Mbotukonzya Kuliyumya Ciindi Muntu Ngotuyanda Naafwa
Mbotukonzya Kuliyumya Ciindi Muntu Ngotuyanda Naafwa
“Nindakamvwa mulumbe walufwu lwabataata ndakagambwa alimwi ndakatyompwa. Ndakalimvwa kuba amulandu akaambo kakuti tiindakali munsi-munsi ciindi nibakafwa. Kunyina cikonzya kweezyanisyigwa kukucisa nkomukonzya kumvwa ciindi nomwasweekelwa muyandwa wanu mulufwu. Ndilabayeeya kapati bataata!”—Oobu mbobakaamba ba Sara.
KUNYINA makani acilengwa naa bukombi mobazulilwa bantu, cilabayumina kwaamba kujatikizya lufwu. Mumyaambo iimbi kuli maambila mbali manji ngobabelesya kusola kupandulula lufwu. Mu Chitonga, muciindi cakwaamba kuti muntu “wafwa,” baamba kuti “wazimina,” “watusiya” akuti “waloba.”
Nokuba boobo, naaba mabala mauba-uba aali boobu taakonzyi kucesya buumba mbobamvwa bantu bafwidwa muyandwa wabo. Bantu bamwi balausa kapati cakuti cilabaalila akuzumina kuti muntu wafwa ncobeni.
Kuti naa mwakafwidwa kale muyandwa wanu, anywebo cilamukatazya kuliyumya naa kuzumina kujatikizya kufwidwa ooko. Ndiza mwakali kulitondezya kuti mulaliyumya, kakuli kuti mumoyo mwakaluuside. Bwini mbwakuti, toonse tuliindene mbotulimvwa. Aboobo, kuti kamutalitondezyi kuti muluuside, eeci tacaambi kuti mulabusinkilila buumba. * Nokuba boobo, mapenzi alakonzya kuboola ikuti naa kamuyanda kukkomanisya bamwi, mbuli banamukwasyi mbomuyeeya kuti bayanda kuti kamutondezya buumba mbubwenya mbuli mbabo.
“Ndakanyina Aciindi Cakulila”
Amubone cakabacitikila ba Nathaniel, ibakajisi myaka iili 24 ciindi banyina nobakafwa. Bakaamba kuti: “Kusaanguna, ndakakopana. Ndakalimvwa kuti ndeelede kugwasya bataata alimwi abalongwe babaama ibakali mubuumba. Ndakanyina aciindi cakulila.”
Nokwakainda mwaka omwe, ba Nathaniel bakabona kuti bakacili kulimvwa buumba kukusweekelwa kwabo kupati. Bakaamba kuti: “Bataata zimwi ziindi inga balanditumina luwaile kwaamba kujatikizya buumba bwabo, calo icibagwasya kapati. Balayandika kwaambaula makani aajatikizya baama alimwi ndililibambilide kubagwasya. Nkuti buyo ciindi nendiyanda lugwasyo, ndilimvwa mbuli kuti ndinyina kwakuunka.”
Basikupa lugwasyo—kubikkilizya abasyaazibwene mumakani aabusilisi balo kanji-kanji bajanika ciindi muntu nafwa—abalo inga balimvwa kuti beelede kuliyumya kutegwa kabatalili. Amubone cikozyanyo caba Heloisa, bakaintu ibabeleka mulimo wabudokotela kwamyaka iinda ku 20. Bakali kubelekela mucilawo bantu mobakazyibene kapati, aboobo abalo bakalizyibene kapati abalwazi babo. Bakaamba kuti: “Ndakababona banji kabafwa alimwi bamwi bambabo bakali balongwe bangu.”
Ba Heloisa bakabona kuti kulila yakali nzila mbotu yakumana buumba. Bapandulula kuti: “Cakandiyumina kapati kulila, ndakayeeya kuti ndakeelede kuliyumya kutegwa ndigwasye bamwi kwiinda mukutalila. Ndakalizyi kuti bamwi mbobakali kundiyeeyela oobo.”
“Ŋanda Yakandikomenena”
Kulendelelwa ndepenzi lipati ndyobajana aabo bafwidwa bayandwa babo. Mucikozyanyo, Ashley, wakajisi myaka iili 19 ciindi banyina nobakafwa abulwazi bwakkansa. Wakaamba kuti: “Ndakalendelelwa kapati. Baama bakali balongwe bangu beni-beni. Ndakali kukkala ambabo kwaciindi cilamfwu!”
Ashley cakali kumukatazya kuboola kuŋanda abuzuba akujana kuti banyina tabako kuŋanda. Wakaamba kuti: “Ŋanda yakandikomenena. Ziindi zinji ndakali kuunka kuzyuli lyangu akutalika kulila kumwi kandilanga zifwoto zyabo akuyeeya zyintu nzyotwakali kucita antoomwe.”
Kufwumbwa naa mwakasweekelwa umwi wamumukwasyi, naa mulongwe wanu mulufwu, amusyome kuti, tamuli nyolikke pe nomuli mubuumba. Banji bajana nzila mbotu yakuliyumya mbubonya mbotutiibone aansi aawa.
[Bupanduluzi buyungizidwe]
^ munc. 5 Akaambo kakuti muntu amuntu uliindene mbwalimvwa caboola kumakani akuusa, inga kwaba kulubizya kubayeeyela mizeezo iitaluzi aabo ibatalitondezyi caantangalala mbobalimvwa ciindi muyandwa wabo naafwa.
[Majwi aakwelelezya sikubala aali apeeji 5]
“Ndakalendelelwa kapati. Baama bakali balongwe bangu beni-beni”—Oobu mbwaakaamba Ashley.
