Bakubusi Balabuzya

Mbuti mbondikonzya kukukkomanina kubala Bbaibbele?

Nkaambo nzi ncindeelede kubala Bbaibbele? Amulibone munzila iili boobu Bbaibbele:

Bbaibbele lilakonzya kumugwasya kujana lukkomano. Bbuku eeli liwandide kapati lilakonzya kumugwasya

● Kulibambila mbomukonzya kupona buumi bwini-bwini

● Kuzyiba zyakumbele zijatikizya buumi—zyintu zyakaindi—zyalo nzyomwatakali kunga mwazyiba

● Kwiiya bwini mbomubede alimwi akumugwasya kuba muntu uuli kabotu *

KWIIYA Bbaibbele kuyandika kubeleka canguzu, pele kuletela zilongezyo zinji kapati. Sena mulayanda kuzyiba bakubusi bamwi mbobacikonzya kwiiya Bbaibbele? Amutende akwiiyobola peeji eeyi iitobela. Mulabona zyintu zimwi nzyobaamba beenzinyoko kujatikizya mbobacikonzya kwiiya Bbaibbele alimwi ampindu nzyobajana kwiinda mukuba aciiyo ca Bbaibbele cabo beni.

“Muntu uuli woonse ulakonzya kujana makani aakonzya kumugwasya kuzwa mu Bbaibbele. Mu Bbaibbele kuli makani manji ngomukonzya kwiiya alo ngomwatakali kunga mwaaiya kumbi!”—Oobu mbwaakaamba Valerie. *

Zibalo zimwi zyakuti “Bakubusi Balabuzya” zilakonzya kujanwa a Intaneti akkeyala ya www.watchtower.org/ype

[Bupanduluzi buyungizidwe]

 [Kabbokesi/Cifwanikiso icili apeeji 13, 14]

MBOKONZYA KWIIYA BBAIBBELE

Penzi: KUBULA CIKUKULWAIZYA

“Kubala Bbaibbele nokuba woola lyomwe buyo takundikkomanisyi pe.”—Oobu mbwaakaamba Lena.

Ciyandika: CINTU CEELEDE KUKUKULWAIZYA KUBALA

Kutegwa kacikukkomanisya kubala Bbaibbele, weelede kwiingula mibuzyo eeyi yakuti: Ino nimpindu nzi njendikonzya kujana kwiinda mukubala Bbaibbele? Sena uyanda kuba aacilongwe a Leza, kumvwisya zyintu zicitika munyika, naa kubambulula bube bwako? Ibbaibbele lilakonzya kukugwasya.

“Toelede kuyeeya kuti kubala Bbaibbele cili mbuli mulimo naa kubala mabbuku aakucikolo. Muciindi caboobo, kobona kuti kubala Bbaibbele nenzila iikonzya kukugwasya kuba aacilongwe cibotu kapati a Jehova Leza.”—Oobu mbwaakaamba Bethany.

“Ciindi ncobelesya kubala Bbaibbele, nciindi cakuba a Jehova Leza. Ikuti naa kobandika buyo amuntu umwi ciindi bazyali bako nobaliko, sena muntu ooyo mulongwe wako mwini-mwini naa ngwabazyali bako? Kuti naa koli olikke ciindi nobala Bbaibbele, Jehova uyooba mulongwe wako.”—Oobu mbwaakaamba Bianca.

Weelede kuyeeya kuti: “Magwalo oonse akasololelwa a Leza alimwi alagwasya mukuyiisya, mukusinsa, mukululamika, mukulaya cabululami.” (2 Timoteyo 3:16) Ibbaibbele lilakonzya kukugwasya mubukkale buli boonse!

“Ndilalanga abubotu mbondikonzya kujana. Ciindi nendibala nceciindi nindilanga-langa mumbazu mondilezya, alimwi akusola kubelekela mumbazu eezyo”—Oobu mbwaakaamba Max.

Zyakuyeeyesya:

Ncinzi ceelede kukukulwaizya kubala Bbaibbele?

 Penzi: KULENDELEZYA

“Ndabala kwamaminiti aali 10, ndilimvwa kukatala, cakuti mumaminiti aali 20 inga ndilimvwa kuyanda kucita zyintu zimbi mane kusikila kumaminiti aali 30, inga ndilimvwa kulendelelwa kapati.”—Oobu mbwaakaamba Allison.

Ncoelede kucita: WEELEDE KUCITA ZYINTU ZIPA KUTI KACIKUKKOMANISYA

Weelede kuyeeya mbozikujatikizya zyintu nzyobala, mbobala naa busena mpobalila.

“Weelede kujana ciindi cakuvwuntauzya mibuzyo njojisi. Kuti naa wabala kujatikizya makani aakukkomanisya, ulalimvwa kabotu.”—Oobu mbwaakaamba Richard.

“Nobala zyintu zimwi zyakacitika, kolibikka mubukkale oobo. Kolibikka muciimo cakuti wakalijatikizidwe ayebo naa wakaliko nizyakali kucitika zyintu eezyo. Soleka kuzyibikka mumizeezo zyintu eezyo mbuli kuti ulizibwene kazicitika.”—Oobu mbwaakaamba Steven.

“Kubala kweelede kuti kakukukkomanisya. Wanoobala ulakonzya kuti kojisi atwakulya. Mebo ndilatuyandisya tulyo ndanoobala. Ndisyoma kuti bantu banji inga batuyanda abalo.”—Oobu mbwaakaamba Alexandra.

Koyeeya kuti: Kulendelelwa ncintu cakuyeeyela buyo, kanji-kanji ncintu citali camasimpe. Aboobo, muciindi cakwaamba kuti, “kubala kulalendelezya,” weelede kwaamba kuti “ndililendeledwe.” Weelede kubikkila maano kujatikizya mbokubona kubala. Eeco ciyookupa kuti kocibelesya kabotu ciindi alimwi akukukulwaizya kuti kobala lyoonse.—Tusimpi 2:10, 11.

“Kucita ciiyo cako omwini takweelede kukulendelezya pe. Pele nduwe ookonzya kupa kuti kacikukkomanisya naa pe.”—Oobu mbwaakaamba Vanessa.

Zyakuyeeyesya:

Ncinzi cikonzya kukukulwaizya ciindi nobala?

Penzi: KUBULA CIINDI

“Inga ndilayanda kubala Bbaibbele pele tandijani ciindi, aboobo buyumuyumu mbondijisi mbwakujana ciindi cakuti ndicite oobo.”—Oobu mbwaakaamba Maria.

Ncoelede kucita: KUBIKKA ZYINTU MUMULONGO KWEELANA AMBOZIYANDIKA

Kwiiya ‘kusinizya zyintu ziyandika kapati,’ ncitondezyo cakukomena.—Bafilipi 1:10.

“Baama bakandigwasya kuzyiba kuti kunyina nendiya kuba aaciindi cilibedelede cakubala Bbaibbele. Ndakeelede kujana ciindi. Ciindi nindakaba aaluyandisisyo lwakubala, ndakacijana ciindi.”—Oobu mbwaakaamba Natanya.

“Mbondiyaabukomena, ndaiya kuti ndeelede kubikka ciindi ambali cakubala. Alimwi ndilacita oobo, nokuba kuti inga kakuli zyintu zimbi zyakucita.”—Oobu mbwaakaamba Yolanda.

“Ikuti kubala Bbaibbele wakubikka mubusena bwakusaanguna kwiinda zyintu zyakulikondelezya, uyookukkomanina kwiinda lyoonse—alimwi ciindi nolikondelezya tokalipi mulandu.”—Oobu mbwaakaamba Diana.

Weelede kuyeeya kuti: Ikuti kotaciti zyintu kweelana amboziyandika, nkokuti ciyookwalila kubamba ciindi alimwi kunyina noyoocikonzya kucita nzyokanzide kucita. Cilagwasya kapati kuti wabikkila maano kujana ciindi alimwi abusena bwakubalila.—Baefeso 5:15, 16.

“Mbondili sicikolo wakusekondali, ncuuba-uba kunyonganizyigwa azyintu zimbi. Nokuba boobo, kubikkila maano kucita ciiyo ca Bbaibbele mumulongo wangu ncecintu ncendiyanda.”—Oobu mbwaakaamba Jordan.

Zyakuyeeyesya:

Ino mulongo uli buti wakubala ngokonzya kupanga?

[Kabbokesi/Cifwanikiso icili apeeji 13]

TWAAMBO NTOBAAMBA BEENZINYOKO

Zachary—Toelede kubala Bbaibbele akaambo kakuti bazyali bako naa bamwi balacita oobo. Nciiyo cako omwini ikuti naa kuli cintu cimwi ncoyanda kwiiya.

Kaley—Kotalika asyoonto-syoonto. Kuti kacikonzyeka, inga wabala kwamaminiti osanwe buzuba abuzuba. Kumane ulakonzya kuyungizya ciindi kusikila kumaminiti aali 10, mane limwi maminiti aali 15 akwiinda aawo. Mukuya kwaciindi ciyootalika kukukkomanisya.

Daniela—Kubelesya zyintu zimwi akwalo kulakonzya kugwasya. Ulakonzya kubelesya mapeeni alemba musyobo wiindene-indene alimwi akabbuku kakulembela.

Jordan—Kuti ndajana kaambo nkondiyanda, nkokuti ndilabala kwaciindi cilamfwu. Alimwi ndiyanda busena buumwine. Cilandaalila kubala kuti kakulimvwisya coongo.

[Citondezyo cili apeeji 12]

(Kutegwa mubone bwini mbwaakkede mabala, amubone bbuku lini)

Amutende

Amupeteke