2. Kamucibamba Cabulondo

MBUBWENYA mbuli dokota mbwakwabilila balwazi kwiinda mukusamba kumaanza, kusanzya zibelesyo zyakwe alimwi akubona kuti muŋanda mwabelekela mulasalala, andinywe mulakonzya kukwabilila mukwasyi wanu kwiinda mukusalala nywebo lwanu, muncikini yanu, alimwi azyakulya zyanu.

● Kamusamba kumaanza.

Cibeela citegwa Public Health Agency caku Canada caamba kuti “maanza alamwaya malwazi manji kapati aayambukila, mbuli cisyini.” Aboobo, mweelede kusamba kumaanza ansipa kamutanalya, mwamana kubelesya cimbuzi alimwi anomubamba cakulya.

● Kamusalazya ncikini lyoonse.

Buvwuntauzyi bumwi bwakacitwa bwakatondezya kuti nokuba kuti mucimbuzi mwakali kulibonya kuti mulasalala kapati, “tuzunda tujanika mucimbuzi twakali kujanika kuzyintu zyakubelesya kusanzya mbale alimwi atusani twakubelesya kupukuta mbale.”

Aboobo, mweelede kucinca-cinca tusani twakubelesya kusanzya mbale alimwi akubelesya meenda aapya aajisi nsipa kusalazya bwaanda muncikini. Mubwini, tacili cuuba-uba kucita boobu lyoonse. Bakaintu bamwi bajisi zyina lyakuti Bola bakkala muŋanda iinyina meenda aakupompi. Baamba kuti: “Kuli buyumuyumu bupati. Pele lyoonse tulasinizya kuti nsipa ameenda nkozili kutegwa lyoonse katubelesya kusalazya muncikini alimwi amuŋanda moonse.”

● Amusanzye zyakulya zilimwa buya

Kazitanasambalwa zyakulya zilimwa buya, zilakonzya kazijisi tombe kuzwa kumeenda aatali kabotu, kutubi, kubanyama naa kuzyakulya zimwi zitajikidwe. Aboobo, nokuba kuti muyanda kufwala micelo naa kukokola cisyu camatewo, mweelede kuzisanzya kabotu kutegwa mugwisye tuzunda tukonzya kuleta malwazi. Eeci cilatola ciindi. Ba Daiane, bazyali baku Brazil baamba kuti: “Nondibamba zyakulya, tandibindi pe, kutegwa ndisinizye kuti zyasalala.”

● Kwaandaanya nyama iitanajikwa

Kutegwa mulikwabilile kutuzunda, amubikke nyama iitanajikwa, inkuku, alimwi azyakulya zyamulwizi acimwi cilikke mukapepa alimwi amuzyaandaanye kuzyakulya zimbi. Amusanzye cipeni ncomubelesya kutenda nyama naa inswi ameenda aapya ansipa kamutana kucibelesya alimwi anomwamana kucibelesya.

Lino mbwaanga nywebo, zibelesyo zyanu alimwi azyakulya zilasalala, mbuti mbomukonzya kubamba zyakulya cabulondo?

[Kabbokesi kali apeeji 15]

AMUBAYIISYE BANA BANU: Tulabayiisya bana besu kusamba kumaanza kabatanalya alimwi akusanzya naa kusowa cakulya icawida aansi.”—Oobu mbobakaamba ba Hoi, baku Hong Kong