Ino ncinzi ncondeelede kulangila mulukwatano?—Cibeela 1
Bakubusi Balabuzya
Ino ncinzi ncondeelede kulangila mulukwatano?—Cibeela 1
“Ndilakkomana kapati ciindi notuli antoomwe! Ndilangila buyo ciindi notuyookwatana!”
“Zyintu nzyotukkomanina ziliindene kapati. Muciindi cakukkomana mbuli banabukwetene, tuli buyo mbuli bantu batakwetene bakkala buyo antoomwe. Alimwi ndilalendelelwa kapati!”
MAJWI aambwa atala aawa akaambwa amusimbi uutakwetwe; mpoonya majwi aali kulumwensyi akaambwa amuntu uukwetwe. Pele bwini mbwakuti, majwi oonse aaya akaambwa amuntu omwe.
Ino ncinzi cakalubila? Ikuti naa ulangila kuyookwatwa naa kukwata, mbuti mbokonzya kupa kuti kuciindizya kulangila zyintu zibotu mulukwatano kutakaleti mapenzi mulukwatano?
Bwini mbwakuti: Lukkomano mulukwatano luyeeme kapati azyintu nzyolangila kuzwa muli ndulo.
Cibalo eeci—alimwi acibalo ca “Bakubusi Balabuzya” cili mu Sinsimuka! iitobela—ciyookugwasya kuzilanga munzila yeelede zyintu.
Ino nzyintu nzi zikonzya kucitika nzyoyelede kulangila mulukwatano? Ulakonzya:
(1) Kulangila bubotu
(2) Kulangila buyumuyumu
(3) Kulangila zyintu zitayeeyelwi
Lino atuzilange-lange zyintu eezyi cimwi acimwi.
KULANGILA BUBOTU
Bbaibbele lilaamba zyintu zibotu kujatikizya lukwatano. (Tusimpi 18:22) Mboobu bubotu mbokonzya kulangila.
Bulongwe. Bbaibbele lyaamba kuti kuzwa ciindi naakalengwa mwaalumi wakusaanguna Adamu, Leza wakaamba kuti: “Tacili cibotu kuti muntu akale alike pe,” kumane Leza wakalenga Eva mulongwe wa Adamu. (Matalikilo 2:18) Umwi aumwi wakalengwa kajisi bube bwiindene kutegwa kabaindene, pele kabamvwana. Aboobo, mulumi amukaintu bapanga cilongwe cibotu kuli umwi aumwi.—Tusimpi 5:18.
Kubelekela antoomwe. Bbaibbele lyaamba kuti: “Bantu bobile mbabotu kwiinda omwe, nkaambo balajana impindu imbotu kumilimo yabo.” (Mukambausi 4:9) Oobu mboceelede kuba mulukwatano. Mukaintu uucili mwana-mwana alimwi wakakwatwa caino-ino wazyina lyakuti Brenda wakaamba kuti: “Lukwatano lubikkilizya kubelekela antoomwe alimwi akulicesya.” *
Kuyandana. Bbaibbele lyaamba kuti: “Mulumi ape mukaintu wakwe zyeelede, awalo mukaintu acite mbubonya kumulumaakwe.” (1 Bakolinto 7:3) Kuti kokwete naa kukwatwa, mulakonzya kulikkomanisya kwiinda mukoonana kakunyina kulibilika alimwi akuusa, mbuli mbobacita bantu boonana kabatakwetene.—Tusimpi 7:22, 23; 1 Bakolinto 7:8, 9.
Kaambo kapati: Lukwatano ncipego kuzwa kuli Leza. (Jakobo 1:17) Ikuti waatobela malailile aakwe, ulakonzya kulangila kupona buumi bwalukkomano.
Zyakuyeeyesya: Sena lukwatano ulubona munzila mbyaabi akaambo kazikozyanyo zitali kabotu nzyowakabona kubantu bambi—naa mumukwasyi wako? Ikuti kacili boobo, ino nzikozyanyo nzi zibotu zyamikwasyi nzyokonzya kwiiya?
KULANGILA BUYUMUYUMU
Bbaibbele lilaamba makani aagwasya kujatikizya lukwatano. (1 Bakolinto 7:28) Mboobu buyumuyumu mbokonzya kulangila.
Kuzwangana. Kunze buyo lyakutalondoka, kunyina bantu bajisi bube bukozyene. (Baloma 3:23) Aboobo, nokuba kuti mulumi amukaintu inga kabalibonya kuti balamvwana, pele balakonzya kuzwangana ciindi aciindi. Zimwi ziindi balakonzya kwaamba zyintu zitakkomanisyi, izikonzya kubausya nsoni kumamanino. Ibbaibbele lyaamba kuti: “Uutalubizyi mukwaambaula, ooyo muntu ulilondokede.” (Jakobo 3:2) Muciindi cakwaaleka buyo makani aapa kuzwangana lyoonse, banabukwetene beelede kwiiya kubandika kuti naa kuli kutamvwana akati kabo.
Kutyompwa. Musimbi wazyina lya Karen wakaamba kuti: “Mumafilimu amapulogilamu aa TV mujanika basimbi balakwatwa kubasankwa ‘babotu’ balo mbobakkala limwi calukkomano.” Ciindi lukwatano nolutabi kweelana ambolutondezyegwa mumafilimu alimwi amumabbuku, boonse basikukwatana balatyompwa. Masimpe ngakuti, bantu bamana kukwatana balatubona tumpenda alimwi akulubizya kwamweenzinyina ngobakwetenelimwi. Lyoonse weelede kuyeeya kuti luyando lwini-lwini “lulaliyumya muzyintu zyoonse”—nokuba ciindi notyompedwe.—1 Bakolinto 13:4, 7.
Kulibilika. Bbaibbele lyaamba kuti bantu bakwetene ‘balasungwaala kujatikizya zyintu zyamunyika.’ (1 Bakolinto 7:33, 34) Kusungwaala naa kulibilika ooko takulubide pe, alimwi kuleelede buya. Mucikozyanyo, cilakonzya kukatazya kujana ziyandika zyakumubili. Banabukwetene boonse inga bayandika kubelekela antoomwe kutegwa bajane zyakulya, zyakusama, alimwi acilawo aakukkala. Aboobo mulakonzya kuzwidilila ikuti kamubelekela antoomwe kujana ziyandika mumukwasyi.—1 Timoteyo 5:8.
Kaambo kapati: Ikuti kacimuyumina kumvwana ciindi nomweebana, nkokuti ciyoomwaalila kumvwana mwaakukwatana. Kuti kacili boobu, mweelede kubeleka canguzu akuba aaluzyibo kutegwa mukacikonzye kuzunda buyumuyumu mbomuyoojana.
Zyakuyeeyesya: Mbuti mbomwaamana mazwanga aacitika lino abazyali bako naa abanabokwanu? Sena ulakonzya kuliyumya ciindi notyompedwe? Ino ulizunda buti penzi lyakulibilika?
MUCIBALO CITOBELA CA “BAKUBUSI BALABUZYA” . . . Mbuti malailile aamu Bbaibbele mbwaakonzya kukugwasya kulangila zyintu zitayeeyelwi?
[Bupanduluzi buyungizidwe]
^ munc. 17 Mazyina amwi mucibalo eeci akacincwa
[Kabbokesi/Cifwanikiso icili apeeji 10]
NZYOBAAMBA BEENZINYOKO
Brittany—Ndiyeeya kuti tacili kabotu kukwatwa naa kukwata akaambo buyo kakuti wakatala kubuzyigwa kuti, “Ino uyookwatwa naa uyookwata lili?” Kakuli kwaakuba mapenzi, nduwe uyakwaalanganya olikke—kutali baabo bakusinikizya kukwatwa naa kukwata.
Ciara—Mbobalimvwa bantu, kulakonzya kubapa kutayeeya kabotu. Nkakaambo kaako bazyali ncobeelede kugwasya kusala muntu ngomuyookwatanalimwi. Bazyali bako balikuzyi kabotu mbobede, aboobo beelede kukugwasya kujana muntu uukweelede.
[Kabbokesi kali apeeji 11]
INO UYEEYA BUTI?
Josh alimwi a Melanie bali kweebana kwamwaka omwe. Mumwaka ngweena ooyu bakatiicimane cisyabo cabo ziindi zyobilo. Ciindi cakusaanguna, Josh wakali kuyanda kucimana cisyabo ciindi naakatamikizya Melanie kuti wakali kusobana abasankwa bambi. Ciindi cabili Melanie wakaambila Josh kuti cisyabo cimane nkaambo cakamuyumina kuliyumya kukutamikizyigwa. Muziindi zyoonse eezyi zyobilo Josh alimwi a Melanie bakacikonzya kwaamana mazwanga aabo.
Ino uyeeya buti? Sena kuli ntenda iili yoonse njowabona mucisyabo caambwa atala aawa? Mbwaanga Josh alimwi a Melanie bakali kuyanda kucimana cisyabo ziindi zyobilo, ino eeci citondezya nzi? Kulubazu lumwi, ino kumana mazwanga nkobakacita kukuyiisya nzi? Ino uyeeya kuti ncinzi ncobakonzya kulangila mulukwatano ba Josh alimwi a Melanie?
[Kabbokesi kali apeeji 11]
INGA WABABUZYA BAZYALI BAKO
Amubandike abazyali bako kabbokesi kakuti “Ino Uyeeya Buti?” Mpoonya ubone naa mbobayeeya kujatikizya ba Josh alimwi a Melanie kulikonzyene amboyeeya.
