan’ ibakazumina kumwaandula Pavel kakunyina kubelesya bulowa. Mu March 31, 1997, bakacikonzya kumwaandula  kabotu-kabotu kakunyina kubelesya bulowa akumusilika bulwazi bwakwe bwamoyo. Mu April 3, muteende wiitwa kuti Vechernyaya Kazan wakaamba kuti: “Mwana musankwa ooyu wakapona alimwi tayandiki musamu wamoyo . . . Lino banyina bakaanguluka kupenzi ndyobakajisi kwamyezi iili 11.” Muciindi buyo cisyoonto, cilonda ca Pavel cakapona alimwi wakacikonzya kweendeenda mucibbadela.

Lino Pavel upona buumi buli kabotu. Ulacikonzya kusobana bbola, alimwi akuyamba. Uli mubbuku lya lusele kucikolo alimwi ulakomba antoomwe abanyina mumbungano ya Bakamboni ba Jehova mudolopo lya Novosibirsk. Nibakamana kubeleka mulimo wakwaandula bantu kakunyina kubelesya bulowa, bamadokotela mucibbadela eeci bakacikonzya akwaandula Bakamboni ba Jehova bambi. Busilisi oobu mu Tatarstan bucizumanana kubeleka kakunyina kubelesya bulowa.

Mulimo Ngondibeleka Lino

Mebo amukaintu wangu, kubikkilizya a Bakamboni bamwi, tubeleka mucibbadela cipa busilisi kubalwazi baciswa moyo alimwi amalwazi aambi. Tulabeleka mumilimo yakwaandula iindene-indene, kwaambisya kwaandula balwazi kakunyina kubelesya bulowa. Ndibeleka mulimo wakusilika malwazi aansinga zyamumubili alimwi akuzumanana kuyungizya luzyibo mukwaandula kakunyina kubelesya bulowa. Mbondili mupati mucibeela cabasilisi bansinga acikolo cipati ca State Medical University ku Kazan’, ndilayiisya basicikolo abamadokotela alimwi ndilasoleka kubagwasya kubona bubotu bwakubelesya misamu iimbi muciindi cakubelesya bulowa. *

Mebo amukaintu wangu tubeleka kucibeela cilanganya milambi amoyo . Tulaukkomanina mulimo ngotucita nkaambo tulaponya bantu. Pele citukkomanisya kapati, nkugwasya bantu kwiiya Bbaibbele akubona kasimpe mbokabaponya kumuuya naa kubagwasya kuba acilongwe a Jehova. Cilatukkomanisya kapati kwaambila bantu kujatikizya zisyomezyo zya Leza zyakuti lino-lino munyika yoonse, “takukooyooba naba omwe akati kabantu banyika uuamba kuti, Ndaciswa.”—Isaya 33:24.

[Bupanduluzi buyungizidwe]

[Cifwanikiso icili apeeji 26]

Kandili musilisi mu Africa

[Cifwanikiso icili apeeji 27]

Ciindi mebo amukaintu wangu nitwakatalika kwiiya Bbaibbele aba Kamboni ba Jehova, mu 1990

[Cifwanikiso icili apeeji 28]

Ciindi nitwakaswayide ba Lloyd Barry ku Brooklyn, mu New York mu 1993

[Cifwanikiso icili apeeji 29]

Pavel abanyina mazuba aano

[Cifwanikiso icili apeeji 29]

Katuli mumulimo wabukambausi amukaintu wangu, Dilbar