Mapenzi Aaboola Akaambo Kakunyema
Mapenzi Aaboola Akaambo Kakunyema
Mwaalumi umwi wakaula cakulya musambalilwa zyakulya, pele wakanyema kapati naakabona kuti cakulya camuka kuboola. Wakanjila kukkaunta akunyemena mubelesi wamumo, mpoonya wakamutontela kukkaunta akumwaanzamuna lubayi. Kumane, mwaalumi ooyu wakakwempa cakulya cakwe akuzwa aanze.
TOONSE tulanyema ciindi aciindi. Tulanyema nkaambo mbotwakalengwa kuti katukonzya kunyema mbubwenya mbotukonzya kutondezya luyando, kuba abulangizi, kulibilika, kuusa, alimwi akuyoowa. Kunyema kweendelezyegwa kabotu kulakonzya kutondezyegwa munzila iili kabotu alimwi inga kwagwasya. Mucikozyanyo, kunyema inga kwaba kabotu kuti naa kwagwasya muntu kuyanda kuzumanana kuzunda buyumuyumu naa mapenzi amwi.
Kulubazu lumwi, kunyema nkubi mbubwenya mbuli mbotwabona mucikozyanyo caambwa atala aawa. Bantu bamwi balafwambaana kunyema kwiinda bamwi. Nobanyemezyegwa, balakonzya kubelesya majwi mabi naa kulwana buya. Mubwini, kunyema nkokubeendelezya muciindi cakuti kabakweendelezya mbabo. Kunyema kwakutalijata nkubi kapati, nkakaambo kaako zimwi ziindi kwaambwa kuti “kunyema akaambo kamapenzi.” *
Aabo bajisi penzi lyakunyema tabalileteli buyo mause balikke, pele akuli baabo babazingulukide. Kumuntu uujisi penzi lyakunyema nomuba mutwaambo tutayi koomoonga, ulakonzya kunyema kapati, calo cikonzya kumuletela mapenzi manji. Amulange-lange zikozyanyo eezyi zitobela:
Mwaalumi umwi wakadubulwa ntobolo akaambo kakuti mweenzinyina ngobakalilimwi wakagunta muntu umwi wakali kweenda munzila mwakali bantu banji.
Musankwa umwi wakajisi myaka yakuzyalwa iili 19 wakauma mwana wamusimbi ngwaakasyabide iwakajisi myezi iili 11, mane wafwa. Musankwa ooyu wakali kusobana cisobano caavidiyo citondezya kulwana, mpoonya mwana wakajata aatyankilwa manamba, calo cakapa kuti azundwe mucisobano eeco.
Malipooti aali boobu aajanika munyika yoonse mbwiizulwa, atondezya kuti bantu banji balijisi mapenzi aakunyema. Nkaambo nzi kunyema ncokuyaabuvwula?
[Bupanduluzi buyungizidwe]
^ munc. 4 Ibroshuwa yakuti Boiling Point—Problem Anger and What We Can Do About It ipandulula kuti “kunyema akaambo kamapenzi,” “ninzila iili yoonse iitali kabotu yakulijata kunyema iiletela mapenzi mubuumi bwamuntu kubikkilizya ambwayeeya, mbwalimvwa, mbwalilemeka alimwi ambwayanzana abantu.”
[Kabbokesi kali apeeji 3]
Kunyema ncintu cimwi ncotwakazyalwa ancico. Aboobo, kuli ziindi zimwi notweelede kutondezya kunyema munzila yeelede. Nokuba boobo, zibalo eezyi zipandulula kunyema kutali kabotu kwalo kukonzya kutuletela mapenzi aamumizeezo, kumubili, alimwi akumuuya.
