NCOLYAAMBA BBAIBBELE
Lukwatano
Sena Lukwatano nkumvwana buyo?
“Leza ncaakaswaanganya kutabi muntu uucaandaanya.”—Matayo 19:6.
NCOLYAAMBA BBAIBBELE
Mumeso aa Leza, lukwatano lubikkilizya zyintu zinji kutali kumvwana buyo. Mbubambe busetekene akati kamwaalumi amukaintu. Ibbaibbele lyaamba kuti: “Kuzwa kumatalikilo ‘Leza wakalenga mwaalumi amukaintu. Akaambo kaceeci mwaalumi uyoosiya bausyi abanyina, eelyo aaba bobilo bayooba mubili omwe’ . . . Aboobo eeco Leza ncaakaswaanganya kutabi muntu uucaandaanya.” *—Maako 10:6-9; Matalikilo 2:24.
Majwi aakuti, “Leza ncaakaswaanganya,” taambi kuti lukwatano lupangilwa kujulu. Muciindi caboobo, kwiinda mukwaamba Mulengi wesu kuti Ngosikutalisya lukwatano, Ibbaibbele likankaizya mbobuyandika bubambe oobu. Banabukwetene ibalubona munzila eeyo lukwatano lwabo, balatondezya kuti mbubambe bwaciindi coonse alimwi lulisetekene, calo ciyumya makanze aabo kutegwa lukwatano lwabo luzwidilile. Balayumya bulangizi bwabo bwakuzwidilila ciindi nobatobela busolozi bwamu Bbaibbele ikuzuzikizya mikuli yabo mbuli mulumi naa mukaintu.
lno mwaalumi ujisi mukuli nzi?
“Mulumi ngomutwe wamukaintu wakwe.” —Baefeso 5:23.
NCOLYAAMBA BBAIBBELE
Kutegwa zyintu kazyeenda kabotu mumukwasyi, kweelede kuba muntu umwi uukosola makani. Ibbaibbele lipa mukuli ooyo kumulumi. Pele eeci tacaambi kuti mulumi weelede kuba sikudyaaminina naa sikakomokomo. Alimwi tacaambi kuti weelede kukaka kuzuzikizya mikuli yakwe, calo cikonzya kuminya mukaintu akumupa kwaalilwa kumulemeka. Muciindi caboobo, Leza uyanda kuti mulumi kabeleka canguzu kulanganya mukaintu wakwe akumupa bulemu mbuli mulongwe ngwayanda alimwi uusyomeka. (1 Timoteyo 5:8; 1 Petulo 3:7) Lugwalo lwa Baefeso 5:28 lwaamba kuti: ‘Balumi beelede kuyanda bakaintu babo mbuli mbobayanda mibili yabo beni.’
Mulumi uumuyanda ncobeni mukaintu wakwe ulabikkila maano kuzyintu nzyakonzya kucita alimwi akuswiilila mizeezo yakwe, ikapati mutwaambo tukonzya kuujatikizya mukwasyi. Teelede kukakatila buyo kumizeezo yakwe akaambo kakuti ngomutwe wamukwasyi. Ciindi muntu uuyoowa Leza Abrahamu naakakaka lulayo lwamukaintu wakwe lujatikizya mukwasyi, Jehova Leza wakamwaambila kuti: “Swiilila ijwi lyakwe.” (Matalikilo 21:9-12) Cakulicesya Abrahamu wakaswiilila, alimwi mukwasyi wakwe wakaba aluumuno, lukamantano, alimwi akulongezyegwa a Leza.
Ino mukaintu ujisi mukuli nzi?
“Nobakaintu, amulibombye kubalumi banu.” —1 Petulo 3:1.
NCOLYAAMBA BBAIBBELE
Katanalenga mukaintu, Leza wakaamba kuti: “Tacili cibotu kuti muntu akale alike pe. Atumucitile sikumugwasya uumweelede.” (Matalikilo 2:18) Mugwasyi nguupa kuti zyintu zizulile. Aboobo, Leza wakalenga mukaintu kuti abe mugwasyi wamwaalumi, pele kutali sikuzundana limwi naa uuyanda kweelana amwaalumi. Boonse antoomwe balakonzya kuzuzikizya mukuli ngobakapegwa aa Leza wakuba aabana alimwi akuzuzya nyika.—Matalikilo 1:28.
Kutegwa mukaintu acikonzye kuzuzikizya mukuli wakwe, Leza wakamupa bube bubotu mbuli maano alimwi anguzu zyakweendelezya mbwalimvwa. Kuti naa wabubelesya bube oobu cabusongo alimwi caluyando, ulakonzya kupa kuti lukwatano lwabo luzwidilile akupa mulumi wakwe kukkomana alimwi akukkutila. Mukaintu uuli boobo ulalumbaizyigwa a Leza. *—Tusimpi 31:28, 31.
^ munc. 5 Ibbaibbele lizumizya buyo bantu kulekana ikuti naa umwi akati kabo wacita bumambe.—Matayo 19:9.
^ munc. 14 Banabukwetene bayoojana nzila zinji zikonzya kubagwasya mulukwatano alimwi amumukwasyi mucibeela cijanika mu Sinsimuka! cijisi mutwe wakuti “Lugwasyo Kumukwasyi.”
Andiza Inga Mwaakkomanina Ayaaya
MULAKONZYA KUKKOMANA MUMUKWASYI WANU
Amusyome Leza Kutegwa Mukkomane Mucikwati
Kubelesya mibuzyo yobilo iitakatazyi inga camugwasya kupa kuti zintu zibote mucikwati canu.
MIBUZYO YAMU BBAIBBELE YAINGULWA
Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?
Malailile aa Leza alatwaambila mbotukonzya kuzwidilila mumukwasyi, alimwi zyeelelo zyakwe zilabagwasya aabo bazitobela.
MIBUZYO YAMU BBAIBBELE YAINGULWA
Ino Bbaibbele Lyaamba Nzi Kujatikizya Lukwatano Lucitwa Akati Kabantu Bamisyobo Iindene?
Amulange-lange njiisyo zimwi zyamu Bbaibbele zyaamba kujatikizya misyobo alimwi alukwatano
MIBUZYO YAMU BBAIBBELE YAINGULWA
Sena Bbaibbele Kuli Ncolyaamba Kujatikizya Zikwati Zyabantu Bajisi Zizo Zikozyenye?
Sikutalisya cikwati weelede kuti ulizyi kabotu kukamantanya bantu alimwi akuti kabakkomene.
MIBUZYO YAMU BBAIBBELE YAINGULWA
Sena Maali Alazumizyigwa?
Sena Leza nguwakaatalisya maali? Amulange-lange Bbaibbele ncolyaamba kujatikizya maali.
