Sena inga mwatwaambila zyabukkale bwanu?

Bataata bakali basyaazibwene muzyakupanga-panga. Lyoonse bakali kundaambila kujatikizya sayaansi alimwi anamba. Nindakacili mwana, ndakali kubakkomanina banyama alimwi azisyango izyakali kujanika mutulonga amumazyiba aakali munsi-munsi ankondakali kukkala mumunzi wa New Paris, ku Ohio, mucisi ca U.S.A. Aboobo, nendakaunka ku Purdue University, ndakasala kwiiya ciiyo ca ecology naa kwiiya zilenge.

Sena bukombi bwakali kumukkomanisya?

Inzya, bwakali kundikkomanisya. Bataata bakali kundikulwaizya kubala makani aacikombelo cesu ca Lutheran. Ndakaiya mwaambo wa Chigiliki wiitwa kuti Koine, walo uuli ngumwi wamyaambo molyakasaanguna kulembwa Bbaibbele. Ndakatalika kulilemeka kapati Bbaibbele.

Mbuti mbomwakali kwiibona njiisyo yakusanduka kwazyintu?

Cikombelo cangu cakali kwiizumina. Beenzuma bakali kwiisyoma. Aboobo, andime ndakaizumina. Pele alimwi ndakali kusyoma muli Leza. Ndakali kuyeeya kuti njiisyo eezyi zyoonse zyobilo zyakali kweendelana. Nokuba kuti ndakali kulilemeka Bbaibbele, kunyina nindakali kusyoma kuti lyakazwa kuli Leza.

Ncinzi cakamupa kucinca kujatikizya mbomwakali kulibona Bbaibbele?

Ba Steve alimwi aba Sandy, Bakamboni ba Jehova, bakatuswaya amukaintu wangu Debbie. Bakatutondezya kuti Bbaibbele lililuzi mumakani aasayaansi nokuba kuti talili bbuku lyasayaansi. Mucikozyanyo, lyaamba Leza kuti: “Ngonguwe uukede atala lyamubalo wanyika.” (Isaya 40:22) Alimwi lilaamba kuti ‘ulaanzika nyika kutakwe ciliko.’ (Jobu 26:7) Magwalo aaya akandikkomanisya kapati nkaambo aciindi eeco, ndakali kwiiya kujatikizya mboibede nyika kwiinda  mukubelesya zifwoto zyanyika zyakafwotolwa amuncini wa satellite. Magwalo aaya akalembwa kaindi kakutanaba naba omwe wakabufwotwede kale buyale bwanyika yaanzikidwe aatakwe cintu. Nibakatalika kutuyiisya Bbaibbele ba Steve aba Sandy, ndakaiya kujatikizya businsimi bwakazuzikizyigwa, malailile aagwasya, alimwi abupanduluzi bwakandipa kukkutila. Aasyoonto-syoonto, ndakatalika kusyoma kuti Bbaibbele Ndijwi lya Leza.

Ndilili nomwakacinca mizeezo yanu kujatikizya matalikilo aabuumi?

Mukuya kwaciindi, ba Steve bakanditondezya kaambo kamu Bbaibbele kalimvwisya kakuti: “Jehova Leza wakabumba muntu. Wakamubumbya bulongo bwaansi.” (Matalikilo 2:7) Muntu wakusaanguna ulijisi matalikilo. Eeci cakabusya mubuzyo wakuti: Sena Bbaibbele lileendelana amakani aasayaansi? Ba Steve bakandikulwaizya kwaavwuntauzya makani aaya, aboobo ndakacita oobo.

Ncinzi ncomwakaiya kujatikizya makani aakusanduka kwazyintu?

Ndakaiya zyintu zinji. Kwaamba buyo comwe, makani aakusanduka kwazyintu alasoleka kupandulula matalikilo aazilenge. Zyintu zipona zipangidwe aazizo zyamubili mbuli moyo, mapunga, alimwi ameso. Alimwi, ikuti twabelesya muncini wa microscope kulanga mukati aakaseelo, tulabona tubeela-beela tupangidwe munzila iigambya. Ino tubeela-beela ooto twakazwa kuli? Bantu ibasyoma mukusanduka kwazyintu baamba kuti tubeela-beela tupangidwe kabotu tulajanika mukati kazyintu zipona nkaambo kakuti zyintu eezyo zipona kabotu. Pele muzeezo ooyu taupi bwiinguzi kumubuzyo wakuti: Ino bubambe oobu bwakatalika buti? Ndakazyiba kuti bunji bwabasyaazibwene musayaansi tabasyomi kuti makani aakusanduka kwazyintu alaingula mubuzyo ooyu. Syaazibwene umwi mumakani aabanyama wakandaambila kuti awalo kunyina naakali kusyoma munjiisyo yakusanduka kwazyintu. Nokuba boobo, kunyina naakali kubaambila bantu muzeezo ooyu akaambo kakuyoowa kutandwa mulimo.

Sena luzyibo lwanu mulwiiyo lwazilenge luyumya lusyomo lwanu muli Leza?

Inzya. Mulimo wangu ngwakwiiya zyintu zipona mboziponena azyeenzinyina. Munyika, zyintu zyoonse zipona ziponena azyintu zimwi. Mucikozyanyo, amulange-lange maluba-luba alimwi anzuki. Maluba-luba mbwaaboneka, mbwaanunkilila, amulolo uujanika muli ngawo, zipangidwe munzila iikwelelezya nzuki, mpoonya zyakkala mpawo nzuki, bungu bulajatilila kumaulu. Inzuki zipangidwe kuti kazinywa mulolo wamumaluba-luba akubweza bungu bwamaluba-luba bwajatilila kumaulu akubutola kucisyango cimbi kutegwa kupangwe nseke. Masimpe, maluba-luba alimwi anzuki zipangidwe munzila yakuti kazigwasyanya.

Twalanga zilenge zipona, tulabona mbozigwasyanya mumbazu ziindene-indene. Zilenge eezyi zibikkilizya misyobo-misyobo yabanyama, zisyango, tuzunda alimwi abowa. Muya alimwi azyakulya nzyobabelesya banyama zizwa kuzisyango, azyalo zisyango zyamaluba-luba zilagwasyilizigwa abanyama. Nokuba kuti bubambe oobu bulakatazya alimwi zilenge zili mumo zilakonzya kufwa ciindi cili coonse, zilenge eezyi inga zyazumanana kupona kwamyaka minji. Nokuba kuti bubambe oobu bwanyonganizyigwa akaambo kakusofwaazyigwa kwanyika, bulalibukulusya alimwi kufwumbwa buyo kuti busofwaazi oobo bwamana. Kuti ndayeeya kujatikizya kuzumanana kwabubambe boonse oobu, ndilasyoma kuti zyintu zipona zyakalengwa buya a Leza.

Nkaambo nzi ncomwakaba Kamboni wa Jehova?

Ndakali kulibilika kapati kubona bantu mbobaisofwaazya nyika. Ndakalizyi kuti nokuba kuti zilawo eezyi zilazumanana, tazinooliko lyoonse. Kuzwa kuli Bakamboni ba Jehova ndakaiya kweelana amagwalo mbwaamba kuti, Leza ‘uyoobanyonyoona aabo banyonyoona nyika.’ (Ciyubunuzyo 11:18) Majwi aaya akandinjila kapati mumoyo. Mbondakali kuyaabuzumanana kwiiya Bbaibbele, asyoonto-syoonto ndakatalika kusyoma kuti bulangizi bwamu Bbaibbele mbwamasimpe.

Ndilakkomana kwaambila bamwi kujatikizya nzyondisyoma, alimwi ndakaiya Bbaibbele abasyaabusongo basayaansi bamwi. Nindakakkwanya myaka iili 55, ndakacileka kubeleka akaambo kakuti ndakali kuyanda kuba aciindi cinji cakugwasya bantu kuzyiba Mulengi wabuumi alimwi amakanze ngajisi kujatikizya nyika.