Ncolyaamba Bbaibbele

Kwaambaula Kabotu Ncokuyandika

Nibakamana kubandika munzila yabulemu amukaintu umwi—musololi umwi katazyi kuti maikulofoni tainazimwa—wakatalika kutongooka akwaamba kuti mukaintu ooyu tayeeyi kabotu akuti kubota balindizi bakwe nibatamuzumizya kusika afwaafwi anguwe. Bantu boonse mucisi bakagambwa kuli nzyakaamba kujatikizya mukaintu ooyu. Aboobo, akaambo kakulibisizya zyina nkwaakacita, cakapa kuti atasalwi mukusalwa kwamusololi kwakazoocitika mumazuba aali lusele kumbele.

KUNYINA muntu uunga wacikonzya kulweendelezya kabotu lulimi lwakwe. (Jakobo 3:2) Nokuba boobo, icakacitika caambwa atala aawa citondezya kuti majwi alakonzya kumujatikizya. Impuwo yanu, mulimo alimwi ambomucikonzya naa kwaalilwa kuyanzana abamwi kuyeeme ambomwaambaula.

Pele sena mwalizyi kuti majwi aanu alakonzya kucita zinji? Ibbaibbele lyaamba kuti kwaambaula kwanu kutondezya bwini mbomubede. Jesu wakaamba kuti: “Mulomo waamba zizwide mumoyo.” (Matayo 12:34) Mbwaanga majwi aanu atondezya mbomulimvwa ambomuyeeya, cilayandika kuti mulilingule kujatikizya mbomwaambaula. Sena Bbaibbele inga lyagwasya? Amulange-lange twaambo tutobela.

Mbomukonzya Kucizyiba Kwaambaula Kabotu

Majwi atalikila mumizeezo. Kutegwa kamucikonzya kwaambaula kabotu, mweelede kuzilanga-langa alimwi akuziyeeyela kabotu nzyomuyanda kwaamba. Kubona mbomukonzya kulibelesya Jwi lya Leza kulakonzya kumugwasya mbomuyeeya, calo cikonzya kumupa kucinca mbomwaambaula.

Amuzuzye myoyo yanu azyintu zibotu. Ibbaibbele lilazipandulula zyintu zibotu noliti: “Kufwumbwa zyintu zipegwa bulemu, kufwumbwa zyintu ziluleme, kufwumbwa zyintu zisalala, kufwumbwa zyintu ziyandika, kufwumbwa zyintu zili ampuwo mbotu, kufwumbwa zyintu zili kabotu, alimwi kufwumbwa zyintu zitembaulika, kamuzumanana kuziyeeyesya zyintu eezyi.”—Bafilipi 4:8.

Kutobela malailile aaya kuyoomugwasya kugwisya mizeezo mibyaabi mumyoyo yanu. Kamuyeeya kuti mizeezo yanu ilanyonganizigwa azyintu nzyomweebelela naa kuswiilila. Kutegwa mweelebe mizeezo mibyaabi, amweelebe zyintu zikonzya kumuyunga. Amutantamuke nkondo alimwi amicito iiletela muzeezo wakoonana. (Intembauzyo 11:5; Baefeso 5:3, 4) Muciindi caboobo, amugamike mizeezo yanu kuzyintu zibotu. Ibbaibbele lilakonzya kumugwasya kucita boobo. Mucitondezyo, amubale Tusimpi 4:20-27; Baefeso 4:20-32; alimwi a Jakobo 3:2-12. Amubone kubelesya njiisyo zili mumagwalo aaya mbokukonzya kumugwasya kucizyiba kwaambaula kabotu. *

Kamusala majwi aakwaamba. Lugwalo lwa Tusimpi 12:18 lwaamba kuti: “Majwi aabantu bamwi alayasa mbuli ipanga, pele lulimi lwabasongo lulaponya.” Kuti naa ziindi zinji mulaamba majwi ‘aayasa’ naa aacisa bamwi, nkokuti mweelede kuyeeya kamutanatalika kwaambaula. Amutobele njiisyo iyandika kapati iijanika mulugwalo lwa Tusimpi 15:28 iyakuti: “Moyo wamululami ulayeeya kabotu mbweelede kuvuwa, pele milomo yabasizibi ilatuntumuna bubi.”

Amulibikkile mbaakani. Mumwezi uuboola, amukanze kutaamba kufwumbwa cintu casaanguna  kuboola mumizeezo, ikapati kuti kamunyemede. Muciindi caboobo, amubikkile maano kumagwalo aabikkidwe mucibalo eeci, akusoleka canguzu kwaambaula munzila yabusongo, yaluyando alimwi acakukkazyika moyo. (Tusimpi 15:1-4, 23) Pele tacigoleli buyo waawa pe.

Amulombe lugwasyo kuli Leza kwiinda mukupaila. Imulembi wa Bbaibbele wakapaila kuti: “Majwi aamulomo wangu amiyeeyo yamumoyo wangu, zyoonse zitambulike kumeso aako, O Jehova.” (Intembauzyo 19:14) Amumuzibye Jehova Leza mbomuyanda kubelesya ŋambawido yanu kuti mumukkomanisye alimwi akubamba cilongwe abamwi. Lugwalo lwa Tusimpi 18:20, 21 lwaamba kuti: “Kumicelo yamulomo wakwe muntu ulakuta; iizwa kumilomo yakwe ilamukutya. Lufu abuumi, zyoonse zili mujanza lyalulimi.”

Amubelesye Jwi lya Leza kulilingula. Ibbaibbele lili mbuli cimboni-mboni ncomukonzya kubelesya kulilingula. (Jakobo 1:23-25) Mucikozyanyo, nomuyeeya twaambo ootu twamu Bbaibbele, amulibuzye kuti, ‘Ino ŋambawido alimwi ampuwo yangu zili buti?’

“Kuvuwa kabotu kulalesya bukali, pele majwi mabi alabusya inkondo.” (Tusimpi 15:1) Sena mwaambaula munzila yabubombe, yakubamba luumuno?

“Kutazwi jwi libolede neliba lyomwe mukanwa mwanu, pele buyo ijwi lili kabotu kukuyaka bamwi kweelana abukkale aciindi eeco, kutegwa libe jwi likonzya kubagwasya aabo baswiilila.” (Baefeso 4:29) Sena ŋambawido yanu ilabayaka aabo bamuswiilila?

“Majwi aanu kaakondelezya lyoonse, aalweezyedwe kabotu amunyo kutegwa muzyibe mbomweelede kumwiingula muntu umwi aumwi.” (Bakolose 4:6) Sena mulasoleka nomuba mubukkale bukatazya, kutegwa zyoonse nzyomwaamba kazikondelezya alimwi akulimvwisya kubantu bamuswiilila?

Kwiinda mukubambulula aayelede kweelana anzyomwabona mucimboni-mboni, muyakuboneka kabotu kubantu bamwi alimwi anywebo muyakukkomana. Mbubwenya buyo andinywe muyakucizyiba kugwasyigwa akwaambaula kabotu kwiinda mukulilanga mucimboni-mboni, calo cili ndi Jwi lya Leza.

[Bupanduluzi buyungizidwe]

SENA KULI NOMWAKALIBUZYIDE KUTI

● Ino ŋambawido yangu itondezya nzi? —Luka 6:45.

● Ino mbuti mbomweelede kwaambaula abamwi?—Baefeso 4:29; Bakolose 4:6.

● Ino nzyintu nzi zikonzya kumugwasya kutegwa mucizyibe kwaambaula kabotu?—Intembauzyo 19:14; Bafilipi 4:8.

[Cifwanikiso icili apeeji 25]

Nzyotwaamba zilabujatikizya bukkale alimwi azilongwe abamwi