CASIKA ciindi camupeyo kanyama aaka kaloona kwamyezi iili mbwiibede, awalo mubili ulatontola. Ino utontola kusika ali? Kulibonya kuti bunji bwabasikaale aaba, mibili yabo ilatontola kusika ku -2.9°C. Kuti kutontola kwasika waawa, nkokuti boongo bweelede kwaangana. Ino mbuti kanyama aaka mbokacikonzya kupona?

Amubone kaambo aaka: Kanyama aaka nokoona kwansondo zyobilo naa zyotatwe lyamupeyo, kalakankama kutegwa kakasaazye mubili kusika ku 36.4°C, mpoonya kalakasaalilwa kwamawoola aali 12 kusika ku 15. Basikuvwuntauzya baamba kuti nokuba kuti mawoola aaya aakukasaalilwa masyoonto, cilagwasya kapati kuti boongo butanyongani. Ciindi camupeyo, kulibonya kuti mutwe wasikaale walo ulakasaala asyoonto kwiinda mubili woonse. Nibakakapima, bakajana kuti nsingo taitontoli kwiindilila a 0.7°C.

Ciindi mupeyo nowamana, sikaale ulabuka, mpoonya boongo bwakwe bulatalika alimwi kubeleka kabotu-kabotu kwainda buyo mawoola obilo. Alimwi buya, buvwuntauzi bumwi bwakatondezya kuti boongo bwasikaale bulabeleka kabotu kwiinda nicatakaningasika ciindi camupeyo. Basyaazibwene balagambwa kapati kujatikizya boongo oobu mbobutalika kubeleka alimwi. Eeci icicitika balacikozyanisya kubwizu busyuuka kwainda mazuba masyoonto kuzwa ciindi syokwe nolyakapya.

Basikuvwuntauzya basyoma kuti buvwuntauzi bwabo kujatikizya sikaale buyoobagwasya kumvwisya mbobukonzya kubeleka boongo bwamuntu. Makanze aabo ngakwiiya akubona mbobakonzya kukwabilila naa kusilika bulwazi bwamaseelo aakuboongo, kubikkilizya abulwazi bwakuluba.

Ino muyeeya buti? Sena boongo bwasikaale uukkala kubusena butontola kapati bwakaba akaambo kakusanduka kwazyintu? Naa bwakalengwa buya?