Nzyobaamba Bazyali

Myaka yabukubusi ileta buyumuyumu kubazyali banji. Ino mbuti mbomukonzya kugwasya mwanaanu kuzwidilila muciindi eeci—calo cikonzya kumunyonganya nywebo alimwi awalo? Amubone bazyali bamwi bazwa mumasi aaindene-indene mbobaamba.

KUCINCA KWABANA

“Ciindi mwaneesu naakacili muniini, wakali kundimvwida kakunyina kubuzya mibuzyo. Pele naakakubuka, wakatalika kulibonya kuti tacindisyomi. Wakali kuzidooneka zyintu nzyondakali kumwaambila ambondakali kuzyaamba.”—Oobu mbobakaamba ba Frank, baku Canada.

“Mwanaangu tacaambauli mbuli mbwaakali kwaambaula lyoonse. Ccita buyo kuti ndamubuzya kuti aambe ncayeeya. Alimwi cilamuyumina kwiingula mpoonya-mpoonya.”—Oobu mbobakaamba ba Francis, baku Australia.

“Kukkazika moyo kulayandika kapati. Zimwi ziindi tulakonzya kufwambaana kubanyemena bana besu, pele kukkazika moyo akubandika ambabo kabotu-kabotu inga kwagwasya.”—Oobu mbobakaamba ba Felicia, baku United States.

KUBANDIKA

“Zimwi ziindi mwanaangu musimbi ulalikwabilila kwiinda mukwaamba kuti ndilamukazya kapati muzyintu zyoonse. Ndilamwaambila lyoonse kuti ndilamuyanda, alimwi akuti ndiyanda kuti akomene kabotu.”—Oobo mbobakaamba ba Lisa, baku United States.

“Bana bangu nibakacili baniini, bakali kulikwaya kwaambaula andime. Cakali cuuba-uba kuzyiba nzyobakali kuyeeya ambobakali kulimvwa. Pele lino ndeelede kutondezya kuti ndilabaswiilila alimwi akubalemeka. Eeyi njenzila iipa kuti kabandaambila zili mumyoyo yabo.”—Oobu mbobakaamba ba Nan-hi, baku Korea.

“Kubaambila buyo kuleka zyintu zimwi bana takuzulide pe. Tweelede kubandika ambabo twaambo tugwasya tubasika amoyo. Kutegwa tuzyibe cini ncobayeeya, tweelede kusaanguna kuswiilila nzyobaamba, nokuba kuti inga kazitali zyintu zibotu kumvwa.”—Oobu mbobakaamba ba Dalila, baku Brazil.

“Ikuti kandiyanda kumupa lulayo mwanaangu, tandimupedi aabuleya pe.”—Oobu mbobakaamba ba Edna, baku Nigeria.

“Zimwi ziindi nondibandika amwanaangu, ndilanyonganyizyigwa amilimo imwi yaaŋanda, calo cipa kuti kanditabikkili maano kuzyintu nzyaambaula. Ndiyeeya kuti aaka nkakaambo kapa kuti katayandi kubandika andime. Aboobo ndeelede kusolekesya kumuswiilila ciindi naambaula kutegwa kaanguluka kubandika andime.”—Oobu mbobakaamba ba Miriam baku Mexico.

KUBA AALWAANGULUKO

“Lyoonse ndakali kuyoowa kubapa lwaanguluko bana bangu, alimwi ndisyoma kuti eeci ncecakapa kuti katutamvwani. Ndakaabandika makani aaya ambabo. Ndakabapandulwida cakali kundipa kutabapa lwaanguluko, mpoonya abalo bakandaambila ncobakali kuluyandila lwaanguluko. Mpoonya, twakazuminana kuti inga baba alwaanguluko kweelana amilawo njindakababikkila.”—Oobu mbobakaamba ba Edwin, baku Ghana.

“Imwanaangu wakali kuyanda kuulilwa mudududu. Pele mebo tiindakaukkomanina muzeezo ooyu cakuti ndakamunyemena akumwaambila bubi bwakuba amudududu, kakunyina kumupa ciindi cakuti aambe ncaakali kuuyandila. Eeci cakamunyemya kapati alimwi muzeezo wakuba aamudududu wakakomena kapati. Ndakasola nzila iimbi yakumugwasya. Ndakamukulwaizya kuti aalange-lange makani aaya cakusitikila, alimwi azijatikizidwe mbuli ntenda zikonzya kujanika, mali aayandika alimwi apepa limuzumizya kweenzya. Ndakamwaambila kuti ulakonzya kulomba lugwasyo kuzwa ku Banakristo basimide bamumbungano. Ndakajana kuti muciindi cakumudyaaminina, ndakeelede kumupa ciindi cakwaamba mbwayeeya. Munzila iili boobu ndakacikonzya kumugwasya.”—Oobu mbobakaamba ba Hye-young, baku Korea.

“Asyoonto-syoonto, twakali kubapa lwaanguluko. Ciindi bana besu nibakali kuzicita nzyotwakali kubaambila, twakali kubayungizila lwaanguluko. Twakali kubaambila nzila mobakali kunga bajana lwaanguluko, kubatondezya kuti makanze eesu ngakuti kabajisi lwaanguluko, pele ikuti naa baciindizya balakonzya kunjila mumapenzi.”—Oobu mbobakaamba ba Dorothée, baku France.

“Kunyina nindakali kuubya-ubya milawo. Pele ciindi bana bangu nibakali kwiitobela, ndakali kubazumizya kucita ncobayanda. Mucikozyanyo, kuti naa bamuka kuboola aŋanda tiindakali kubanyemena. Pele kuti baciindizya, bakali kupegwa cisubulo.”—Oobu mbobakaamba ba Il-hyun, baku Korea.

“Ikuti sikulembwa mulimo kalibombya akulilemeka, sikumulemba mulimo unoomubikkila maano kapati. Mbubwenya buyo, awalo mwanaangu kuti kalibombya akulilemeka, asyoonto-syoonto lwaanguluko lwakwe lulavwula. Mwanaangu ulizyi kuti mbubwenya mbuli sikulembwa mulimo mbwakonzya kupegwa cisubulo ikuti katalilemeki, awalo ulakonzya kunyangwa lwaanguluko kuti katalilemeki.”—Oobu mbobakaamba ba Ramón, baku Mexico.

 [Majwi aakwelelezya sikubala aali apeeji 22]

“Iyisya mwana aende munzila iielede, lino akomena takooyooleya mulinjiyo.”—Tusimpi 22:6.

 [Kabbokesi/Cifwanikiso icili apeeji 23]

Bazyali balakonzya kubapa lwaanguluko bana babo, pele lweelede kuba ampolugolela

MAKANI AAJATIKIZYA MUKWASYI

“Kulela Bana Bakubusi Ncintu Cikkomanisya Kapati”

Ba Joseph: Bana bangu basimbi bobilo mbakubusi, alimwi ndakajana kuti cilayandika kubaswiilila akuzyiba mbobalimvwa. Kuzyiba kuti ndilalubizya—alimwi akutondezya bulemu ciindi nondibandika ambabo—kulagwasya kubandika kabotu. Mubufwaafwi, inga ndaamba kuti kulela bana bakubusi ncintu cikkomanisya kapati, tulalumba kapati kumalailile ngotujana mu Jwi lya Leza, Ibbaibbele.

Ba Lisa: Ndakabona kuti ciindi mwaneesu mupati naakaba mukubusi, wakali kuyandika kuti kandimubikkila maano kapati. Ndilayeeya nindakali kutola ciindi cilamfwu kandimuswiilila akumukulwaizya naakali kubandika andime. Mebo abalumi bangu tulabaambila bana besu kuti balakonzya kwaamba mbobalimvwa alimwi akuti tulabikkila maano kujatikizya mbobalimvwa. Ndilasola kubelesya majwi aabusongo aali mulugwalo lwa Jakobo 1:19, aakuti “[t]weelede kufwambaana kuswiilila, kumuka kwaambaula.”

Victoria: Bamaama mbalongwe bangu beni-beni. Kunyina muntu uuli kabotu alimwi uulanganya kwiinda bamaama—alimwi bali kabotu kubantu boonse. Ndili masimpe kuti bamaama balabikkila maano muntu uuli woonse. Ndilalumba kapati kuba aabamaama bali boobu.

Olivia: Bataata balabikkila maano alimwi mbaabi. Balalyaaba kugwasya bantu kulubazu lwakumubili nokuba kuti tabavwubide. Balizyi ciindi cakubikkila maano aciindi cakuseka. Ncikozyanyo cibotu citondezya mbwayelede kuba muzyali, alimwi ndilikkomene kuba abataata bali boobu.

“Kunyina Notulendelelwa Pe!”

Ba Sonny: Ikuti bana besu bajisi penzi, tulakkala antoomwe mbuli mukwasyi akulilanga-langa penzi eelyo. Tulasyomeka kwiinda mukwaamba mbotulimvwa, alimwi akubelesya Bbaibbele ciindi notubandika. Mebo aba Ynez tulasola kubagwasya bana besu kuti kabajisi balongwe basimide kumuuya. Ibantu mbotumvwana limwi mbalongwe babo, alimwi abalo balongwe babo mbalongwe besu.

Ba Ynez: Tulacita zyintu antoomwe mbuli mukwasyi. Mbotuli Bakamboni ba Jehova, lyoonse inga tujisi bubi mumulimo wakukambauka, kucita ciiyo ca Bbaibbele camukwasyi, alimwi amilimo imwi yakulyaaba—yalo iibikkilizya akugwasya baabo bacitikilwa ntenda alimwi akuyaka Maanda aa Bwami. Mpoonya tulaba aciindi cakulikondelezya. Kunyina notulendelelwa pe.

Kellsie: Bataata mbantu baswiilila, alimwi lyoonse balabuzya kumukwasyi kabatanasala cakucita cipati cijatikizya mukwasyi. Abalo bamaama lyoonse balilibambilide kundiswiilila ciindi ndaba apenzi—nociba ciindi nendiyanda kubandika buyo.

Samantha: Bamaama bandipa kulimvwa kuti ndilayandika kapati alimwi akuti balandiyanda—noliba leelyo nobatazyi kuti mbobacita oobo. Balandiswiilila kapati. Balabikkila maano. Tandikonzyi kuzumizya cintu cili coonse kunyonganya cilongwe cesu.

[Zifwanikiso]

Imukwasyi waba Zapata: Kellsie, ba Ynez, ba Sonny, alimwi a Samantha

Mukwasyi waba Camera: Ba Joseph, ba Lisa, Victoria, Olivia, alimwi a Isabella

[Cifwanikiso icili apeeji 22]

Bazyali balakonzya kubapa lwaanguluko bana babo, pele lweelede kuba ampolugolela