MAKANI AAYEEME AMUTWE UULI ACIVWUMBYO
Web Site Iilibedelede
AMUBALE Bbaibbele lijanika mumyaambo iibalilwa ku 50 alimwi amakani aambi aamu Bbaibbele mumyaambo iinda ku 500.
AMULANGE makani aamumyaambo yakutambaika iitandila ku 70.
AMUBELESYE myaambo minji iili a Web site.
AMUSWIILILE zisobano zyakalekkoodwa zyaamba makani aakkomanisya aamu Bbaibbele.
AMUBONE makani aamu Bbaibbele aatondezya mbozyakacitika zyintu.
AMWEEBELELE zisobano zyamu Bbaibbele alimwi amavidiyo aakonzya kumugwasya kuliyumya mumapenzi.
AMUKKOPE mabbuku, zibalo zyamumagazini, alimwi anyimbo kakunyina kubbadela.
AMUVWUNTAUZYE makani aasiyene-siyene kubelesya LAIBBULALI YAA INTANETI—inzila iikonzya kumugwasya kujana makani manji aajanika mumyaambo iinda ku 100.
CIBEELA CABANABUKWETENE
“Ndiyanda kuti mukwasyi wangu uzwidilile. Mebo abakaintu bangu tulijisi buyumuyumu mazuba aano, kwaambisya ciindi nitwakaba abana. Tweelede kulubelesya lugwasyo ndotwakapegwa”
BBAIBBELE LYAAMBA KUTI:
“Iŋanda ilayasigwa busongo, ilaimikwa amaanu.”—Tusimpi 24:3.
ZIBEELA ZYAA WEB SITE ZIGWASYA
Cibeela cakuti “Banabukwetene Alimwi Abazyali” cilakonzya kumugwasya kuliyumya mubuyumuyumu mbomukonzya kujana mbuli:
Kuzwidilila mumwaka wakusaanguna mucikwati
Mbomukonzya kweendelezya bamakwe
Kulaya bana
Kukazyanya
Kumana penzi lyamali
(Amubone cibeela cakuti NJIISYO ZYAMU BBAIBBELE > BANABUKWETENE ALIMWI ABAZYALI)
Ibbuku lyakuti Inzila Yakujana Lukkomano Mumukwasyi lilijisi makani manji aamba zyamikwasyi, kuzwa ciindi cakutalika kulibambila lukwatano kusikila kuciindi cakulanganya bazyali bacembeede.
(Alimwi lilajanika a Web site ya www.pr418.com. Amubone cibeela cakuti MABBUKU > MABBUKU AMABROSHUWA)
CIBEELA CABAZYALI
“Kunyina cintu ciyandika kapati kulindime kwiinda bana bangu. Ndiyanda kuti bakakomene kabotu”
BBAIBBELE LYAAMBA KUTI:
“Iyisya mwana aende munzila iielede, lino akomena takooyooleya mulinjiyo.”—Tusimpi 22:6.
ZIBEELA ZYAA WEB SITE ZIGWASYA
Cibeela cakuti “Bana” cilijisi makani aajisi zifwanikiso, mavidiyo alimwi aziiyo zyamu Bbaibbele zikonzya kumugwasya kuyiisya bana banu . . .
kumvwida
kuba aluzyalo
kumvwana abamwi
kwiiya kwaamba kuti “ndalumba”
(Amubone cibeela cakuti NJIISYO ZYAMU BBAIBBELE > BANA)
Mabbuku aakuti Bbuku Lyangu Lya Makani Aamu Bbaibbele alimwi alyakuti Amwiiye Ku Mwiiyi Mupati alijisi zifwanikiso zibotu zibambilidwe ndinywe kubalila bana banu.
(Alimwi alajanika a Web site ya www.pr418.com. Amubone cibeela cakuti MABBUKU > MABBUKU AMABROSHUWA)
CIBEELA CABAKUBUSI
“Ndiyandaula mizeezo kujatikizya cikolo, bazyali, balongwe, alimwi abantu mbondiindene limwi zizo. Tandicili mwana, aboobo tandiyandi kwaambilwa cakucita”
BBAIBBELE LYAAMBA KUTI:
“Moyo wako ukondwe mumazuba aabwanike bwako.”—Mukambausi 11:9.
ZIBEELA ZYAA WEB SITE ZIGWASYA
Cibeela cakuti “Bakubusi” cilijisi zibalo alimwi amavidiyo aakonzya kukugwasya ikuti . . .
kolendeledwe
kojisi mapenzi kucikolo
wasotoka mulawo wamuŋanda
kabakukonga kukuuma naa kukucita zyintu ziletela muzeezo wakoonana
(Amubone cibeela cakuti NJIISYO ZYAMU BBAIBBELE > BAKUBUSI)
Ibbuku lyamu Cingisi lyakuti Questions Young People Ask—Answers That Work, volyumu 1 alimwi a 2 lilabandika mibuzyo iiyandika kapati iili 77 iivwula kubuzyigwa.
(Alimwi lilajanika a Web site ya www.pr418.com. Amulange cibeela cakuti MABBUKU > MABBUKU AMABROSHUWA)
KULI BAABO BAYANDA KWIIYA BBAIBBELE
“Ndilayanda kulizyiba kabotu Bbaibbele. Ino ncinzi ncondeelede kucita?”
BBAIBBELE LYAAMBA KUTI:
“Magwalo oonse akasololelwa a Leza alimwi alagwasya mukuyiisya.”—2 Timoteyo 3:16.
ZIBEELA ZYAA WEB SITE ZIGWASYA
Bbaibbele lya Busanduluzi bwa Nyika Mpya bwa Magwalo Aasalala lililuzi alimwi talikatazyi kubala.
(Amulange cibeela ca MABBUKU > BBAIBBELE)
Cibeela cakuti “Mibuzyo Yamu Bbaibbele Yaingulwa” cilijisi bwiinguzi kumibuzyo mbuli yakuti, “Ino nkaambo nzi Leza ncazumizya nkondo kuti kazicitika?” “Ino Jesu wakazyalwa lili?”
(Amubone cibeela cakuti NJIISYO ZYAMU BBAIBBELE > MIBUZYO YAMU BBAIBBELE YAINGULWA)
Cibeela cakuti “Amulombe Ciiyo ca Bbaibbele Citabbadelwi” cimupa coolwe cakuba aciiyo ca Bbaibbele citabbadelwi.
(Amutyanke acibeela cakuti “Amulombe Ciiyo ca Bbaibbele” kutegwa mujalule peeji lyamatalikilo)
“Ndakacileka kubala Bbaibbele, nkaambo tiindakali kulimvwisya. Pele ciindi nindakatalika kuliiya kwiinda mukubelesya bbuku lijisi mutwe wakuti, ‘Ino Ncinzi Cini Bbaibbele Ncoliyiisya?’ ndakagambwa kubona Bbaibbele mbolitakatazyi kumvwa.”—Oobu mbobakaamba ba Christina.
Buzuba abuzuba, bantu basika ku 700,000 balaiswaya Web site ya jw.org. Sena andinywe inga tiimwacita oobo?