CISI ca Italy cili mumbali aalwizi, cilijisi busena bupati mobasobanina bantu, alimwi cilizingulukidwe amalundu manji mwalo mupya kapati lyacilimo kulubazu lwakumusanza pele lyamupeyo kulatontola kapati kulubazu lwakunyika. Alimwi ncisi cijisi malundu aazwa mulilo, akati kamalundu masyoonto aayo, kuli Stromboli alimwi a Etna.

Italy ncimwi cazisi muli bantu banji kapati ku Europe. Kwakali misyobo yabantu iindene-indene yakali kwiinda mucisi eeci, mbuli bama Arab, ba Byzantine, ba Giliki, ba Norman alimwi abana Phoenician.

Eeci cisi cilijisi zyintu zyakali kubelesyegwa abantu bakaindi alimwi azyakuzekaula zinji. Matongo aaba Giliki aabana Roma alimwi azyakuzekaula zyakaindi zilalibonya mumadolopo manji aamucisi eeci. Zyintu zyakuzekaula alimwi azibumbwa izili mumigoti yameenda zilabatondezya basikuzipanga mbuli Bernini, Michelangelo alimwi a Raphael.

Bana Italy balakubikkila kapati maano kulya, alimwi balya zyakulya zibambilwa mucisi cabo. Bunji bwaziindi, pasta ncecakulya ncobasaanguna kwaaba, mpoonya kwatobela nyama naa nswi antoomwe azisyumani. Kanji-kanji, mafwuta aamaolifa alabelesyegwa nkaambo mucisi oomu alapangwa kapati. Acalo cilyo ca pizza alimwi aceeco ciitwa kuti risotto cilizyibidwe kapati mu Italy.

 Bana Italy balizyibidwe kapati kuti mbantu baseka-seka, ibasamausya, alimwi ibayanda kuyanzana abantu. Bantu bamucisi eeci balayanda kwiizya abantu, aboobo eeci cilalibonya kwiinda mumibandi yamubuleya alimwi ayeeyo njobaba aanjiyo ciindi nobeenda.

Bantu banji bamucisi eeci balizyibidwe kuti banjila Cikombelo ca Katolika, pele mbasyoonto baunka kucikombelo lyoonse. Mumyaka misyoonto yainda, luyandisisyo lwakukomba lwabantu bamucikombelo eeci lwayaansi akaambo kakuti bantu tabayandi kutobela milawo yacikombelo alimwi tabaibikkili maano milawo iijatikizya kugwisya mada alimwi akulekana.

Bakamboni ba Jehova bavwula kapati mu Italy. Balizyibidwe akaambo kakuyiisya Bbaibbele kubuleya alimwi akupona kweelana anjiisyo zyandilyo zisumpukide. Mbungano zya Bakamboni ba Jehova zilainda ku 3,000 mucisi coonse, alimwi basimbungano banji balakambauka kubantu baambaula myaambo iimbi kunze lyaci Italian. Kuyiisya Bbaibbele mumyaambo iitali yamucisi eeci kulayandika, nkaambo kakuti mumyaka iili kkumi yainda, mweelwe wabamuzwamasi wayungizyika ziindi zyotatwe mu Italy.