Ncinzi candipa kwaamba boobu?
Bakubusi Balabuzya
Ncinzi candipa kwaamba boobu?
KAAMBO ncoambila zyintu zibi zimwi ziindi
NCOKONZYA kucita kuti waamba majwi mabi
MBOKONZYA kweendelezya mulaka wako
“Ndilasolekesya kweendelezya mulaka wangu, pele zimwi ziindi ndilaamba zyintu zibyaabi cakuti ndamana ndilafwa nsoni.”—Chase
“Zimwi ziindi ndilaamba zyintu ziteelede kwaambwa akati kabantu.”—Allie
KAAMBO NCOCICITIKILA
Lugwalo lugwasya: “Ikuti naa kuli uutalubizyi mukwaambaula, ooyo muntu ulilondokede.” (Jakobo 3:2) Ino lugwalo oolu lupandulula nzi? Kunyina uucizyi kubamba mulaka wakwe. Bamwi bacita mbuli mukubusi umwi wazyina lya Annette, * iwakaamba kuti: “Kuli ziindi nenditayandi kwaamba kaambo kamwi, pele ndijana kuti ndatalika kale kwaamba.”
Makani aakacitika ncobeni: “Mweenzuma wakatondezya kuti ulaziyanda zisani zimwi nzindakali kuyanda kusowa. Kakunyina kuciyeeyela ndakamwaambila kuti, ‘tandisyomi kuti ulakkwana muzisani eezyi.’ Mpoonya walo wakaingula kuti, wati nzi? Sena uyeeya kuti mebo ndilineneede?’”—Oobu mbwakaamba Corrine.
Kutegwa uzyibe ncocikatazya kweendelezya mulaka, kosola twaambo ootu.
● Kozyiba molezya.
․․․․․ Zimwi ziindi ndilaambaula kandinyemede
․․․․․ Zimwi ziindi ndilaambaula cakutayeeya
․․․․․ Zimwi ziindi ndilaingula kakunyina kuswiilila
․․․․․ Azimbi buyo ․․․․․
Cikozyanyo: “Ndijisi penzi lyakusobana-sobana nendibandika, aboobo zimwi ziindi nzyondaamba bantu baziyeeyela bumbi.”—Oobu mbwakaamba Alexis.
● Mbaani mboyeeyela kuti inga walubizya wanoobandika ambabo?
․․․․․ Muzyali
․․․․․ Mwanookwanu
․․․․․ Mulongwe
․․․․․ Bantu bambi buyo ․․․․․
Cikozyanyo: Mukubusi uujisi myaka yakuzyalwa iili 20 wazyina lya Christine wakaamba kuti: “Cilatyompya kaka kujana kuti bantu mbondiyanda kapati mbabantu mbondilubizyila. Ndiyeeya kuti nkaambo kakuti ndilalikwaya kapati kwaamba kufwumbwa buyo caboola kumoyo.”
NCINZI CAKUCITA CIINDI NOWALUBIZYA
Lugwalo lugwasya: “Atusungwaalile kucita zyintu ziletela luumuno.” (Baloma 14:19) Nzila yomwe yakutobela lulayo oolu nkwiinda mukulilekelela.
Makani aakacitika ncobeni: “Baama bakafwa nindakajisi myezi iili kkumi alimwi abalo bataata kunyina nindakabazyiba pe, aboobo, ndakakomezyegwa abapati babaama abalumi babo. Bumwi buzuba, nindakajisi myaka yakuzyalwa iili 10, ndakalilendeledwe alimwi ndakalinyemede akaambo kalufwu lwabaama, eeci cakandipa kuti kandipa bantu bambi milandu. Aboobo, ciindi baama ibakali kundilela nibakandilomba kuti ndibagwasye mulimo umwi, ndakatalika kubabwentela cakuti ndakasika ankondibaambila kuti ‘tandimuyandi’ alimwi akuti ‘tamuli ndinywe mwakandizyala.’ Baama bakagambwa kapati. Akaambo kaceeci bakapiluka akuyoolijalila kubbedilumu yabo akutalika kulila. Ndakagunwa akaambo kakuti ndakabasampaula, nokuba kuti mbabakali kundilela. Baaisya bakatalika kundilaya alimwi akunditondezya magwalo mbwaamba kujatikizya mbondeelede kuweendelezya kabotu mulaka. Mpoonya, ndakalilekelela kuli baama. Ndakazyiba kuti ndalubizya.”—Oobu mbwaakaamba Karen.
Kolemba ansi aawa twaambo tupa kuti kacikuyumina kulilekelela.
․․․․․
Nkaambo nzi kulilekelela ncokukupa kulimvwa kwaanguluka?
․․․․․
Kaambo kagwasya: Kolanga-langa lulayo lujanwa mulugwalo lwa Tusimpi 11:2 alimwi a Matayo 5:23, 24.
Masimpe ngakuti, cilayandika kapati kusaanguna kucizyiba kwaambaula, kutegwa utakatyompyi bamwi. Ino inga wacita buti oobo?
MBUTI MBOELEDE KWEENDELEZYA MULAKA WAKO
Lugwalo lugwasya: “Kufwambaana kuswiilila, kumuka kwaambaula, kumuka kukalala.” (Jakobo 1:19) Ntootu twaambo tukonzya kukugwasya kulutobela lulayo oolu.
Kobala magwalo aatobela, mpoonya waayendelanye kukaambo kamwi akamwi.
1 “Mutanooyeeyi kuti muli kabotu kwiinda bamwi; kucita boobu kuyoopa kuti mutanoofwambaani kunyema.”—Oobu mbwaakaamba Danette.
2 “Ndilaunka mukweendeenda. Eeci cindipa ciindi cakuba endikke akupa kuti ndileke kunyema.”—Oobu mbwaakaamba Brielle.
3 “Nindakacili mwana, ndakali kuyeeya kuti ndakeelede kulwana lyoonse, aboobo ndakali kuyanda kuzwangana mukantu kali koonse. Pele ndaiya kuti cilagwasya kutabikkila maano kufwumbwa kaambo nokaceya.”—Oobu mbwaakaamba Celia.
4 “Ikuti muntu umwi kakuyobela mpoonya toambi cili coonse, mukuya kwaciindi ulaleka. Weelede buyo kukkazyika moyo. Utayungizyi bukali.”—Oobu mbwaakaamba Kerrin.
5 “Kuli ziindi nindinyema akaambo kacintu muntu umwi ncaacita. Zyoonse nzyondiyanda kumwaambila muntu ooyo inga nkozili mumizeezo. Pesi akaambo kakutafwambaana kwaamba, cilandigwasya kuzyiba kuti nzindalikuyanda kwaamba tazigwasyi. Ncindaiya ncakuti, muntu teelede kufwambaana kubweza ntaamu.”—Oobu mbwaakaamba Charles.
Zibalo zimwi zyakuti “Bakubusi Balabuzya” zilakonzya kujanwa a Web site ya www.watchtower.org/ype
[Bupanduluzi buyungizidwe]
^ munc. 9 Mazyina amwi mucibalo eeci acincwa.
Kabbokesi/Cifwanikiso icili apeeji 20
Allie—Kanditanaamba cintu cili coonse, ndilalibuzya mibuzyo mbuli yakuti: ‘Sena zyintu nzyondiyanda kwaamba inga zyagwasya? Ino ulalimvwa buti muntu ngondiyanda kwaambila?’ Ikuti naa kotali masimpe acintu ncoyanda kwaamba, inga cabota kuumuna buyo.
Chase—Ciindi nendiyanda kwaamba cintu cimwi, ndilasola kuyeeyela mbobatiilimvwe bantu bandiswiilila. Ndisyoma kuti kweelana ambondiyaabukomena, ndaiya kweendelezya kabotu mulaka wangu. Masimpe ngakuti ulakonzya kucikonzya.
[Kabbokesi kali apeeji 21]
WEELEDE KUBABUZYA BAZYALI BAKO
Mbokunga kunyina muntu uulondokede mbubwenya mbwaakalemba Jakobo, “toonse tulalubizya ziindi zinji,” nkokuti weelede kubandika abazyali bako kujatikizya buyumuyumu mbojana mukweendelezya mulaka wako.—Jakobo 3:2.
[Cifwanikiso icili apeeji 20]
“Kuti naa koogeti yazwa tokonzyi kwiipilusya alimwi pe. Oobo mbocibede akumajwi ngotwaamba. Kuti waamba majwi mabi, tokonzyi kwaapilusya pe.”—Oobu mbwaakaamba James.
