Kusweekelwa Kupati

Nicolle wakali mwana musimbi iwakajisi buumi buli kabotu. Pele bumwi buzuba wakatalika kutongooka mutwe, mpoonya bazyali bakwe bakamutola kucibbadela. Buzuba bwakatobela nobakacili kumulanga-langa basilisi, wakaciswa bulwazi bwamoyo. Nobakamupima bakajana kuti wakajisi kazunda kalo kakatabukila kumapunga, kunsa akumoyo. Mpoonya nokwakainda mawoola aali 48, Nicolle wakafwa. Wakajisi buyo myaka yotatwe yakuzyalwa.

KUFWIDWA muyandwa wesu, ncintu cicisa kapati. Zimwi ziindi, kusweekelwa kuli boobu inga kwapa muntu kulimvwa mbuli kuti takonzyi kuliyumya. Ba Isabelle, banyina Nicolle bakaamba kuti: “Ndilamuyeeya kapati Nicolle. Ndilayeeya mbwaakali kundikumbatila akundiyanda. Alimwi ndilayeeya mbwaakali kundiletela maluba-luba buzuba abuzuba. Ciindi coonse ndilamuyeeya Nicolle.”

Sena anywebo mwakafwidwa kale muyandwa wanu—ambweni mwanaanu, ngomukwetene limwi, mwanookwanu, bazyali banu naa mweenzinyoko? Kuti naa mboobo, ino mbuti mbomukonzya kuliyumya kupenzi lyanu?