Nkaambo nzi Ncokuli Mapenzi Manji Boobu?

BASOLOLI bazikombelo ibalyaamba kuti balibuzyi bwiinguzi kumubuzyo ooyu, kanji-kanji bayiisya kuti kupenga ncisubulo cizwa kuli Leza. Mucikozyanyo, mazuba masyoonto kuzwa nowakacitika muzuzumo wanyika ku Haiti, musololi umwi wacikombelo camudolopo lipati wakaambila basimbungano kuti intenda eeyi wakali mulumbe kuzwa kuli Leza. Bamwi tabazizyi kabotu zyintu nzyobasyoma. Umwi syaazibwene mumakani aabukombi waku America wakaamba kuti bantu banji baamba boobu kujatikizya makani aaya: “Ikaambo Leza ncapa kuti kube mapenzi aali boobu, kalakatazya kuzyiba alimwi swebo tatweelede akubuzya. Swebo tuyandika buyo kuba alusyomo.”

Sena ncobeni Leza nguupa kuti bantu kabapenga? Ibbaibbele cakusalazya lyaamba kuti, peepe! Kupenga tanaakali makanze aa Jehova kujatikizya bantu. Nokuba boobo, banabukwetene bakusaangana bakazangila bweendelezi bwa Leza, ikulibikkila zyeelelo zijatikizya cibi alimwi acibotu. Bakamuzangila Leza alimwi bakaliletela mapenzi. Sunu tulapenga akaambo kakusala kwabo kubyaabi. Pele Leza kunyina naakatalisya mapenzi aabacitikila bantu. Bbaibbele lyaamba kuti: “Eelyo nasukusyigwa, kutabi muntu waamba kuti: ‘Ndili mukusunkwa a Leza.’ Nkaambo kunyina muntu uunga wasunka Leza azyintu zibyaabi alimwi walo tasunki muntu uuli woonse azyintu zibyaabi.” (Jakobo 1:13) Kupenga kulakonzya kubasikila bantu boonse—nobaba baabo mbayanda Leza. Amulange-lange zikozyanyo zitobela:

● Musinsimi Elisha wakajisi bulwazi butasilikiki.—2 Bami 13:14.

● Mwaapostolo Paulo wakalemba kuti wakazumanana “kufwa nzala, kufwa nyota, kubula zisani, kudinkaulwa, kutuntulika.”—1 Bakolinto 4:11.

● Imunakristo Epafulodita wakalicisidwe alimwi “[wakali]pengede kapati mumoyo.”—Bafilipi 2:25, 26.

Kunyina mpotubala aatondezya kuti aaba baalumi botatwe bakasubulwa a Leza akaambo kazibi zyabo. Nokuba boobo, Ibbaibbele talyaambi buyo kuti Leza talinguwe uutalisya mapenzi. Alimwi lilaamba atwaambo totatwe tupa kuti bantu kabapenga.

 Zyintu Nzyobasala

“Kufwumbwa cintu muntu ncasyanga, ncencico eeco ncayootebula.” (Bagalatiya 6:7) Masimpe ngakuti, ikuti naa muntu waba mumapenzi akaambo kakufweba, kweenzya mootokala cabuyamba, naa kunyonyoona mali aakwe weelede kulinyamwida mukuli wakwe akaambo kakusala kwakwe.

Andiswe tulakozya kupenga akaambo kakusala kwabamwi kutaluzi. Masimpe ngakuti bantu bazumanana kucita zyintu zibyaabi, mbuli micito yalunya yaba Nazi alimwi akutundulula bana. Akaambo kakutacibelesya kabotu coolwe cakulisalila, bamwi bacita zyintu zikonzya kupenzya bamwi.

Zyintu Zicitika Cakutayeeyelwa

Mumwaanda wamyaka wakusaanguna C.E., ingazi mpati yaku Jerusalemu yakawa akujaya bantu bali 18. Kaamba bantu bakali muntenda eeyi, Jesu wakaamba kuti: “Sena muyeeya kuti bakali basizibi kwiinda bantu boonse bakkala mu Jelusalemu? Peepe!” (Luka 13:4, 5) Jesu wakalizyi kuti bantu bakafwa tiibakasubulwa a Leza. Wakalizyi mbolyakaamba Jwi lya Leza kumatalikilo kuti: “Bantu boonse buyo balasikilwa ziindi zyalufu azyamapenzi.” (Mukambausi 9:11) Zyintu zibyaabi zilabacitikila bantu akaambo kakujanika abusena buteelede aaciindi citeelede naa akaambo kakulubizya kwabantu. Mucikozyanyo, malipooti atondezya kuti mapenzi manji alaboola akaambo kakutabikkila maano kuncenjezyo alimwi amayake atayakidwe kabotu aakonzya kunyonyooka kuntenda zimwi naa mizuzumo yanyika. Mubukkale buli boobu, zyintu zicitika cakutayeeyela zilabajatikizya bantu banji, calo cipa kuti kube mapenzi.

“Mweendelezi Wanyika Eeyi”

Bbaibbele lyaamba kuti: “Nyika yoonse ili mumaanza aamubi.” (Johane 12:31; 1 Johane 5:19) ‘Imubi’ ooyo ngu Saatani Diabolosi, cilenge camuuya canguzu cipandululwa kuti ‘mweendelezi wamuwo.’ Saatani ukulwaizya “imuuya ooyo lino uubeleka mubana batamvwi.” (Baefeso 2:2) Bugwebenga bumwi, mbuli cijaye-jaye alimwi akutundulula bana, zilabacisa kapati bantu cakuti cilalibonya buya kuti Saatani nguubayunga kuzicita.

Nokuba boobo, sena eeci cipandulula kuti Leza tabikkili maano kumapenzi eesu? Sena ulakonzya—alimwi sena uyookonzya ncobeni—kwaamana mapenzi?