Ciindi Nomulimvwa Kuti Buumi Bunyina Mpindu
Ciindi Nomulimvwa Kuti Buumi Bunyina Mpindu
MWAKA amwaka bantu basika ku 3,000 balaba amuzeezo wakuyanda kulijaya. Ibbaibbele lilapa kaambo kapa bantu banji kuba mubukkale oobu bubyaabi. Lilaamba kuti tupona muziindi “zikatazya ncobeni.” Bantu balimvwa kuti mapenzi mubuumi bwabo ayaabuvwula kapati. (2 Timoteyo 3:1; Mukambausi 7:7) Ciindi muntu nakatazyigwa amapenzi manji mubuumi, ulakonzya kutalika kuyeeya kuti kulijaya kulakonzya kumugwasya. Ino inga mwacita buti kuti andinywe mbomuyeeya oobo?
Tamuli Nyolikke Pe!
Nokuba kuti nywebo mulakonzya kulimvwa mbuli kuti cilakatazya kapati kuliyumya, kamuyeeya kuti tamuli nyolikke pe alimwi akuti bantu boonse balijisi mapenzi abalo. Ibbaibbele lyaamba kuti: “Zilenge zyoonse zilatongela lyoonse akuba amacise caantoomwe.” (Baloma 8:22) Nokuba kuti alakonzya kulibonya mbuli kuti kunyina naayoomana, mukuya kwaciindi alamana. Pele lino, ncinzi cikonzya kumugwasya?
Amwaambile muntu uusimide alimwi ngomusyoma, kujatikizya mbomulimvwa. Bbaibbele lyaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.” (Tusimpi 17:17) Imwaalumi mululami Jobu, iwaambwa mu Bbaibbele, wakali kubandika abantu kujatikizya mbwaakali kulimvwa muziindi zyamapenzi. Naakali mubukkale mbwaakaamba kuti ‘wakasesemwa buumi,’ wakaamba kuti: “Ndilaambisya lutongauko lwangu. Nzooamba mukulula kwamoyo wangu.” (Jobu 10:1) Kwaambila bamwi kujatikizya mbomulimvwa kulakonzya kumukatalusya, alimwi kulakonzya kupa kuti mucince mbomwaabona mapenzi aanu.
Amupaile kuli Leza kuzwa ansi amoyo. Bamwi baamba kuti mupailo ncintu cigwasya kwakaindi kasyoonto, pele Bbaibbele lyaamba cintu ciimpene aceeci. Mucikozyanyo, lugwalo lwa Intembauzyo 65:2 lwaamba Jehova kuti ngu Leza “[Uuswiilila] zikombyo,” alimwi lugwalo lwa 1 Petulo 5:7 lwaamba kuti: “Ulamubikkila maano.” Aboobo Bbaibbele cakusinizya lilaamba mbociyandika kumusyoma Leza. Mucikozyanyo:
“Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”—TUSIMPI 3:5, 6.
“Bamuyoowa, ulabacitila mbobayanda; ulaswiilila cililo cabo akubafwutula.”—INTEMBAUZYO 145:19.
“Oolu ndolusinizyo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.”—1 JOHANE 5:14.
“Jehova uli kule kuzwa kulibasizibi, pele ulaswiilila cikombyo cabaluleme.”—TUSIMPI 15:29.
Ikuti mwamwaambila Leza mapenzi ngomujisi, uyoomugwasya. Cakusinizya Bbaibbele limukulwaizya kuti: “Amumusyome kuziindi zyoonse . . . Amutule myoyo yangu kulinguwe.”—Intembauzyo 62:8.
Ciindi Zyintu Zinji Nozijatikizyidwe
Buvwuntauzyi butondezya kuti bantu banji balijaya bakajisi mapenzi kwaciindi cilamfwu. * Eeci cisinizya kaambo kakuti kulayandika kusilikwa akutobela malailile aabasilisi. Musilisi ulakonzya kumwaambila musamu naa kumwaambila zyakulya nzyomweelede kulya. Mubukkale bumwi, bubambe bwakunyanyaasya mubili bulakonzya kumugwasya. Busilisi bwatondezya kuti bulakonzya kugwasya kapati. *
Bbaibbele lilijisi makani aakonzya kumugwasya alimwi akumupa bulangizi. Mucikozyanyo, Bbaibbele mulugwalo lwa Ciyubunuzyo 21:4, lyaamba kujatikizya Jehova Leza kuti: “Uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.” Eeci ncisyomezyo ca Leza, alimwi kuzinzibala kuyeeya cisyomezyo eeci kulakonzya kumukatalusya.
Bakamboni ba Jehova balaambilizya bulangizi bwamu Bbaibbele buli mbuli boobu kubantu banji munyika yoonse. Akaambo kaceeci, bantu banji baba abulangizi bwini-bwini mumazuba aaya aakatazya. Kuti kamuyanda kuzyiba zinji, amubonane a Bakamboni ba Jehova ku Ŋanda ya Bwami yakubusena nkomukkala naa kubalembela, kubelesya kkeyala iili apeeji 5 mumagazini eeyi. Alimwi mulakonzya kujana twaambo tuyungizyidwe a Web site yesu ya www.watchtower.org.
[Bupanduluzi buyungizidwe]
^ munc. 13 Kuti kamuyanda makani aayungizyidwe amubone Sinsimuka!, yamu Cingisi ya July 2009 mapeeji 3-9.
^ munc. 13 Sinsimuka! tayaambi musamu uuli woonse. Muntu umwi aumwi weelede kulisalila mumakani aaya.
[Kabbokesi kali apeeji 16]
LUGWASYO LUZWA MUBBAIBBELE
● “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila; eelyo luumuno lwa Leza oolo lwiinda kumvwisya koonse luyookwabilila myoyo yanu amizeezo yanu kwiinda muli Kilisito Jesu.”—Bafilipi 4:6, 7
● “Ndakayandaula Jehova, nkabela wakandivwiila, wandivuna kukuyoowa kwangu koonse.”—Intembauzyo 34:4.
● “Jehova uli afwaafwi kubawizukide mumoyo, ulafutula batete myuuya.”—Intembauzyo 34:18.
● “Ulaponya batyokedemyoyo, ulaanga zilonda zyabo.”—Intembauzyo 147:3.
[Kabbokesi kali apeeji 17, 18]
KUTI KAMUJISI MIZEEZO YAKULIJAYA . . .
Amwaambile muntu uusimide alimwi ngomusyoma, kujatikizya mbomulimvwa
Amupaile kuli Leza kuzwa ansi amoyo
Amuyandaule busilisi
[Kabbokesi/Cifwanikiso icili apeeji 18]
MUKULI WABALONGWE ALIMWI ABANAMUKWASYI
Ibafwambaana kuzyiba kuti muntu ulikopene akuti ujisi makanze aakulijaya, mbalongwe alimwi abanamukwasyi. Kubweza ntaamu cakufwambaana, kulakonzya kupa kuti mumufwutule muntu ooyo. Amube muswiilizi uucizyi kuumbulizya. Amuzyibe bukkale alimwi abuyumuyumu bumukatazya muntu ooyu. Bbaibbele lyaamba kuti: “Amubaumbulizye aabo ibatyompedwe mumoyo.” (1 Batesalonika 5:14) Amumukulwaizye muntu uutyompedwe kuti alombe lugwasyo, alimwi kuti kacikonzyeka, amumulombele naa kumucitila bubambe bwakuti agwasyigwe.
