Sena Zyakulya Zyanu Zili Kabotu?

“Cisi ca Germany Cajala Cikolo Akaambo Kabulwazi Bujanika Muzyakulya Butegwa Escherichia Coli.”—OOBU MBOWAKAAMBA MUTEENDE WIITWA KUTI REUTERS NEWS SERVICE, WAKU GERMANY.

“Bulwazi Butegwa Salmonella Bwaambwa Kuti Buzwa Kuzisyango Zijanika Muzyooko Zyosanwe.”—OOBU MBOWAKAAMBA MUTEENDE WIITWA KUTI USA TODAY.

“Nyama Yaŋombe Zili Cisambomwe Izyakalisyigwa Musamu Uukola Yasika Muzyooko Zili Fwuka.”—OOBU MBOWAKAAMBA MUTEENDE WIITWA KUTI THE MAINICH DAILY NEWS, WAKU JAPAN.

MITWE yamakani iili atala aawa, itondezya zyintu zyakacitika mukaindi kasyoonto buyo mwaka wamana. Basyaazibwene baamba kuti, mwaka amwaka bantu babalilwa ku 30 pesenti ibakkala muzisi zisumpukide kapati balaciswa bulwazi buboola akaambo kakulya zyakulya zitali kabotu.

Ino makani aali boobu amujatikizya buti nywebo? Ba Hoi, ibazyali bakkala ku Hong Kong, bakaamba kuti: “Ndilalibilika alimwi ndilanyema kapati. Ndilijisi bana bobilo, musankwa amusimbi, ndilalibilika kujatikizya mbozibambwa zyakulya alimwi ankozibambilwa.”

Muzisi zipengede kapati, malwazi aajanika muzyakulya amumaanzi alajaya mamiliyoni aabantu mwaka amwaka, kwaambisya bana. Ba Bola, ibakkala ku Nigeria, bakaamba kuti: “Kumisika yakokuno, zyakulya zilakkalwa nzinini, zilalokelwa mvula, alimwi zilabija akasuko. Ikuti ndabala naa kumvwa makani amwi aajatikizya malwazi aaboola kwiinda muzyakulya, ndilayoowa kapati. Ndiyanda kukwabilila bamukwasyi wangu.”

Sena cilakonzyeka kuukwabilila mukwasyi wanu kuzyakulya zitali kabotu? Bamukabunga kamwi kaku Canada ikalanganya zyakulya bakaamba kuti: “Ikuti naa bantu basambala zyakulya zitali kabotu muzintoolo, bantu banji balazyiba alimwi balakonzya kunyema. Pele zyakulya zitali kabotu zyalo zikonzya kuleta malwazi zilakonzya kujanika amumaandeesu motujikila.”

Ncinzi ncomukonzya kucita kutegwa mukwabilile mukwasyi wanu kumalwazi aaboola kwiinda muzyakulya? Tulalanga-langa nzila zyone mbomukonzya kucita kutegwa cakulya canu kacisalala.

[Kabbokesi kali apeeji 13]

INO MBAANI BALI MUNTENDA?

Bantu bamwi balimuntenda kumalwazi aboola akaambo kazyakulya babikkilizya:

● Bana batanakkwanya myaka yosanwe

● Bamakaintu bamitide

● Bantu bajisi myaka yakuzyalwa iinda ku 70

● Bantu batajisi nguzu zikwabilila mubili kumalwazi

Ikuti nywebo naa muntu umwi wajanika mubukkale buli boobu, mweelede kubikkila maano kuzyakulya nzyomulya.

[Kulumba]

Buvwuntauzi oobu bwakacitwa aba New South Wales Food Authority, baku Australia.