Ino ncikombelo nzi ncomwakali kunjila.

Bazyali bangu bakali ba Katolika, pele tiibakali kuunka kucikombelo. Nindakacili mwana, tiindakali kusyoma muli Leza. Ndakaisyigwa kuti buumi bwakatalika kwiinda mukusanduka kwazyintu, mpoonya ndakaasyoma makani aaya. Pele nokuba kuti tiindakali kusyoma kuti kuli mulengi, ndakalizyi kuti kuli muntu umwi mupati kwiinda bantu boonse. Kutegwa ndizyibe masimpe, ndakanjila cikombelo caba Bbuda, ba Hindu, alimwi acaba Tao, pele mibuzyo yangu tiiyakaingulwa pe.

Ino ncinzi cakapa kuti mutalike kwiiya sayaansi?

Kuzwa kubwana, mincini yakali kundikkomanisya. Zimwi ziindi ndakali kutujaya tootokala twangu twakusobanya twamagesi kwiinda mukutwaangununa akutwaanga alimwi. Mbokunga bataata bakali basyaazibwene mukupanga mafooni azilimba, ndakali kubabuzya mibuzyo minji kujatikizya mbozibeleka zyintu eezyi.

Ino mulimo wanu wabusyaazibwene musayaansi wakali kubikkilizya nzi?

Ndakaiya mulimo wakupanga zyintu zyamagesi ku University of Genoa, kumane ndakabweza digili kwiinda mukuyungizya lwiiyo lwangu nindakavwuntauzya kujatikizya mbwaakonzya kubeleka kabotu malobboti. Ndakaiya kujatikizya muntu mbwabona alimwi anzila zisiyene-siyene nzyotukonzya kubelesya kutegwa tupange malobboti

Ino nkaambo nzi kwiiya muntu mbwabona ncocakamukkomanisya?

Ncintu cigambya kapati, nkaambo tacibikkilizyi buyo liso pe, pele cilabikkilizya  anzila zyintu nzyotubona mbozisandululwa mubongo bwesu. Mucikozyanyo, atulange-lange cicitika ciindi twajata bbola. Ciindi nomubalika kutegwa mujate bbola, mboni yanu yaliso ibikkila buyo maano acikozyanyo cabbola akucitola muliso. Cikozyanyo cabbola eelyo cileenda mukati kaliso kweelana ambolyeenda bbola lini alimwi aliso mbolitobelezya. Masimpe ngakuti, nywebo mulangide buyo abbola eelyo. Kumane mukati kaliso, cikozyanyo cabbola cilaleka kweenda kakuli kuti zyintu zicizingulukide inga “kazyeenda.”

Aciindi nciconya eeci, nguzu zyanu zyakubona zilakonzya kuzyiba mbolyeenda bbola alimwi ankolitozya. Cigambya ncakuti, eezyi nguzu zyakuzyiba zitalikila muliso lyanu akweezyeezya bweende bwabbola kweelana azyintu zilizingulukide bbola eelyo. Kumane itusinga twamuliso tulatuma mulumbe kubongo wapangilwa mukati kaliso, walo uulangwa-langwa alimwi akumupa kuti mulibone akulijata bbola. Eelo kaka bubambe boonse oobu bulagambya kapati!

Ino ncinzi cakapa kuti mutalike kusyoma kuti kuli Mulengi?

Mu 1990, kwamyezi iili mbwiibede ndakali kuvwuntauzya kucikolo ciitwa kuti Trinity College mu Dublin, ku Ireland. Ciindi nitwakali kuunka kuŋanda abakaintu bangu ba Barbara, twakali kubandika kujatikizya buumi bwabana besu. Aboobo twakayeeya kuti tukaswaye mucizyi wangu walo wakali Kamboni wa Jehova. Mucizyi wangu ooyu wakandipa bbuku lya Life—How Did It Get Here? By Evolution or by Creation? ilyakamwaigwa a Bakamboni ba Jehova. Buvwuntauzi bwakacitwa mubbuku eeli bwakandikkomanisya kapati. Kumane ndakausa akaambo kakusyoma mukusanduka kwazyintu kakunyina kulanga naa kuli makani aagwasilizya. Mucikozyanyo, ndakali kuyeeya kuti njiisyo yakusanduka kwazyintu yakali kugwasilizyigwa azyintu zyakaindi zyakavwukkulwa. Pele tabusyi mbucibede oobu. Masimpe ngakuti, ciindi nindakavwuntauzya makani manji kujatikizya njiisyo yakusanduka kwazyintu, ndakazyiba kuti eeyi njiisyo tiiyakali yamasimpe.

Kumane eeci cakandiyeezya mulimo wangu wakupanga malobboti. Ino nguni ngundakali kwiiya? Cakandaalila kupanga cilobboti cakali kucikonzya kujata bbola mbuli mbotucita. Cilobboti cilakonzya kupangwa kuti kacijata bbola, pele cilakonzya kucita oobo lilikke buyo kuti mbucakapangwa kuti kacicita oobo. Tacikonzyi kucita oobo kuti naa tiicakapangwa kucita boobo. Kucikonzya kwiiya nkotucita takukonzyi kweezyanisyigwa amuncini uuli woonse wakapangwa amuntu. Aaka nkamwi katwaambo kakandipa kuti nditalike kusyoma kuti kuli Wakatulenga.

Ino nkaambo nzi ncimwakaba Kamboni wa Jehova?

Ikaambo kamwi nkakuti, mebo alimwi aba Barbara twakabukkomanina buvwuntauzi bwakabelesyegwa. Ndakakkomana kapati kubuvwuntauzi bwakali kucitwa mumabbuku aabo. Buvwuntauzi bwabo bulabakkomanisya kapati bantu bali mbuli ndime, ibalaaluyandisisyo lwakuzyiba zinji kujatikizya zyintu. Mucikozyanyo, ndakatalika kubukkomanina businsimi bunji, naa zisyomezyo zyamu Bbaibbele. Kwiiya kujatikizya zyintu eezyi cakandipa kusyoma kuti masimpe Bbaibbele lyakazwa kuli Leza. Mu 1992, mebo aba Barbara twakabbapatizyigwa kuba Bakamboni ba Jehova.

Sena kwiiya sayaansi kwakapa kuti lusyomo lwanu luceye?

Peepe, kwiiya sayaansi kwakayumya lusyomo lwangu. Mucikozyanyo, amulange-lange mbuli mbotucikonzya kuzyiba masyu aabantu. Mwana mbwaazyalilwa, ulakonzya kuzyiba busyu bwamuntu kwainda buyo mawoola masyoonto. Toonse tulakonzya kumuzyiba cakufwambaana muntu ngotuzyi kale, nokuba kuti uli munkamu yabantu. Alimwi tulakonzya akuzyiba muciimo mwabede. Nokuba boobo, inga katutazyi kuti zyoonse eezyi zilacitika mukulaba kwaliso.

Inzya, ndili masimpe kuti nguzu zyakubona eezyi ncipego cizwa kuli Jehova Leza. Zipego zyakwe, zyalo zibikkilizya a Bbaibbele, zindipa kumulumba alimwi akwaambila bamwi kujatikizya nguwe. Alimwi buya, manjezyeezya aangu andaambila kuti uleelela kulemekwa akaambo kazyintu nzyaakalenga.