Lyoonse ciindi nokuba mazwanga, nywebo alimwi angomukwetene limwi mulafwambaana kupana milandu. Kwaamba majwi aanyemya cakaba cilengwa buya mulukwatano lwanu cakuti lino yaba “nenzila” njomubandisyanya.

Kuti naa mbocibede oobo mulukwatano lwanu, mulakonzya kucinca. Pele cakusaanguna, mweelede kuzyiba cileta penzi eelyo alimwi ancomuyandila kucinca.

Mumukwasyi mobakakomenena. Bunji bwabamaalumi alimwi abamakaintu, bakakomenena mumikwasyi mwalo majwi aanyemya mwaakali kubelesyegwa kapati. Boonse naa omwe akati kabanabukwetene ulakonzya kuti kabelesya majwi aayo aanyemya ngaakali kumvwa kubazyali bakwe.

Kuyungwa azyakulikondelezya. Zisobano zyaa TV alimwi amafilimu mobabelesya majwi mabi, bantu bazibona kuti masesya, calo cipa kuti basikweebelela kabayeeya kuti majwi mabi taakonzyi kuleta ntenda iili yoonse.

Zilengwa. Mumasena aamwi baamba kuti “baalumi beni-beni” beelede kubadyaaminina bamakaintu babo alimwi mumasena aambi baamba kuti bamakaintu beelede kuba abukali kutegwa kabalibonya kuti abalo balijisi nguzu. Ciindi camazwanga, banabukwetene ibajisi bube buli boobo balakonzya kubona mweenzinyina kuti ngusinkondo kutali mulongwe alimwi balabelesya majwi aajaya muciindi cakubelesya majwi aaponya.

Tacikwe makani akaambo kapa kuti cibe boobo, majwi aanyemya alakonzya kupa kuti banabukwetene balekane alimwi alakonzya kuleta malwazi aaboola akaambo kakunyema-nyema. Bamwi mane baamba kuti majwi alacisa kapati kwiinda kuumwa. Mucikozyanyo, mukaintu umwi iwakaumwa alimwi akwaambilwa majwi mabi kumulumaakwe wakaamba kuti: “Majwi mabi akandicisa kapati kwiinda kuumwa. Alimwi buya ndilombozya kuti nibakali kunduuma buyo muciindi cakundifwubaazya.”

 Ncinzi ncomunga mwacita kuti nywebo alimwi angomukwetene limwi mwalekela cilengwa cakwaamba majwi aanyemya kunyonganya cilongwe canu?

Amutondezye luzyalo. Amulibikke muciimo camuntu ngomukwetene limwi, alimwi amuyeeye mbwalimvwa ciindi nomumwaambila majwi aanyemya. Kuti kacikonzyeka, amuyeeye ciindi cimwi nomwakamwaambila majwi amwi ngomuyeeya kuti akamucisa ngomukwetene limwi. Mutabikkili maano kumajwi ngomwakaamba, pele amubikkile maano kujatikizya mbwalimvwa ngomukwetene limwi kumajwi aayo. Sena kuli majwi aambi ngomuyeeya kuti nimwakaamba ngawo muciindi cakwaamba majwi aanyemya? Bbaibbele lyaamba kuti: “Kuvuwa kabotu kulalesya bukali, pele majwi mabi alabusya inkondo.”—Tusimpi 15:1.

Amwiiye cikozyanyo cabanabukwetene bali kabotu. Kuti naa mwakanyonganizyigwa abanabukwetene bajisi cikozyanyo cibyaabi muŋambawido, amwiiye kuli baabo bajisi cikozyanyo cibotu. Amubaswiilile alimwi akubaiya banabukwetene babandika cabulemu.—Mpoijanika njiisyo eeyi mu Bbaibbele: Bafilipi 3:17.

Amuyeeye ciindi nyoonse nomwakakkomene. Kanji-kanji majwi aanyemya azwa mumoyo kutali kumulomo. Aboobo, amusoleke canguzu kutondezya mizeezo mibotu alimwi akumuyanda ngomukwetene limwi. Amuyeeye zyintu zibotu nzyomwakali kucitila antoomwe. Amulange zifwoto zyanu zyakaindi. Ncinzi cakamusesya? Mbube nzi bwakapa kuti muyandane?—Mpoijanika njiisyo eeyi mu Bbaibbele: Luka 6:45.

Amulibikkilizye ciindi nomubandika. Muciindi cakwaamba majwi mabi kumuntu ngomukwetene limwi, amwaambe buyo mbomulimvwa. Mucikozyanyo, mulakonzya kwaamba kuti “Kuti mwacita cintu cimwi kakunyina kundaambila, ndilimvwa kubula mpindu.” Majwi aali boobu alakonzya kupa muntu kuti aingule kabotu muciindi cakwaamba kuti “mbomubede buya nywebo—lyoonse mulacita zyintu kakunyina kundaambila!”—Mpoijanika njiisyo eeyi mu Bbaibbele: Bakolose 4:6.

Amuzyibe ciindi nomweelede kuumuna. Ciindi nomwabona kuti tamubandiki kabotu alimwi mwatalika kunyema, inga cabota kwaaleka makani ngomubandika akuyakwaabandika ciindi cimbi. Ikuti nomubandika mwanyemezyanya, cili buyo kabotu kuzwa kusikila mwatontomana.—Mpoijanika njiisyo eeyi mu Bbaibbele: Tusimpi 17:14.