“Kufwumbwa muntu uulangisisya mukaintu cakuti wamunyomenena, wacita kale bumambe anguwe mumoyo wakwe.”—Matayo 5:28.

NCAALI MAKANI MAPATI

Mazuba aano zyintu ziletela muzeezo wakoonana zilidumide kapati alimwi tazikatazyi kujanika kwiinda kaindi. Ikuti kamuyanda kukkomanisya Leza akupona buumi bukkomanisya, mweelede kuzyiba mbwalimvwa Leza kujatikizya zyintu ziletela muzeezo wakoonana.

NCOLYAAMBA BBAIBBELE

Bbaibbele talyaambi cacigaminina kujatikizya zyintu ziletela muzeezo wakoonana. Nokuba boobo, micito iiletela muzeezo wakoonana tayeendelani anjiisyo zinji zyamu Bbaibbele.

Mucikozyanyo, Ibbaibbele lilacenjezya kuti, ikuti muntu uukwete ‘kalangisisya mukaintu’ ngobatakwetene limwi, cakuti wamunyomenena, cilakonzya kupa kuti acite bumambe. Injiisyo yamu Bbaibbele eeyi ilabeleka kumuntu uuli woonse, kufwumbwa naa ulikwete naa pe, ‘uulangisisya’ zyintu ziletela muzeezo wakoonana kajisi makanze aakucita bwaamu. Micito iili boobo ilamunyemya Leza.

“Aboobo, amujaye zizyo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kulombozya kubyaabi, alimwi abulyato kwalo kuli nkukomba mituni.”—Bakolose 3:5.

 NZYOBAAMBA BANTU

Basikuvwuntauzya bamwi balazumbauzya kuti muntu weebelela zyintu ziletela muzeezo wakoonana ulakonzya kuyungwa kucita bwaamu. Pele, sena micito iiletela muzeezo wakoonana ilamunyemya Leza?

NCOLYAAMBA BBAIBBELE

Bbaibbele lyaamba kuti “masesya aajatikizya zitondwa” mabi kapati. (Baefeso 5:3, 4) Mbuti zyintu ziletela muzeezo wakoonana mbozikonzya kwaambwa kuti zili buyo kabotu? Mazuba aano zyintu ziletela muzeezo wakoonana kanji-kanji zibikkilizya mafilimu atondezya bantu boonana, koonana kwabantu bajisi zizyo zikozyenye, alimwi amicito imwi yabwaamu. Mubwini, kweebelela zyintu zili boobu kulamunyemya kapati Leza kwiinda kwaamba masesya aajatikizya zitondwa.

Basikuvwuntauzya bazumanana kukazyanya kuti kweebelela zyintu ziletela muzeezo wakoonana takuli nkuko kupa bantu kutalilemeka. Pele Bbaibbele cakusalazya lilatondezya kuti micito iiletela muzeezo wakoonana ilanyonyoona kumuuya alimwi ilamunyemya kapati Leza. Bbaibbele licenjezya kuti: ‘Amujaye zizyo zyamubili wanu mbuli bwaamu, busofwaazi, alimwi aluunyaunya.’ (Bakolose 3:5) Aabo beebelela zyintu ziletela muzeezo wakoonana bacita ciimpene ancolyaamba Bbaibbele—muciindi cakujaya zisusi eezyi, balo balazibusya.

“Amuyandaule bubotu, mutayandauli bubi pe . . . Amusule bubi akuyandisya bubotu.”—Amosi 5:14, 15.

NCOLYAAMBA BBAIBBELE

Bbaibbele lilaamba kujatikizya basibwaamu, bakolwi, alimwi ababbi, ibakacikonzya kuleka micito yabo iinyonyoona. (1 Bakolinto 6:9-11) Munzila nzi? Kwiinda mukubelesya busongo buzwa mu Jwi lya Leza, bakaiya kusulaika bubi.

Cilakonzyeka kwiiya kusulaika zyintu ziletela muzeezo wakoonana kwiinda mukuyeeyesya ntenda zikonzya kuboola akaambo kamicito eeyi mibyaabi. Buvwuntauzi bwakacitwa caino-ino aba Utah State University bwakatondezya kuti bantu beebelela zyintu ziletela muzeezo wakoonana balakonzya “kutyompwa, kulyaandaanya, kunyonyoona zilongwe,” alimwi abukkale bumwi buusisya. Kuyungizya waawo, mbubwenya mbukwaambwa kumatalikilo, akaambo kakuti kweebelela zyintu ziletela muzeezo wakoonana kulamunyemya Leza, kulakonzya kuleta ntenda mpati aimbi. Kupa kuti bantu batabi aacilongwe a Leza.

Bbaibbele lilakonzya kutugwasya kwiiya kuyanda bubotu. Kuti twazumanana kubala Bbaibbele, luyandisisyo lwesu lwazyeelelo zyamu Bbaibbele zyakulilemeka luyookomena. Luyandisisyo oolo luyootugwasya kukaka zyintu ziletela muzeezo wakoonana alimwi luyootupa kulimvwa mbweena mbwaakalimvwa Sintembauzyo iwakalemba kuti: “Cintu cabuyo nsikooyoocibika kumeso aangu.”—Intembauzyo 101:3.