Mbotweelede Kulibelesya Kabotu Liso

● Liso lyamuntu lilayandika. Ndibotu alimwi lilaanguzu kapati. Ibbuku litegwa Visual Impact, Visual Teaching lyaamba kuti: “40 pesenti yansinga ziswaanganya liso kubongo,” ntusinga tusyoonto tunji tuli mukati kaliso.

Jesu Kristo liso wakalyaamba kuti: “Ndelambe lyamubili.” Wakazumanana kupandulula ncaakali kwaamba kuti: “Ikuti liso lyako kalilangide buyo acintu comwe, mubili wako woonse ulaba mumumuni. Pele ikuti liso lyako kalilanga zibi, mubili wako woonse ulaba mumudima.” (Matayo 6:22, 23) Mumajwi aaya Jesu wakali kupandulula nguzu nzyolijisi liso, mumaambilambali wakali kwaamba mizeezo alimwi amicito. Mizeezo mibotu ilamunikila mubuumi bwamuntu, pele micito mibi ipa kuti mubili woonse ube mumudima.

Mucikozyanyo, amubone majwi aa Jesu aajanika mulugwalo lwa Matayo 5:28, 29 aakuti: “Muntu uulangisisya mukaintu cakuti wamunyomenena, wacita kale bumambe anguwe mumoyo wakwe. Ikuti liso lyako lyalulyo eelyo kalikulebya, linonkole akulisowa.” Ino wakali kupandulula nzi? Kuti kolangilila muntu cakumunyomenena, mukuya kwaciindi ulakonzya kuba amizeezo mibi yalo iikonzya kusololela kukucita bwaamu.—Jakobo 1:14, 15.

Cilayandika kulyeendelezya, nokuba kuti kucita boobo cilakatazya kapati mbubonya mbuli mbocikatazya kunonkola liso. Aboobo, sena inga caba camaano kusweekelwa buumi butamani akaambo kakulikondelezya kwaciindi cisyoonto buyo?

Zyintu nzyotulangilila zilakonzya kutupa kuba abulyato. Nkakaambo kaako Bbaibbele ncolitucenjezya kuti: “zisusi zyameso amambonwa akaambo kazyintu nzyajisi muntu—tazizwi kuli Taata pe, pele zizwa munyika. Kunze lyaboobo, inyika iyaabumana antoomwe azisusi zyayo, pele ooyo uucita kuyanda kwa Leza unooliko lyoonse mane kukabe kutamani.”—1 Johane 2:16, 17.

Sena Bbaibbele lilaciindizya nolipa lulayo luli boobu? Peepe! Kutabikkila maano kululayo lwa mu Bbaibbele kulakonzya kumunjizya mumapenzi alimwi akutakkomana. (Bagalatiya 6:7, 8) Kutobela lulayo lwamu Bbaibbele, alimwi abusongo buli mulindilyo kulakonzya kumuletela lukkomano. Jesu wakaamba kuti: “Ibakkomene mbaabo baswiilila jwi lya Leza akulicita!” (Luka 11:28) Cikkomanisya ncakuti, aabo mbakkomanina Leza bajisi bulangizi bwakuyoopona anyika kukabe kutamani, pele aabo bacita zyintu zibi balasweekelwa lukkomano alimwi abuumi bwabo bwakumbele.