Luumbulizyo Kulibaabo Balila

“Jehova uli afwaafwi kubawizukide mumoyo.”—Intembauzyo 34:18.

CIINDI muyandwa wanu naafwa, mulakonzya kujana mapenzi manji aakonzya kumupa kulimvwa kulemenwa, kutyompwa, kuusa, alimwi ndiza akulipa mulandu naa kunyema. Mbubwenya mbukwaambwa kale mucibalo cainda, toonse tuliindene mbotulimvwa. Aboobo, tamukonzyi kulimvwa boobu lyoonse, pele anywebo inga kamulitondezya kuusa munzila iindene ambobalimvwa bamwi. Nokuba boobo, kuti kamuyanda kutondezya buumba, tacilubide pe kucita boobo.

“Mweelede Kulila!”

Ba Heloisa, badokota ibaambwa kumatalikilo, bakasola kuliyumya kubuumba ciindi banyina nibakafwa. Bakaamba kuti: “Kumatalikilo ndakalila, mpoonya ndakaliyumya—mbubwenya mbondakali kucita ciindi mulwazi uuliwoonse naafwa. Cakatobela ndakatalika kuciswa-ciswa. Malailile kuli baabo ibakasweekelwa bayandwa babo ngakuti: Mweelede kulila! Amulile kutegwa mulimvwe kabotu. Eeci ciyakumugwasya kapati.

Nokuba boobo, mukuya kwaciindi, muyakulimvwa bwakalimvwa ba Cecília, ibakafwidwa balumi babo ibakaciswa bulwazi bwakkansa. Bakaamba kuti: “Zimwi ziindi ndilatyompwa akaambo kakulimvwa mbuli kuti bantu bandiyeeyela kuti lino ndeelede kucileka kulila naa ndeelede kuti kandilubide kuciindi cino.”

Kuti kamujisi mizeezo iili boobo, amuzyibe kuti kunyina muntu weelede kumwaambila mbomweelede kulila. Bamwi balacikonzya kuliyumya. Bamwi balaalilwa. Aboobo, kunyina muntu weelede kumupimina ciindi cakuleka kulila. *

Pele ino mbuti ikuti kamulimvwa kuti buumba tabukamani alimwi akuti bumupa kuciswa-ciswa? Ndiza bukkale bwanu bulikozyenye abukkale bwamwaalumi mululami Jakobo, ciindi nakaambilwa kuti mwanaakwe, Josefa wafwa, “wakakaka kuumbulizigwa.” (Matalikilo 37:35) Kuti naa mbomwakacita andinywe oobo, ino nintaamu nzi nzyomweelede kubweza kutegwa mutazundwi abuumba?

Amulikwabilile. Ba Cecília bakaamba kuti: “Zimwi ziindi ndilalimvwa kukatala kapati  mpoonya ndilazyiba kuti ndilaciindizya kuba abuumba.” Majwi aaya atondezya kuti buumba bulakonzya kupa muntu kuciswa. Aboobo, mweelede kubikkila maano kubuumi bwamu. Mweelede kuba aciindi cakulyookezya alimwi akulya zyakulya zipa busani mumubili.

Kulakonzya kumoyo kakusiya, kamutayandi kulya, nokuba buyo kuula alimwi akujika zyakulya. Pele, kutalya zyakulya zipa busani kulakonzya kumupa kuciswa, alimwi eeci cilakonzya kuyungizya kuusa kwanu. Mweelede kutalika kulya zyakulya zisyoonto kutegwa mukwabilile buumi bwanu bubotu. *

Kuti kacikonzyeka, mweelede kucita zisobano zyakunyanyaasya mubili, nokuba kweenda amaulu buyo. Kucita milimo yakumubili kulakonzya kumupa kuti kamweendeenda. Kuyungizya waawo, kucita zisobano zyakunyanyaasya mubili kulapa kuti mubili ugwisye musamu mubongo wiitwa kuti endorphins mu Cingisi, walo uupa kuti muntu alimvwe kabotu.

Amuzumine kugwasyigwa abamwi. Eeci cilakonzya kumugwasya kuti ngomukwetene limwi wafwa. Ndiza mwakali kubelekela antoomwe alimwi akulanganya mikuli imwi, mpoonya lino milimo imwi ilacaala kakunyina wiilanganya. Mucikozyanyo, kuti ngomwakakwetene limwi wakali kulanganya bweende bwamali naa zimwi ziyandika muŋanda, kumatalikilo cilakonzya kumukatazya kulanganya mukuli ooyu  nyolikke. Mubukkale buli boobu, lulayo lwabupampu luzwa kubalongwe lulakonzya kugwasya.—Tusimpi 25:11.

Ibbaibbele lilamupandulula mulongwe mwini-mwini kuti “munyina wazyalilwa mapenzi.” (Tusimpi 17:17) Aboobo tamweelede kukaka kugwasyigwa abamwi kamuyeeya kuti kucita boobo kulakonzya kulibonya mbuli kuti mulabakatazya. Muciindi caboobo, kuyanzana abantu kulakonzya kumugwasya mubukkale oobu bubyaabi bwabuumba. Bakaintu bazyina lyakuti Sally ibakafwidwa banyina, bakajana kuti kuyanzana abantu kulagwasya kapati. Bakaamba kuti: “Balongwe bangu banji bakali kunditamba kukuyanzana ambabo kumapobwe aabo. Eeci cakandigwasya kuti kanditalendelelwi kapati. Ndakali kukkomana kapati ciindi bantu nobakali kundibuzya mibuzyo mbuli yakuti, ‘Ino mbuti mbomwacikonzya kuliyumya kuzwa ciindi banyoko nobakafwa?’ Ndakajana kuti kubandika kujatikizya bamaama kwakandigwasya kapati.”

Mweelede kuba aciindi cakuyeeya. Kamusola kuyeeya zyintu zibotu nzyomwakali kucita amuyandwa wanu wakafwa, ndiza kwiinda mukulanga acifwoto cakwe. Masimpe ngakuti kumatalikilo, kuyeeya ziindi zili boobu takukkomanisyi. Pele, mukuya kwaciindi, kuyeeya kuli boobu kulakonzya kugwasya, ikutali kumupa kulimvwa kutakkomana.

Mulakonzya kusola kujana kabbuku kakulembela zyintu zyakamucitikila. Mukabbuku aaka mulakonzya kulemba zyintu zibotu nzyomuyeeya alimwi buya akubikkilizya majwi ngomuyeeya kuti nimwamwaambila muyandwa wanu ikuti naacili kupona. Cilakonzya kumugwasya kuti kamubala nzyomwakalemba, calo cikonzya kumupa kulimvwa kabotu akukkomana. Alimwi kulemba kulakonzya kumugwasya kuti kamuliyumya.

Sena mweelede kuyobola zyintu zimwi zyamufwu kutegwa kazimuyeezya nguwe? Mukaambo aaka kunyina mulawo uubikkidwe, alimwi tacigambyi nkaambo muntu uuli woonse uliindene mbwalila. Bamwi bayeeya kuti kuyobola zyintu zyamufwu kulakonzya kubapa kuti bamuke kuluba. Bamwi bajana kuti cilagwasya. Ba Sally baambwa kumatalikilo baamba kuti: “Ndakaziyobola zyintu zyakali zyabaama. Eeci cilandigwasya kapati kuliyumya.” *

Amusyome muli “Leza siluumbulizyo loonse.” Ibbaibbele lyaamba kuti: “Bika makani aako oonse mumaanza aa-Jehova, lino ulakutabilila.” (Intembauzyo 55:22) Mupailo kuli Leza tauli buyo cintu cipa kuti mulimvwe kabotu. Pele ninzila iini-ini alimwi yakwaambaula a “Leza siluumbulizyo loonse uutuumbulizya mumapenzi eesu oonse.”—2 Bakolinto 1:3, 4.

Ijwi lya Leza Bbaibbele, ndelyuumbulizya kapati. Mwaapostolo Munakristo Paulo wakaamba kuti: “Ndilijisi bulangizi kuli Leza . . . kuti kuyooba bubuke bwabantu baluleme abataluleme.” (Milimo 24:15) Kuyeeya bulangizi bwabubuke buli mu Bbaibbele kulakonzya kumuumbulizya kapati ciindi nomuli mubuumba  bwakusweekelwa muyandwa wanu. * Ba Lauren, ibakaintu bakafwidwa mwanookwabo musankwa muntenda, bakajana kuti kaambo aaka nkamasimpe. Bakaamba kuti: “Ciindi nindakali kulimvwa buumba, ndakali kubala Bbaibbele nokaba kapango komwe buyo. Ndakali kusala tupango twakali kukonzya kunduumbulizya, akutubala cakwiinduluka-induluka. Mucikozyanyo, ndakaumbulizyigwa kapati kumajwi aa Jesu ngaakaambila Marta ciindi Lazaro naakafwa. Wakamwaambila kuti: ‘Imunyoko ulabuka.’”—Johane 11:23.

“Taceelede Kumutyompya”

Nokuba kuti cilakonzya kukatazya, kuliyumya nomuli mubuumba ciyoomugwasya mubuumi. Mutalipi mulandu wakuti, ikuti naa mwaliyumya, eeci caamba kuti tamumuyandi muntu ooyo wakafwa. Masimpe ngakuti tamukamulubi muyandwa wanu pe. Zimwi ziindi tulakozya kubayeeya bantu bakafwa, pele asyoonto-syoonto buumba bulakonzya kumana.

Mulakonzya kuyeeya zyintu zibotu nzyomwakacita antoomwe. Mucikozyanyo, ba Asyley, ibaambwa kumatalikilo bakaamba kuti: “Ndilayeeya buzuba kabatanafwa baama. Bakali kulibonya kuti bapona, alimwi mbobuzuba mbobakabuka mubulo kuzwa ciindi nibakatalika kuciswa. Ciindi bapati bangu bakaintu nibakali kubakamuna masusu baama, toonse totatwe twakali kuseka, cakali ciindi cakusaanguna kubabona kabaseka kuzwa ciindi nibakatalika kuciswa. Bakalikkomene kuba andiswe tobana babo.”

Mulakonzya kuyeeya zyintu nzyomwakaiya kuzwa kumuyandwa wanu naakacili kupona. Mucikozyanyo, ba Sally bakaamba kuti: “Baama bakalicizyi kuyiisya. Bakali kupa lulayo munzila yaluyando, alimwi bakandiyiisya kusala camaano izyakucita, ikulisalila, kutali kutobela buyo nzyobandaambila balo naa bataata.”

Kuyeeya muyandwa wanu inga yaba nenzila iikonzya kumugwasya kumana buumba. Alex, imukubusi umwi wakabona kuti kaambo aaka nkamasimpe. Wakaamba kuti: “Nibakafwa bataata, ndakazumanana kupona kweelana ambobakandiyiisya—kuti ndeelede kukkomana mubuumi. Kuli baabo bakafwidwa bazyali, ndibaambila kuti: Tamukalulubi lufwu lwabazyali banu, pele eeci taceelede kumutyompya. Mweelede kulila kweelana ambomulimvwide, pele eeci taceelede kumulesya kukkomana mubuumi bwanu.”

[Bupanduluzi buyungizidwe]

[Majwi aakwelelezya sikubala aali apeeji 8]

“Ciindi nindakali kulimvwa buumba, ndakali kubala Bbaibbele, nokuba kuti zimwi ziindi nkapango komwe buyo” —Oobu mbobakaamba ba Lauren

[Kabbokesi/Cifwanikiso icili apeeji 7]

MBOMUKONZYA KUZUNDA PENZI LYAKULIPA MULANDU

Ndiza mulimvwa kuti muyandwa wanu wakafwa akaambo kakuti tiimwakali kumubikkila maano. Ikuzyiba kuti kulipa mulandu ncintu ncobalimvwa bantu boonse, cilakonzya kumugwasya kapati. Nokuba boobo, tamweelede kufwida mumoyo. Ikwaamba mbomulimvwa kulakonzya kumupa kulimvwa kwaanguluka.

Nokuba boobo, amuzyibe kuti notumuyanda buti muntu, tatukonzyi kweendelezya buumi bwakwe, nokuba kumukwabilila “[mu]ziindi zyalufu azyamapenzi.” (Mukambausi 9:11) Kunze lyaboobo, tiikwakali kuyanda kwanu. Mucikozyanyo, sena kumuka kusika kucibbadela caamba kuti mwakayanda kuti muyandwa wanu aciswe kapati akufwa? Peepe! Aboobo, sena eeco caamba kuti mujisi mulandu kulufwu lwamuntu ooyo? Peepe.

Imukaintu umwi wakaiya mbwakonzya kuzunda penzi lyakulipa mulandu ciindi mwanaakwe musimbi naakafwa muntenda yamootokala. Wakaamba kuti: “Ndakalipa mulandu akaambo kakuti ndime ndakamutumide. Pele ndakazyiba kuti tiindakeelede kulimvwa boobo pe. Kunyina cakalubide pe mukumutuma kuti aunke abausyi. Yakali buyo ntenda.”

Mulakonzya kwaamba kuti: ‘Pele kuli zyintu zinji nzindakeelede kwaamba naa kucita.’ Aayo masimpe. Pele sena kuli muntu uulondokede? Ibbaibbele lilatuyeezya kuti: “Toonse tulalubizya ziindi zinji. Ikuti naa kuli uutalubizyi mukwaambaula, ooyo muntu ulilondokede.” (Jakobo 3:2; Baloma 5:12) Aboobo amukazumine kaambo kakuti tamulondokede pe. Ikuzumanana kuyeeya zyintu nzyomwatakacita naa nzyomwatakaamba takukonzyi kucinca cintu cili coonse pe, muciindi caboobo inga kwamupa kuti mutafwambaani kuzyibila. *

[Bupanduluzi buyungizidwe]

[Cifwanikiso icili apeeji 6]

Zimwi ziindi, muzyali mupati uuli mubuumba ulakonzya kuumbulizya mwana mupati uuli mubuumba

[Zifwanikiso izili apeeji 9]

Kuba aakabbuku kakulembela zyintu zyakamucitikila, kweebelela zifwoto alimwi akulomba lugwasyo, nenzila zimwi zikonzya kumugwasya kuliyumya