Ba Mabel, ibaku Argentina, bakali kupona buumi buli kabotu alimwi bakali kubeleka kabali badokota. Mu 2007, bakatalika kulimvwa kukatala alimwi akuciswa-ciswa mutwe. Baamba kuti: “Ndakaunka kuli bamadokota basiyene-siyene alimwi akusola misamu iindene-indene, pele kunyina cakagwasya pe.” Mane kumamanino, ba Mabel bakapimwa kubongo, mpoonya bakajanwa kuti baciswa bulwazi bwakubongo. Bakaamba kuti: “Eelo kaka ndakatyompwa kapati! Alimwi cakandaalila kusyoma kuti ndakali kupona asinkondoma ooyo.”

Ba Mabel bakazumanana kwaamba kuti: “Nokuba boobo, kunyina nondakali kumvwisya mbobwakali bupati bulwazi oobu mane kusikila nondakaandulwa. Ciindi nondakasinsimuka kandili mucibbadela, tiindakali kucikonzya kweenda. Ncondakali kukonzya buyo kucita nkulanga kuciluli. Nondatakalinaandulwa ndakali kucikonzya kucita zintu zinji alimwi ndakalaangulukide. Pele mukulaba kwaliso, kunyina ncondakacili kukonzya kucita. Mazuba ngondakakkala mucibbadela ndakalikopene kapati alimwi akunyonganizyigwa acoongo camincini, tulangu twamucibbadela, akumvwa balwazi bamwi kabalila. Ndakalipengede kapati.”

Alimwi baamba kuti: “Pele mazuba aano ndapona aasyoonto. Zimwi ziindi ndilacikonzya kulyeendela. Nokuba boobo, meso alimwi amilambi tazicibeleki kabotu.”

Amuzibone munzila yeelede zintu. Mulugwalo lwa Tusimpi 17:22, Ibbaibbele lyaamba kuti: “Moyo uukondwa musamu mubotu, Pele muuya uutyokede ulayuminizya mubili.” Ba Mabel baamba kuti: “Ciindi nondakali kuyaabupona, ndakajana buyumuyumu mbubwenya mbobakali kujana bantu mbondakali kusilika. Kunyanyaasya mubili cakali kucisa, alimwi zimwi ziindi ndakali kuyeeya kuti ndicileke. Pele kutegwa ndizunde mizeezo eeyi mibyaabi, ndakali kulisinikizya, nkaambo ndakalizyi kuti kuliyumya kulakonzya kundigwasya.”

Amubikkile maano kuzintu zikonzya kumupa bulangizi. Ba Mabel baamba kuti: “Kuzwa mu Bbaibbele, ndakazyiba cipa kuti ntenda kazicitika. Pele alimwi ndakalizyi kuti mazuba mbwaayaabuya, acalo ciindi cakuti mapenzi amane kukabe kutamani caswena.” *

Amubone kuti Leza ulamulanganya nywebo kumugama. (1 Petulo 5:7) Ba Mabel balaamba mbokakabagwasya kaambo aaka nobati: “Ciindi nobakanditola kukwaandulwa, ndakabona mbwaali aamasimpe majwi aali mulugwalo lwa Isaya 41:10, mwalo Leza mwaamba kuti: ‘Utayoowi, nkaambo ndili ayebo’ Ndakalimvwa kuba alumuuno lwamumizeezo akaambo kakuzyiba kuti Jehova Leza ulandilanganya lyoonse.”

Sena mulizyi? Ibbaibbele liyiisya kuti ciyoosika ciindi calo bantu nobatakaciswi.—Isaya 33:24; 35:5, 6.